ប៉ារីសៈក្រុមហ៊ុនប្រតិបត្តិការផ្នែកសណ្ឋាគារដ៏ធំបំផុតនៅទ្វីបអឺរ៉ុប Accor SA មានផែនការចំណាយប្រាក់ចំនួន១,៥ពាន់លានអាមេរិក នៅប្រទេសប្រេស៊ីល ដើម្បីបើកឲ្យដំណើរការក្រុមហ៊ុនដែលជាកម្ម-សិទ្ធិរបស់ខ្លួនរហូត ដល់២៥០ក្នុងរយៈពេល៤ឆ្នាំខាងមុខ។
ក្រុមហ៊ុនដែលមានទីស្នាក់ ការធំនៅទីក្រុងប៉ារីស ប្រទេសបារាំងមួយនេះបានសរសេរនៅលើសារអេឡិចត្រូនិករបស់ខ្លួនកាល ពីចុងសប្តាហ៍មុនថា Accor នឹងបើកសណ្ឋាគារឲ្យបានច្រើនជាង២៥ក្នុង១ឆ្នាំៗនៅប្រទេស ប្រេស៊ីល ដែលជាប្រទេសកំពុងមានការរីកចម្រើនខ្លាំង ស្របពេលប្រទេសនេះនឹងមានកំណើនភ្ញៀវទេសចរទៅទស្សនាច្រើន នៅពេលដែលខ្លួនត្រូវធ្វើជាម្ចាស់ផ្ទះរៀបចំការប្រកួតកីឡាបាល់ ទាត់ដណ្តើមពានរង្វាន់ពិភពលោកឆ្នាំ២០១៤ និងកីឡាអូឡាំពិកអន្តរជាតិ ឆ្នាំ២០១៦។
កាលពីខែកក្កដាកន្លងមក ក្រុមហ៊ុន Accor ក៏បានចំណាយប្រាក់ចំនួន២៧៥លានដុល្លារអាមេរិកផងដែរ ដើម្បីធ្វើកិច្ចសហប្រតិបត្តិការជាមួយនឹងក្រុមហ៊ុន Grupo Posadas។ កិច្ចព្រមព្រៀងនោះមានន័យថា ក្រុមហ៊ុន Accor នឹងទទួលបានសិទ្ធិប្រតិបត្តិការពិសេសចំនួន១៩បន្ថែមទៀតទាក់ទង នឹងវិស័យសណ្ឋាគារនៅក្នុងប្រទេសប្រេស៊ីល។ Accor បានបើកឲ្យដំណើរការសណ្ឋាគារចំនួន១១រួចហើយ នៅតំបន់អាមេរិកខាងត្បូងក្នុងឆ្នាំនេះ ខណៈក្រុមហ៊ុនមានគម្រោងបើកសណ្ឋាគារចំនួន១១ផ្សេងទៀតមុនដំណាច់ ឆ្នាំ២០១២នេះ ដើម្បីឲ្យបន្ទប់ស្នាក់នៅកើនឡើងដល់៣០៦៨។
របាយ ការណ៍ក្រុមហ៊ុន Accor បានបង្ហាញថា ក្នុងរយៈពេល៦ខែដើមឆ្នាំ២០១២ តម្លៃបានមកពីការគ្រប់គ្រង និងដៃគូរបស់ខ្លួនចំនួន២៣៣លានអឺរ៉ូ៕ BP
