.jpg)
ទិដ្ឋភាពសំណង់អគារខ្ពស់ៗ ដែលលម្អរចនាដោយពន្លឺភ្លើងចិញ្ចាចចិញ្ចែង ស្ថិតក្នុងសង្កាត់ទន្លេបាសាក់។ ស្រេង ម៉េងស្រ៊ុន
ស្របពេលដែលមានសំណង់ធំៗនិងការដ្ឋានសាងសង់ជាច្រើនបានលេចឡើងជាបន្តបន្ទាប់នៅក្នុងភូមិសាស្ត្ររាជធានីភ្នំពេញនោះគេសង្កេតឃើញថា សង្កាត់ទន្លេបាសាក់គឺជាកន្លែងដែលប្រមូលផ្តុំទៅដោយអគារធំៗ និងខ្ពស់ៗច្រើនជាងគេ ពិសេសសំណង់អគារខុនដូ និងអគារការិយាល័យ។ ហេតុអ្វីបានទីនោះមានការវិវឌ្ឍលឿនបែបនេះ?
លោក ស៊ា ឆៃលីន អគ្គនាយកក្រុមហ៊ុន ស៊ីអិល រៀលធី បានប្រាប់ថា ទន្លេបាសាក់ អាចនិយាយថា ជាកន្លែងដែលវិស័យអចលនទ្រព្យស្ទុះងើបឡើងលឿនបំផុតក្នុងរាជធានីភ្នំពេញនាពេលបច្ចុប្បន្ន។
ការរីកចម្រើនដ៏ឆាប់រហ័សនេះដោយសារមានកត្តាមួយចំនួនដូចជា ទី១ លក្ខណៈអំណោយផលដោយសារមានទីតាំងនៅជិតមាត់ទន្លេ ដែលមានខ្យល់អាកាសល្អបរិសុទ្ធ ទី២ មានប្រព័ន្ធហេដ្ឋារចនាសម្ព័ន្ធល្អប្រសើរ ទី៣ ជាតំបន់ដែលមិនមានការកំណត់កម្ពស់ការសាងសង់ (តំបន់មួយចំនួននៅជិតនោះដូចជា ក្បែរព្រះបរមរាជវាំង និងវិមានឯករាជ្យ ត្រូវបានកំណត់កម្ពស់ការសាងសង់) ទី៤ កត្តាសេដ្ឋកិច្ច ដោយសារប្រទេសកម្ពុជាមានកំណើនសេដ្ឋកិច្ចខ្ពស់ និងទី៥ ទាក់ទងនឹងគោលនយោបាយរបស់រាជរដ្ឋាភិបាលក្នុងការលើកទឹកចិត្តឲ្យវិនិយោគិនចូលមកសាងសង់អគារធំៗក្នុងតំបន់នោះផងដែរ។
លោកបានបញ្ជាក់ថា ៖ «ទន្លេបាសាក់គឺជាទីតាំងដែលមានសក្តានុពលខ្ពស់ ហើយនឹងមានការរីកចម្រើនលឿនទៅមុខជាបន្តទៀត។ ទីនោះគឺជាកន្លែងដែលទទួលបាននូវការចាប់អារម្មណ៍ទាំងវិនិយោគិនក្នុងស្រុក និងជនបរទេស»។
សម្រាប់ឱកាសក្នុងការវិនិយោគលើវិស័យដីធ្លីនៅក្នុងសង្កាត់ទន្លេបាសាក់លោក ឆៃលីន បានបញ្ជាក់ថា មានភាពតូចចង្អៀតណាស់នាពេលនេះ។ ការតូចចង្អៀតនេះ លោកចង់មានន័យថា ទី១ គឺចង្អៀតដោយសារពិបាកក្នុងការស្វែងរកអចលនទ្រព្យដែលដាក់លក់ និងទី២ គឺវាមានតម្លៃខ្ពស់ខ្លាំង។
បើតាមអគ្គនាយកក្រុមហ៊ុន ស៊ីអិលរៀលធី ដីដែលនៅផ្លូវធំ អាចមានតម្លៃក្នុងរង្វង់ជាង៦០០០ដុល្លារក្នុង១ម៉ែត្រការ៉េ ខណៈដីនៅតាមផ្លូវតូច អាចមានតម្លៃជាង២០០០ដុល្លារ។
