​កម្ចី​ទិញ​ផ្ទះ​នៅ​​ថៃ ​នឹង​ធ្លាក់​ចុះ ១០% ​ក្នុង​ឆ្នាំ​នេះ​

បុគ្គលិកធនាគារក្រុងថៃ កំពុងរាប់ប្រាក់នៅសាខាមួយក្នុងក្រុងបាងកក។ រូបថត AFP

ក្រុងបាកកៈ កម្ចីថ្មីសម្រាប់ទិញផ្ទះក្នុងប្រទេស ថៃ ត្រូវបានរំពឹងថានឹងធ្លាក់ចុះ ១០ ភាគរយនៅឆ្នាំនេះ ដោយសារវិធានកម្ចីទិញផ្ទះតឹងរ៊ឹងរបស់ធនាគារកណ្តាលថៃ និងតម្រូវការខុនដូតិចជាងមុនពីអ្នកទិញជនជាតិចិន។ នេះបើយោងតាមកាសែតបាងកកប៉ុស្តិ៍ដែលរាយការណ៍នាពេលថ្មីៗនេះ។

លោក Nathapol Luepromchai អនុប្រធានប្រតិបត្តិ និងប្រធានផ្នែកកម្ចីនៃធនាគារ Bank of Ayudhya (BAY) បានប្រាប់កាសែតបាងកកប៉ុស្តិ៍ថា ទាំងកត្តាសកលលោក និងកត្តាក្នុងស្រុក កំពុងធ្វើឲ្យតម្រូវការក្នុងវិស័យអចលនទ្រព្យ និងកម្ចីថ្មីសម្រាប់ទិញផ្ទះធ្លាក់ចុះ។

លោកបានថ្លែងថា កម្ចីថ្មីសម្រាប់ទិញផ្ទះបានកើនឡើង ២ ខ្ទង់ក្នុងឆ្នាំ ២០១៨។

លោក Nathapol បានបន្ថែមថា បទប្បញ្ញត្តិថ្មីស្តីពីអនុបាតកម្ចីធៀបនឹងតម្លៃ (LTV) របស់ធនាគារថៃសម្រាប់កម្ចីទិញផ្ទះ ដែលនឹងចូលជាធរមានក្នុងខែមេសានឹងបង្ក ផលប៉ះពាល់ដល់តម្រូវការ។

លោកបានបន្តថា តម្រូវការយ៉ាងលឿននូវកម្ចីថ្មីសម្រាប់ទិញផ្ទះក្នុងអំឡុងរយៈពេល ២ ខែចុងក្រោយកាលឆ្នាំមុន ដែលត្រូវបានជំរុញដោយសេចក្តីរាយការណ៍របស់ប្រព័ន្ធផ្សព្វផ្សាយស្តីពីការអនុវត្តវិធានការតឹងរ៊ឹងរបស់ធនាគារកណ្តាលថៃ គឺជាបុព្វហេតុមួយទៀតដែលធ្វើឲ្យមានការថយចុះកម្ចីថ្មីសម្រាប់ទិញផ្ទះក្នុងឆ្នាំនេះ។

តម្រូវការខុនដូពីជនបរទេស ជាពិសេសពីអ្នកទិញជនជាតិចិន បានធ្លាក់ចុះក្នុងរយៈពេលពីរបីឆ្នាំចុងក្រោយនេះស្របទៅនឹងកាលៈទេសៈសេដ្ឋកិច្ចសកល និងសេដ្ឋកិច្ចក្នុងប្រទេស ចិន។

លោក Nathapol បានថ្លែងថា វិសោធនកម្មបទប្បញ្ញត្តិរបស់រដ្ឋាភិបាលចិន រារាំងប្រជាជនមិនឲ្យផ្ទេរប្រាក់ច្រើនជាង ៥ ម៉ឺនយន់ ( ប្រហែល ៧ ២០០ ដុល្លារ) ពីប្រទេស ចិនដីគោក ដែលនេះធ្វើឲ្យប៉ះពាល់ដល់ទីផ្សារអចលនទ្រព្យរបស់ប្រទេស ថៃ។

បើទោះបីជាកម្ចីថ្មីសម្រាប់ទិញផ្ទះត្រូវបានរំពឹងថានឹងធ្លាក់ចុះនៅឆ្នាំនេះក្តី ក៏កម្ចីមិនទាន់សងបន្តកើនឡើងដោយសារផលបត្រកម្ចីធំជាងមុន។

ធនាគារ BAY ដែលជាធនាគារធំបំផុតទី៥ ក្នុងប្រទេស ថៃ កំណត់ទិសដៅកំណើន ២ ខ្ទង់ស្តើងសម្រាប់កម្ចីទិញផ្ទះដែលមិនទាន់សងក្នុងឆ្នាំនេះ ខណៈកម្ចីថ្មីសម្រាប់ទិញផ្ទះនឹងនៅស្ថិតស្ថេរ ឬធ្លាក់ចុះ។

