ភ្នំពេញៈ ដោយឃើញពីភាពយឺតយ៉ាវ ការមិនគោរពច្បាប់ និងភាពអសកម្មមួយចំនួនរបស់ក្រុមហ៊ុន និងម្ចាស់សំណង់បុរី ផ្ទះល្វែង វីឡា ឬអគារសម្រាប់លក់ កំពុងកើតមានកាន់តែច្រើននោះ អគ្គនាយកដ្ឋានពន្ធដារ កាលពីថ្ងៃ ទី៩ ខែ តុលា កន្លងមក បានចេញសេចក្តីជូនដំណឹងមួយដល់ម្ចាស់សំណង់បុរី វីឡា ឬអគារសម្រាប់លក់ទាំងអស់ទាក់ទងនឹងការបង់ពន្ធ។ ខ្លឹមសារនៃសេចក្តីជូនដំណឹងមានដូចខាងក្រោម៖
អនុលោមតាមស្មារតីអង្គប្រជុំ ថ្ងៃ ទី២៩ ខែ ឧសភា ឆ្នាំ ២០១៣ ជាមួយម្ចាស់ សំណង់បុរី ផ្ទះល្វែង វីឡា ឬអគារ និងចំណារឯកភាពរបស់ឧបនាយករដ្ឋមន្ត្រី រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ ចុះថ្ងៃ ទី៣១ ខែ កក្កដា ឆ្នាំ ២០១៣ លើលិខិតលេខ ១១២៦ អពដ ចុះថ្ងៃ ទី២៤ ខែ មិថុនា ឆ្នាំ ២០១៣ របស់អគ្គនាយកដ្ឋានពន្ធដារ អគ្គនាយកដ្ឋានពន្ធដារសូមជម្រាបជូនដំណឹងដល់ម្ចាស់សំណង់បុរី ផ្ទះវីឡា ឬអគារសម្រាប់លក់ទាំងអស់ ដូចខាងក្រោម៖
១-ម្ចាស់ សំណង់ដែលបានបើកការដ្ឋានសាងសង់ និងលក់ចាប់ពីថ្ងៃ ទី២៩ ខែ ឧសភា ឆ្នាំ ២០១៣ ត្រូវទិញគ្រឿងសំណង់ពីអ្នកជាប់ពន្ធតាមរបបស្វ័យប្រកាស (របបពិត) ដើម្បីទទួលបានឥណទានលើអាករធាតុចូល សម្រាប់កាត់កងជាមួយអាករលើធាតុ ចេញនៅពេលលក់ចេញ។
២-ការសាងសង់ផ្ទះល្វែង វីឡា ឬអគារសម្រាប់លក់ទាំងអស់ ត្រូវបូកបន្ថែមអាករលើតម្លៃបន្ថែម ១០ ភាគរយ លើតម្លៃសំណង់ តាមមាត្រា ៦៤ នៃច្បាប់ស្តីពីសារពើពន្ធ និងបូកបន្ថែមប្រាក់រំដោះពន្ធលើប្រាក់ចំណេញ ១ ភាគរយ លើតម្លៃសំណង់ និងដីតាមមាត្រា ២៨ នៃច្បាប់សារពើពន្ធ។ ទន្ទឹមនឹងនេះ ម្ចាស់សំណង់ក៏មានកាតព្វកិច្ចបង់ប្រភេទពន្ធផ្សេងៗទៀត តាមច្បាប់ជាធរមានផងដែរ។
តាមរយៈសេចក្តីជូនដំណឹងខាងលើ អគ្គនាយកដ្ឋានពន្ធដារបានធ្វើការព្រមានថា ករណីម្ចាស់សំណង់មិនអនុវត្តតាមសេចក្តីជូនដំណឹងខាងលើនេះនឹងទទួលរងការកំណត់ពន្ធឡើងវិញ ស្របតាមមាត្រា ១១៦ មាត្រា ១១៧ រួមទាំងទោសទណ្ឌតាមមាត្រា ១២៨ មាត្រា ១៣០ មាត្រា ១៣១ មាត្រា ១៣២ និងមាត្រា ១៣៣ នៃច្បាប់សារពើពន្ធ។
ការរីកចម្រើនផ្នែកសេដ្ឋកិច្ច និងកំណើនប្រជាជន បានធ្វើឲ្យតម្រូវការកន្លែងស្នាក់នៅកើនឡើងយ៉ាងច្រើននារយៈពេលប៉ុន្មានឆ្នាំចុងក្រោយនេះ។ ជាក់ស្តែងតាមការសិក្សាកាលពីដើមឆ្នាំ ២០១៣ កន្លងមកបានរកឃើញថា នៅកម្ពុជាក្នុង ១ ឆ្នាំមានតម្រូវការលំនៅឋានថ្មីចន្លោះពី ១០-២០ ម៉ឺនខ្នង៕