សង្កាត់ទន្លេបាសាក់ គឺជាផ្នែកមួយនៃខណ្ឌចំការមន ដែលមានវិសាលភាពគ្របដណ្តប់ផ្នែកខាងកើតនៃមហាវិថីព្រះនរោត្តម ចាប់ពីវិមានឯករាជ្យ រហូតទៅដល់ក្បាលថ្នល់។
បច្ចុប្បន្ននេះមានគម្រោងសាងសង់ជាច្រើនកំពុងលេចឡើងនៅកោះពេជ្រ។ ស្រេង ម៉េងស្រ៊ុន
អគ្គនាយកក្រុមហ៊ុន Century 21 Mekong លោក ច្រឹក សុខនីម បាននិយាយថា សង្កាត់ទន្លេបាសាក់នាពេលនេះគេអាចនិយាយបានថាជាតំបន់លេខ1 (Premier) ក្នុងរាជធានីភ្នំពេញព្រោះជាតំបន់ដែលជនបរទេសនិយមចូលចិត្តស្នាក់នៅច្រើន និងសកម្មភាពសេដ្ឋកិច្ចមមាញឹកផងដែរ។ នៅពេលរាត្រីនៅតំបន់ជិតកោះពេជ្រម្តុំផ្សារកុងតឺន័រ គឺមានសកម្មភាពមមាញឹកយ៉ាងខ្លាំងទាំងហាងលក់ទំនិញ និងភោជនីយដ្ឋាន។
ទាក់ទងនឹងស្ថានភាពអចលនទ្រព្យលោក សុខនីម បានប្រាប់ថា បើនិយាយពីអចលនទ្រព្យក្នុងសង្កាត់ទន្លេបាសាក់ គឺគេអាចនិយាយថាពិបាករកដីធំនៅទំនេរណាស់ តែបើមានគឺជាដីតូចៗ។
សង្កាត់ទន្លេបាសាក់គឺជាតំបន់ដ៏មានសក្តានុពលក្នុងរាជធានីភ្នំពេញនាពេលបច្ចុប្បន្នដោយនៅទីនោះមានគម្រោងធំៗដូចជា ផ្សារទំនើបអ៊ីអន, The Bridge, Casa Meridian, The Peak, DI Riviera និង Rose Condo ជាដើម។
បុរសម្នាក់ដែលប្រាប់ថាឈ្មោះ វិចិត្រអាយុ ៣៩ ឆ្នាំជាអ្នករស់នៅម្តុំផ្សារទំនើប Aeon បាននិយាយថា កាលពីអំឡុង ៥-៦ ឆ្នាំមុនតំបន់ទន្លេបាសាក់ មិនសូវមានភាពអ៊ូអរ ភ្លើងភ្លីព្រោងព្រាតនាពេលរាត្រីនិងការកកស្ទះចរាចរណ៍ដូចពេលនេះទេហើយទីតាំងដែលគាត់ជួលគេសម្រាប់លក់ទំនិញនោះក៏មិនថ្លៃដូចពេលនេះដែរ។
ទិដ្ឋភាពនៅផ្សារកុងតឺន័រមួយកន្លែងក្នុងសង្កាត់ទន្លេបាសាក់ ។ រូបថត SAHIBA CHAWDHARY
លោកបានបន្តថា បច្ចុប្បន្ននេះបើមើលជាទូទៅតំបន់ទន្លេបាសាក់ គឺពិតជាកន្លែងដែលមានភាពទាក់ទាញខ្លាំងទាំងសម្រាប់ប្រជាជនខ្មែរ និងជនបរទេស។ កាលពីមុននៅពេលមិនទាន់មានផ្សារទំនើប Aeon គេអាចនិយាយថាមានការពិបាកខ្លះដែរនៅពេលត្រូវការទិញអ្វីមួយ តែនៅពេលនេះមិនមានបញ្ហាទៀតទេ។
