ភ្នំពេញៈ កម្ពុជានឹងរៀបចំព្រឹត្តិការណ៍ពិព័រណ៍វិស័យសំណង់កម្ពុជា-អន្តរជាតិ ឆ្នាំ ២០១៩ នៅខែធ្នូខាងមុខ ខណៈអ្នកនៅក្នុងវិស័យនេះអះអាងថានឹងផ្តល់នូវផលវិជ្ជមានជាច្រើនសម្រាប់វិស័យសំណង់នៅកម្ពុជា។
ពិព័រណ៍ឧស្សាហកម្មសំណង់នៅកម្ពុជា អន្តរជាតិលើកទី ៦ នេះនឹងត្រូវរៀបចំឡើងនៅកោះពេជ្រចាប់ពីថ្ងៃទី ៥-៧ ខែធ្នូ ឆ្នាំ ២០១៩ ខាងមុខ។ ព្រឹត្តិការណ៍នេះនឹងមានក្រុមហ៊ុនចូលរួមដូចជា ក្រុមហ៊ុនផលិតសម្ភារសំណង់ ក្រុមហ៊ុនសាងសង់ ក្រុមហ៊ុនអភិវឌ្ឍន៍លំនៅឋាន ក្រុមហ៊ុនរចនាប្លង់ និងវិស័យធនាគារ។
លោក ជីវ ស៊ីវផេង អ្នកគ្រប់គ្រងទូទៅនៃសមាគមអ្នកសាងសង់កម្ពុជាបាននិយាយថា ការរីកចម្រើនដ៏ឆាប់រហ័សនៃវិស័យសំណង់នៅកម្ពុជាបានធ្វើឲ្យចំនួនក្រុមហ៊ុនដែលនឹងចូលរួមក្នុងព្រឹត្តិការណ៍នាពេលខាងមុខកើនឡើងប្រមាណជាង ១០ ភាគរយបើធៀបនឹងឆ្នាំ ២០១៨។ លោកបន្តថា នៅឆ្នាំនេះនឹងមានក្រុមហ៊ុនអន្តរជាតិល្បីៗជាច្រើនចូលរួម ព្រមជាមួយនឹងការតាំងបង្ហាញផលិតផលទំនើបៗ និងមានបច្ចេកវិទ្យាលំដាប់ខ្ពស់ផងដែរ។
លោកថ្លែងថា៖ «ព្រឹត្តិការណ៍នេះនឹងផ្តល់ឲ្យអ្នកចូលរួមនូវគំនិត និងទស្សនៈវិទ្យាសាស្ត្រថ្មីៗទាក់ទងនឹងការប្រើប្រាស់សម្ភារសំណង់ និងបច្ចេកទេសក្នុងការសាងសង់»។
លោកបន្តថា ព្រឹត្តិការណ៍នេះក៏នឹងក្លាយជាឱកាសសម្រាប់ក្រុមហ៊ុនទាំងក្នុងស្រុក និងបរទេសក្នុងការស្វែងរកដៃគូវិនិយោគជាមួយគ្នាផងដែរ។
ទិន្នន័យពីក្រុមហ៊ុនដែលចូលរួមក្នុងព្រឹត្តិការណ៍ឆ្នាំនេះបានកើនឡើងពីចំនួន ១៨៦ ក្រុមហ៊ុនកាលពីឆ្នាំ ២០១៨ ដល់ចំនួន ២០៧ ក្រុមហ៊ុនដែលមកពីប្រទេសជាច្រើនដូចជា ចិន ម៉ាឡេស៊ី ឥណ្ឌូនេស៊ី ថៃ ឥណ្ឌា និងវៀតណាម ជាដើម។ នេះបើតាមលោក ស៊ីវផេង។
ទិន្នន័យពីក្រសួងរៀបចំដែនដី នគរូបនីយកម្ម និងសំណង់បានឲ្យដឹងក្នុងរយៈពេល ១០ ខែឆ្នាំ ២០១៩ ទុនវិនិយោគវិស័យសំណង់នៅកម្ពុជាមានតម្លៃ ៧,៥៨៤ ពាន់លានដុល្លារកើនឡើងចំនួន ៥១,៩៧ ភាគរយ បើធៀបនឹងរយៈពេលដូចគ្នាក្នុងឆ្នាំ ២០១៨ ដែលមានតម្លៃ ៤,៩៩ ពាន់លានដុល្លារ៕LA