The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​ជំនាញ​និយាយ​ពី​អគារ​សហ​កម្មសិទ្ធិ និង​ច្បាប់​ផ្សេងៗ




អ្នក​ជំនាញ​និយាយ​ពី​អគារ​សហ​កម្មសិទ្ធិ និង​ច្បាប់​ផ្សេងៗ

អ្នក​ជំនាញ​និយាយ​ពី​អគារ​សហ​កម្មសិទ្ធិ និង​ច្បាប់​ផ្សេងៗ

130606_04
អគារស្នាក់នៅរួម Rose Condo ដែលមានទីតាំងនៅជិតទន្លេបាសាក់ ភ្នំពេញ ហុង មិនា

ភ្នំពេញៈ ក្រុម​អ្នក​ជំនាញ​អចលន​ទ្រព្យ​និង​ច្បាប់​បាន​និយាយ​ពី​ច្បាប់​ស្តី​អំពី​ការ​ផ្តល់​សិទ្ធិ​កម្មសិទ្ធិ​លើ ចំណែក​ឯកជន​នៃ​អគារ​សហ​កម្មសិទ្ធិ​ដល់​ជន​បរទេស​ដែល​កំពុង​ផ្តល់​ផល ប្រយោជន៍ និង​ការ​យល់​ច្រឡំ​មួយ​ចំនួន​ដល់​សាធារណជន។

លោក ឌឹត ចណ្ណា ប្រធាន​គ្រប់​គ្រង​ក្រុមហ៊ុន​អចលន​ទ្រព្យ វីអឹមស៊ី បាន​និយាយ ថា ច្បាប់​ខាង​លើ​នេះ​បាន​អនុញ្ញាត​ឲ្យ​ជន​បរទេស​អាច​មាន​សិទ្ធិ​ទិញ​ផ្ទះ​ចាប់​ពី​ជាន់​ទី១​ឡើង​ទៅ ប៉ុន្តែ​មិន​អនុញ្ញាត​ឲ្យ​ពួក​គេ​មាន​សិទ្ធិ​ទិញ​ផ្ទះ​ចាប់​ពី​ជាន់​ទី១​ឡើង ទៅ​បាន​គ្រប់​ទីកន្លែង​នោះ​ទេ​គឺ​ពួក​គេ​អាច​ទិញ​បាន​តែ​អគារ​សហ​កម្មសិទ្ធិ​ប៉ុណ្ណោះ។ ប្រសិន​បើ​ពួក​គេ​ចង់​ទិញ​ផ្ទះ​ល្វែង​នៅ​ជាន់​ទី១​ពួក​គេ​មិន​អាច​ទិញ​បាន​ទេ​។ ពួក​គេ​អាច​ទិញ​បាន​ទាល់​តែ​ម្ចាស់​ផ្ទះ ឬ​ម្ចាស់​អគារ​ណា​មួយ​មាន​ការ​រៀបចំ​លក្ខន្តិកៈ​តាម​នីតិវិធី​ច្បាប់​ច្បាស់​លាស់​ជា​មុន​សិន។

លោក​បាន​បញ្ជាក់​ថា​៖ «​នា​ពេល​កន្លង​មក​ប្រជាជន​កម្ពុជា​មាន​ការ​យល់​ច្រឡំ​ពី​រឿង​នេះ​ដោយ​ពួក​គេ​គិត​ថា ជន​បរទេស​អាច​ទិញ​ផ្ទះ​ចាប់​ពី​ជាន់​ទី១​ឡើង​ទៅ​ប៉ុន្តែ​នោះ​មិន​មែន​ជា​ការ​ពិត​ទេ​»​។ លោក​បាន​បន្ថែម​ថា​៖​«​ជន​បរទេស​អាច​ទិញ​ផ្ទះ​ជាន់​ទី១​បាន​ដរាប​ណា​ពួក​គេ ដាក់​ឈ្មោះ​ក្រុមហ៊ុន ឬ​យក​គ្រួសារ​(ប្តី-ប្រពន្ធ)​ដែល​មាន​សញ្ជាតិ​ខ្មែរ​ទើប​គាត់​អាច​គ្រប់​គ្រង​៤៩​ភាគរយ​នៃ​ចំណែក​ផ្ទះ​ណា​មួយ​បាន​»។