ក្នុងឆ្នាំ ២០១៨ កម្ចីទិញផ្ទះមិនទាន់សងរបស់ធនាគារនេះកើនឡើង ១៥,១ ភាគរយ។

លោកស្រី Kattiya Indaravijaya ប្រធានធនាគារ Kasikornbank (KBank) បានប្រាប់កាសែតបាងកកប៉ុស្តិ៍ថា កម្ចីទិញផ្ទះសរុបរបស់ធនាគារ KBank ត្រូវបានរំពឹងថានឹងកើនឡើងពី ៦ ភាគរយ ទៅ ៧ ភាគរយក្នុងឆ្នាំ ២០១៩ ធ្លាក់ចុះពីកំណើនរឹង ១១,៨ ភាគរយកាលពីឆ្នាំមុន។

លោកស្រីបានថ្លែងបន្តថា កំណើនទាបជាងមុននេះកើតមានឡើងដោយសារតម្រូវការខុនដូទាបជាងមុនពីអ្នកទិញជនជាតិចិន។

លោកស្រី Kattiya បន្ថែមថា កំណើនកម្ចីទិញផ្ទះក្នុងវិស័យធនាគារត្រូវបានព្យាករថា មានអត្រា ៥ ភាគរយនៅឆ្នាំនេះ ទាបជាងឆ្នាំមុនដែលមាន ៧ ភាគរយ។

លោកស្រីបានថ្លែងថា តម្រូវការទាបជាងមុនពីអ្នកទិញជនជាតិចិនចូលរួមចំណែកទៅនឹងតម្រូវការកម្ចីទាបជាងមុនក្នុងចំណោមអ្នកទិញខុនដូក្នុងប្រទេស ថៃ ក្នុងចំនួនច្រើនដើម្បីលក់ទៅឲ្យជនជាតិចិន និងអ្នកទិញក្នុងស្រុកដែលទិញខុនដូដើម្បីជួលឲ្យជនជាតិចិន។

លោកស្រី Kattiya បានបន្តថា បទប្បញ្ញត្តិថ្មីស្តីពីកម្ចីទិញផ្ទះរបស់ធនាគារកណ្តាលថៃ ដែលតម្រូវឲ្យបង់ប្រាក់ដំបូងខ្ពស់ជាងមុនសម្រាប់កម្ចីទិញផ្ទះទី២ និងផ្ទះបន្តបន្ទាប់ ក៏នឹងប៉ះពាល់ដល់តម្រូវការផងដែរ។

លោក Predee Daochai ប្រធានសមាគមធនាគារថៃ បានថ្លែងថា តម្រូវការខុនដូទាបជាងមុនពីអតិថិជនជនជាតិចិន នឹងមិនធ្វើឲ្យគុណភាពទ្រព្យសកម្មរបស់ធនាគារធ្លាក់ចុះទេ ដោយសារការគ្រប់គ្រងហានិភ័យខ្លាំងរបស់ធនាគារទាំងនោះ។

លោកថ្លែងថា ជនបរទេសជាធម្មតាប្រើប្រាស់សាច់ប្រាក់សម្រាប់ទិញខុនដូក្នុងទីផ្សារប្រទេស ថៃ។

លោកបានថ្លែងថា សម្រាប់គម្រោងអចលនទ្រព្យនានា ធនាគារជាធម្មតាពង្រីកជម្រើសឥណទានទៅឲ្យក្រុមហ៊ុនអភិវឌ្ឍន៍អចលនទ្រព្យដែលមានហិរញ្ញវត្ថុរឹងមាំ ដែលភាគច្រើននៃក្រុមហ៊ុនទាំងនោះ គឺជាក្រុមហ៊ុនចុះបញ្ជីក្នុងផ្សារហ៊ុនថៃ។

លោកកត់សម្គាល់ថា បទប្បញ្ញត្តិ LTV ថ្មីរបស់ធនាគារកណ្តាលរបស់ប្រទេស ថៃ ក៏ពង្រឹងការគ្រប់គ្រងហានិភ័យ និងជួយគ្រប់គ្រងគុណភាពទ្រព្យសកម្មផងដែរ។

ថ្មីៗនេះ ធនាគារកណ្តាលថៃបានសម្តែងក្តីបារម្ភពីហានិភ័យនៃតម្រូវការខុនដូទាបពីជនបរទេស ជាពិសេសជនជាតិចិន ដោយលើកឡើងពីការធ្លាក់ចុះសេដ្ឋកិច្ចសកល៕ PS

កម្ចីទិញផ្ទះនៅថៃ នឹងធ្លាក់ចុះ ១០% ក្នុងឆ្នាំនេះ

ព័ត៌មានថ្មីៗ

វីដេអូ

កម្ចី​ទិញ​ផ្ទះ​នៅ​​ថៃ ​នឹង​ធ្លាក់​ចុះ ១០% ​ក្នុង​ឆ្នាំ​នេះ

ប៉ុស្តិ៍ អចលនទ្រព្យ

ព័ត៌មានថ្មីៗ

វីដេអូ

កម្ចីទិញផ្ទះនៅថៃ នឹងធ្លាក់ចុះ ១០% ក្នុងឆ្នាំនេះ