ដើម្បីឆ្លើយតបទៅនឹងកង្វះខាតធនធានមនុស្ស និងបំពេញបំណងអ្នកដែលចង់បានចំណេះដឹងពីបច្ចេកទេសក្នុងការវាយតម្លៃ និងជំនាញធ្វើជាភ្នាក់ងារអចលនវត្ថុ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា នឹងធ្វើពិធីបើកវគ្គសិក្សាមួយនៅរសៀលថ្ងៃសៅរ៍នេះ នៅផាកកាហ្វេ ទល់មុខមន្ទីរពេទ្យកាល់ម៉ែត។
លោក សួន សូលេញ នាយកប្រតិបត្តិលេខាធិការដ្ឋាននៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានប្រាប់ ប៉ុស្តិ៍ អចលនទ្រព្យ កាលពីថ្ងៃព្រហស្បតិ៍ថា វគ្គបណ្តុះបណ្តាលដែលមានរយៈពេល៣ខែនេះ មានសារៈសំខាន់ណាស់សម្រាប់ប្រជាពលរដ្ឋទូទៅ ពិសេសអ្នកកំពុង ឬមានបំណងចង់ប្រកបមុខរបរទាក់ទងវិស័យអចលនទ្រព្យ ព្រោះជាមុខវិជ្ជាមួយដែលផ្សារភ្ជាប់នឹងការរស់នៅប្រចាំថ្ងៃ។
វគ្គសិក្សានេះត្រូវបែងចែកចេញជា២ គឺថ្នាក់បណ្តុះបណ្តាលផ្នែកវាយតម្លៃអចលនវត្ថុ រៀន៣ថ្ងៃក្នុងមួយសប្តាហ៍ (ចន្ទ ពុធ និងសុក្រ) និងថ្នាក់បណ្តុះបណ្តាលទាក់ទងនឹងជំនាញធ្វើជាភ្នាក់ងារអចលនវត្ថុ រៀន២ថ្ងៃក្នុងមួយសប្តាហ៍ (ថ្ងៃសៅរ៍-អាទិត្យ)។
លោកបានថ្លែងថា៖«បន្ទាប់ពីបញ្ចប់ការសិក្សាសិក្ខាកាមនឹងទទួលបាននូវចំណេះដឹងដ៏ទូលំទូលាយ ព្រោះសមាគមបានអញ្ជើញវាគ្មិនមានជំនាញមកបង្រៀនក្នុងវគ្គសិក្សានេះ ហើយសមាគមនឹងចេញវិញ្ញាបនបត្របញ្ជាក់ការសិក្សាជូនផងដែរ»។
វគ្គបណ្តុះបណ្តាលផ្នែកវាយតម្លៃអចលនវត្ថុ បានចាប់ផ្តើមសិក្សាកាលពីថ្ងៃទី២ ខែកក្កដា កន្លងមក ខណៈពិធីបើកជាផ្លូវការត្រូវធ្វើនៅរសៀលថ្ងៃនេះ។ អ្នកសិក្សាក្នុងវគ្គនេះតម្រូវឲ្យបង់ប្រាក់១៧០ដុល្លារសម្រាប់សមាជិកសមាគម និង២២០ដុល្លារសម្រាប់អ្នកនៅក្រៅវិស័យ។
បើតាមមន្ត្រីរបស់សមាគមខាងលើ លោក នង ចំរើន បានឲ្យដឹងថា គិតត្រឹមថ្ងៃព្រហស្បតិ៍ មានអ្នកចុះឈ្មោះចូលរៀនក្នុងថ្នាក់វាយតម្លៃអចលនទ្រព្យចំនួន៣៥នាក់ ខណៈថ្នាក់ជំនាញធ្វើជាភ្នាក់ងារអចលនវត្ថុ មានចំនួនជាង២០នាក់។
លោក ចេង ខេង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ធ្លាប់មានប្រសាសន៍ថា ការបើកវគ្គបណ្តុះបណ្តាលទាំង២ខាងលើ គឺក្នុងគោលបំណងផ្តល់ឲ្យអ្នកដែលមានបំណងចង់ស្វែងយល់អំពីចំណេះដឹងនានាពាក់ព័ន្ធវិស័យអចលនវត្ថុ និងអ្នកដែលកំពុងប្រកបមុខរបរទាក់ទងទៅនឹងវិស័យអចលនទ្រព្យ។
លោកបានថ្លែងថា៖«វគ្គបណ្តុះបណ្តាលនេះនឹងបើកចំហដល់អ្នកដែលមានបំណងចង់ចូលរៀន និងចង់រកស៊ីក្នុងវិស័យអចលនទ្រព្យទាំងអស់។ នៅពេលអនាគតអ្នករកស៊ីក្នុងវិស័យនេះត្រូវតែឆ្លងកាត់ការបណ្តុះបណ្តាល ទើបមានសិទ្ធិទទួលបានអាជ្ញាប័ណ្ណប្រកបអាជីវកម្ម»។
ការចុះឈ្មោះនឹងប្រព្រឹត្តទៅរហូតដល់ថ្ងៃទី១០ ខែកក្កដា នៅទីស្នាក់ការសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដែលស្ថិតនៅផ្ទះលេខ២០បេ ផ្លូវលេខ២៩៤ កែងផ្លូវលេខ២១ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ឬទូរស័ព្ទលេខ ០១២ ៦៥៤ ៦៧១និង ០១២ ៧៣១ ៧១៩៕