ច្បាប់​នេះ​មាន​ផល​ល្អ​និង​ផល​មិន​ល្អ​ផង​ដែរ​។ ផល​ល្អ​នៅ​ត្រង់​ថា​រដ្ឋាភិបាល​បាន​គិត​គូរ​ជា​ច្រើន​ចំណុច​មុន​ចេញ​ច្បាប់​នេះ​ឲ្យ​ប្រើ​ប្រាស់​ដើម្បី​កុំ​ឲ្យ​មាន​ភាព​ស្មុគ​ស្មាញ​លើ​ការ​គ្រប់​គ្រង និង​បង្ក​ផល​ប៉ះពាល់​ដល់​អធិបតេយ្យ​ភាព​របស់​ប្រទេស ហើយ​រដ្ឋាភិបាល​ចង់​បង្កើត​ច្បាប់​ឲ្យ​មាន​ភាព​តឹង​រ៉ឹង​ដើម្បី​ទប់​ស្កាត់ ការ​ហក់​ឡើង​ខ្លាំង​ពេក​នៃ​វិស័យ​អចលន​ទ្រព្យ ចំណែក​ចំណុច​អវិជ្ជមាន​នៅ​ត្រង់​មាន​ជន​បរទេស​ច្រើន​ចង់​ទិញ​ផ្ទះ​ពី​ជាន់​ទី១​នៅ​កម្ពុជា​តែ​គាត់​មិន​អាច​ទិញ​បាន​នូវ​ផ្ទះ​ណា​ដែល​មិន​មាន​លក្ខណៈ​ជា​សហ​កម្មសិទ្ធិ​នោះ​ទេ។ ផ្ទះ​នៅ​ម្តុំ​ផ្សារ​កណ្តាល​នៅ​តាម​តិរវិថី​ព្រះ​ស៊ីសុវត្ថិ​(មាត់​ទន្លេ ) និង​ម្តុំ​ផ្សារ​ចាស់​ជន​បរទេស​មិន​អាច​ទិញ​បាន​នោះ​ទេ។

លោក គីម ហ៊ាង នាយក​ក្រុមហ៊ុន​អចលន​ទ្រព្យ​ខ្មែរ បាន​ប្រាប់​ថា គំនិត​ដើម​នៃ​ច្បាប់​នេះ គឺ​ផ្តោត​សំខាន់​តែ​ទៅ​លើ​ខុនដូ​ប៉ុណ្ណោះ ព្រោះ​ខុនដូ​គេ​ទិញ​សម្រាប់​ស្នាក់​នៅ​និង​មាន​លក្ខណៈ​ជា​អគារ​សហ​កម្មសិទ្ធិ ចំណែក​អាផាតមិន​ជា​អគារ​សម្រាប់​ជួល ប៉ុន្តែ​ជន​បរទេស​ពួក​គេ​តែង​គិត​ថា​ឲ្យ​តែ​ផ្ទះ​ផុត​ពី​ជាន់​ផ្ទាល់​ដី​ឡើង ទៅ​ពួកគេ​តែង​ហៅ​ថា​ខុនដូ​។ រហូត​មក​ដល់​ពេល​នេះ​មាន​ប្រជា​ពលរដ្ឋ​ជា​ច្រើន​បាន​យល់​ខុស​ពី​ច្បាប់​ខាង​លើ​នេះ។

លោក​ថ្លែង​ថា​៖​«​ផ្ទះ​នៅ​ម្តុំ​ផ្សារ​កណ្តាល​ផ្សារ​ចាស់​និង​ផ្ទះ​នៅ​តាម​ផ្លូវ​មាត់​ទន្លេ​ចាប់​ពី​ជាន់​ទី១​ឡើង​ទៅ​បាន​កើន​តម្លៃ​ទ្វេ​ដង​ដោយ​សារ​ជន​បរទេស​ជា​ច្រើន​បាន​ទិញ​ផ្ទះ​នៅ​តំបន់​នោះ​និង​ដាក់​ឈ្មោះ​ខ្លួន​ឯង​ព្រម​ទាំង​មាន​ការ​ទទួល​ស្គាល់​ពី​អាជ្ញាធរ​នៅ​តំបន់​នោះ​ទៀត​ផង​»។ លោក​បន្ត​ថា​៖​«​ការ​ពិត​ប្រជាជន​យល់​ច្រឡំ ឬ​គាត់​ដឹង ដែរ តែ​នៅ​ពេល​ផ្ទះ​ឡើង​ថ្លៃ​រឿង​អី​គាត់​មិន​ចង់​បាន ដូច​នេះ​ពួក​គេ​លក់​ឲ្យ​ជន​បរទេស ដោយ​មិន​គោរព​តាម​ច្បាប់​ស្តី​ពី​ការ​ផ្តល់​សិទ្ធិ​កម្មសិទ្ធិ​លើ​ចំណែក ឯកជន​នៃ​អគារ​សហ​កម្មសិទ្ធិ​ដល់​ជន​បរទេស​»។

យោង​តាម​មាត្រា​ទី៥​នៃ​ច្បាប់​ស្តី​ពី​ការ​ផ្តល់​សិទ្ធិកម្ម​សិទ្ធិ​លើ​ចំណែក​ឯកជន​នៃ​អគារ​សហ កម្មសិទ្ធិ​សម្រាប់​ជន​បរទេស​បាន​ចែង​ថា ជន​បរទេស​ដែល​មាន​លក្ខណ​សម្បត្តិ​គ្រប់​គ្រាន់​តាម​ផ្លូវ​ច្បាប់​មាន​សិទ្ធិ​ធ្វើ​ជា​ម្ចាស់​កម្មសិទ្ធិ​លើ​ចំណែក​ឯកជន​នៃ​អគារ​សហ​កម្មសិទ្ធិ និង​សិទ្ធិ​ប្រើ​ប្រាស់​និង​អាស្រ័យ​ផល​លើ​ចំណែក​រួម និង​មាន​កាតព្វកិច្ច​គោរព​តាម​បញ្ញត្តិ​ទាំង​ឡាយ​នៃ​ច្បាប់​នេះ​នឹង​បទដ្ឋាន​គតិយុត្តិ​ពាក់​ព័ន្ធ​ផ្សេង​ទៀត​ជា​ធរមាន។