លោកបានអះអាងថា ៖ «ការរីកចម្រើនដ៏ឆាប់រហ័សនៅតំបន់ទន្លេបាសាក់អាចនិយាយថា ដោយសារតែមានការវិនិយោគសំណង់ធំៗជាច្រើនពិសេសផ្សារទំនើបជប៉ុន Aeon តែម្តង»។
បច្ចុប្បន្ននាបរិវេណដីដ៏ធំមួយកន្លែងដែលស្ថិតនៅខាងមុខRose Condo ក៏មានរៀបចំជាផ្សារកុងតឺន័រផងដែរ។
លើសពីនេះទៀត កាលពីដើមសប្តាហ៍នេះ សាលារាជធានីភ្នំពេញ ក៏បានប្រកាសពីការចាប់ផ្ដើមអនុវត្តសិក្សាគម្រោងសាងសង់ផ្លូវថ្មើរជើង ស្របតាមមាត់ទន្លេ(ទន្លេបាសាក់) ដំណាក់កាលទី ២ ដែលចាប់ពីចំណុចស្ពានភ្លោះកោះពេជ្រ រហូតដល់គល់ស្ពានព្រះមុនីវង្ស ផងដែរ។
របាយការណ៍ស្រាវជ្រាវថ្មីមួយរបស់ក្រុមហ៊ុនVTrust Appraisal Co., Ltd.ដែលបានចេញផ្សាយកាលពីពេលថ្មីៗនេះបានឲ្យដឹងថា លំនៅឋានថ្មីដែលបានសាងសង់ឡើងនៅក្នុងសង្កាត់ទន្លេបាសាក់គិតចាប់ពីឆ្នាំ២០០៣ រហូតមកដល់ពេលបច្ចុប្បន្ននេះបានកើនឡើងចំនួន១ ៣២២យូនីតដោយភាគច្រើនជាបន្ទប់ស្នាក់នៅក្នុងអគារស្នាក់នៅរួម។
លោក ហ៊ីម សីហា នាយកផ្នែកស្រាវជ្រាវក្រុមហ៊ុនVTrust Appraisal Co., Ltd. បាននិយាយថា បើនិយាយជាទូទៅស្ថានភាពលំនៅឋាននៅក្នុងសង្កាត់ទន្លេបាសាក់ ក្នុងឆ្នាំ ២០១៧ កន្លងមកមិនសូវមានអ្វីប្រែប្រួលច្រើននោះទេពិសេសលំនៅឋានដូចជាផ្ទះល្វែងឬវីឡាតែសម្រាប់សំណង់ធំៗដូចជាខុនដូគឺមានការកើនឡើងច្រើន។ ការកើនឡើងនៃសំណង់ធំៗនៅទីតាំងនេះអាចនិយាយថា ដោយសារទីនេះ គឺកន្លែងដែលនៅជិតតំបន់មាត់ទន្លេ មជ្ឈមណ្ឌលពាណិជ្ជកម្ម សាលារៀនអន្តរជាតិ ស្ថានទូត និងស្ថាប័នធំៗជាច្រើនទៀត។
សម្រាប់ស្ថានភាពទូទៅរបស់សង្កាត់ទន្លេបាសាក់ លោក សីហា បានអះអាងថា ៖ «តម្រូវការលំនៅឋានក្នុងសង្កាត់ទន្លេបាសាក់នឹងកើនឡើងច្រើនបន្ថែមទៀតពីព្រោះតែទីនោះមានលក្ខណៈអំណោយផលច្រើនដល់ការរស់នៅពិសេសសម្រាប់អ្នកជំនួញធំៗ និងជនបរទេសដែលកំពុងតែកើនឡើងយ៉ាងច្រើននៅប្រទេសកម្ពុជា»៕
The Bridge គឺជាគម្រោងដ៏ធំ ស្ថិតក្នុងសង្កាត់ទន្លេបាសាក់។ ស្រេង ម៉េងស្រ៊ុន