លោក ផន ស៊ីន អ្នក​ជំនាញ​ច្បាប់​ភូមិបាល​មាន​ប្រសាសន៍​ថា នៅ​ក្នុង​អនុក្រឹត្យ​របស់​រាជ​រដ្ឋាភិបាល​លេខ​១២៦​ស្តី​ពី​ការ​គ្រប់​គ្រង និង​ប្រើ​ប្រាស់​អគារ​សហ​កម្មសិទ្ធិ​បាន​កំណត់​និយម​ន័យ​ច្បាស់​អំពី​អ្វី ទៅ​ជា​អគារ​សហ​កម្មសិទ្ធិ។ អគារ​សហកម្ម​សិទ្ធិ​សំដៅ​ដល់​អគារ ឬ​សំណង់​ដែល​មាន​កម្មសិទ្ធិករ​ច្រើន​រស់​នៅ ដែល​មាន​ចំណែក​ខ្លះ​ជា​កម្មសិទ្ធិ​ដាច់​មុខ​របស់​សហ​កម្មសិទ្ធិករ​នីមួយៗ ហៅ​ថា ចំណែក​ឯកជន និង​មាន​ចំណែក​ខ្លះ​ជា​លំហ​រួម​សម្រាប់​ប្រើ​ប្រាស់​រួម​របស់​កម្មសិទ្ធិករ​ទាំង​អស់​ហៅ​ថា​ចំណែក​រួម។ ប្រភេទ​អគារ​សហ​កម្មសិទ្ធិ​ទាំង​នោះ​មាន​ជា​អាទិ៍​ដូច​ជា ភូមិ​គ្រឹះ​អាច​ពាក់​កណ្តាល​ភូមិ​គ្រឹះ​អាច​ជា​ផ្ទះ​ល្វែង​ច្រើន​ល្វែង​និង​មាន​ច្រើន​ជាន់​ជាប់ៗ​គ្នា​អាច​ជា​ខុនដូ ឬ​ប្រភេទ​ផ្ទះ​ផ្សេងៗ​ទៀត​ដែល​មាន​រចនា​សម្ព័ន្ធ​ជាប់​គ្នា​។

តើ​ប្រភេទ ផ្ទះ​ល្វែង ឬ​វីឡា និង​ភូមិ​គ្រឹះ​អាច​រាប់​បញ្ចូល​ជា​ផ្ទះ​សហ​កម្មសិទ្ធិ​បាន​ដែរ ឬ​ទេ? លោក ផន ស៊ីន បាន​ពន្យល់​ថា​ផ្ទះ​ល្វែង វីឡា ឬ​ភូមិ​គ្រឹះ​អាច​គ្រប​ដណ្តប់​ជា​អគារ​សហ​កម្មសិទ្ធិ​បាន​ផង​ដែរ តែ​សូម​កុំ​គិត​ថា មិន​មែន​ប្រភេទ​ផ្ទះ​ទាំង​អស់​អាច​ជា​អគារ​សហ​កម្មសិទ្ធិ​បាន​នោះ​ទេ។ ផ្ទះ​ល្វែង វីឡា ឬ​ភូមិ​គ្រឹះ​អាច​ក្លាយ​ជា​អគារ​សហ​កម្មសិទ្ធិ​បាន​លុះត្រា​អគារ​នោះ​មាន​លក្ខខណ្ឌ​ផ្សេងៗ​ទៀត​បូក​បញ្ចូល​គ្នា​ទើប​អាច​ក្លាយ​ជា​អគារ​សហ​កម្មសិទ្ធិ​បាន។

លក្ខខណ្ឌ​ទាំង​នោះ​មាន​ដូចជា​ផ្ទះ ឬ​ភូមិ​គ្រឹះ​នោះ​មាន​កម្មសិទ្ធិករ​ច្រើន​ចំណែក​ផ្សេងៗ​គ្នា មាន​រចនា​សម្ព័ន្ធ​ជាប់​គ្នា និង​បំពេញ​លក្ខខណ្ឌ​មួយ​ចំនួន​ដូច​ជា​មាន​បទ​បញ្ជា​ផ្ទៃ​ក្នុង​រចនា​សម្ព័ន្ធ​គ្រប់​គ្រង និង​ការ​ទទួល​ខុស​ត្រូវ​រួម​គ្នា​លើ​អគារ​ទាំង​មូល​ទើប​អាច​រាប់​បញ្ចូល​ផ្ទះ​ល្វែង វីឡា និង​ភូមិ​គ្រឹះ​នោះ​ជា​អគារ​សហ​កម្មសិទ្ធិ​បាន៕

អត្ថបទគួរចាប់អារម្មណ៍