ភ្នំពេញៈ កម្ពុជាកំពុងជំរុញការបង្កើតឱកាសវិនិយោគពីសំណាក់វិនិយោគិនជប៉ុនទៅលើការអភិវឌ្ឍនគរូបនីយកម្ម តាមរយៈវេទិកាសាធារណៈឯកជនស្តីពី «ការអភិវឌ្ឍនគរូបនីយកម្មកម្ពុជា-ជប៉ុន» កាលពីថ្ងៃម្សិលមិញ ខណៈរាជរដ្ឋាភិបាលជប៉ុន បានជ្រើសរើសយកកម្ពុជា ជាប្រទេសទី១ នៅក្នុងតំបន់អាស៊ានសម្រាប់វេទិកានេះ។
វេទិកាសាធារណៈ ឯកជនលើកទី១ ស្តីពី «ការអភិវឌ្ឍនគរូបនីយកម្មកម្ពុជា-ជប៉ុន» (The 1st Meeting of Public-Private Platform for Urban Development between Cambodia and Japan) ដែលរៀបចំឡើងនៅសណ្ឋាគារកាំបូឌីយ៉ាណា កាលពីថ្ងៃម្សិលមិញ មានការចូលរួមពីក្រុមហ៊ុនជប៉ុន ចំនួន ៥៨ និងក្រុមហ៊ុនកម្ពុជាចំនួន ១២៣។
លោក ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានអញ្ជើញចូលរួមនៅក្នុងវេទិកានេះបានលើកទឹកចិត្តដល់ធុរជន និងក្រុមហ៊ុនជប៉ុនក្នុងការចូលមកវិនិយោគដោយផ្ទាល់ ឬចាប់ដៃគូជាមួយអ្នកក្នុងស្រុក ក្នុងការបណ្តាក់ទុននៅកម្ពុជា ដោយអាជ្ញាធរកម្ពុជានឹងរង់ចាំផ្តល់កិច្ចសហប្រតិបត្តិការ និងសម្របសម្រួលគ្រប់កាលៈទេសៈ។
លោកបានបន្តថា ការរីកចម្រើនរបស់ប្រទេស កម្ពុជា នាពេលនេះ គឺមានការចូលរួមចំណែកដ៏ធំធេងរបស់រដ្ឋាភិបាល ប្រជាជន និងវិនិយោគិនជប៉ុន។
លោកថ្លែងថា៖ «ខ្ញុំសូមថ្លែងអំណរគុណចំពោះរដ្ឋាភិបាលជប៉ុន ដែលបានសម្រេចជ្រើសរើសយកកម្ពុជាជាប្រទេសទី ១ នៅក្នុងចំណោមប្រទេសអាស៊ានសម្រាប់រៀបចំវេទិកាសាធារណៈឯកជនដំបូងគេ ស្តីពីការអភិវឌ្ឍនគរូបនីយកម្ម ដែលបង្ហាញពីការជឿជាក់របស់អ្នកវិនិយោគជប៉ុនលើសក្តានុពលសេដ្ឋកិច្ចកម្ពុជា។ វេទិកានេះនឹងកាន់តែពង្រឹងបានថែមទៀតនូវសាមគ្គីភាព និងមិត្តភាពនៃប្រជាជាតិយើងទាំង ២»។
លោក YUKI Fumihiko អនុរដ្ឋមន្ត្រីនៃក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ប្រទេស ជប៉ុន បានប្រាប់ថា ស្ថានភាពរបស់នគរូបនីយកម្មនៅកម្ពុជាពេលនេះ គឺប្រហាក់ប្រហែលទៅនឹងប្រទេស ជប៉ុន ពេលចាប់ផ្តើមមានកំណើនសេដ្ឋកិច្ចខ្ពស់។ នៅពេលនោះជប៉ុនជួបប្រទះនឹងបញ្ហាជាច្រើនដូចជា បញ្ហាលំនៅឋាន ការកកស្ទះចរាចរណ៍ និងបញ្ហាបរិស្ថានជាដើម។
លោកបញ្ជាក់ថា៖ «គោលបំណងរបស់ភាគីជប៉ុន គឺធ្វើកិច្ចសហការជាមួយប្រទេស កម្ពុជា ដើម្បីធ្វើយ៉ាងណាកុំឲ្យប្រទេស កម្ពុជា ជួបនឹងរឿងមិនល្អដូចប្រទេស ជប៉ុន នៅពេលចាប់ផ្តើមរីកចម្រើន»។
លោកបានប្រាប់ទៀតថា គោលដៅធំរបស់យើង គឺការបង្កើតទីក្រុងឆ្លាតវៃ (Smart City) ដើម្បីធ្វើឲ្យការរស់នៅរបស់ប្រជាជនខ្មែរកាន់តែមានភាពងាយស្រួល សន្សំសំចៃ និងផ្សារភ្ជាប់ជាមួយធម្មជាតិតាមរយៈការប្រើប្រាស់បច្ចេកវិទ្យាទំនើបៗ (ICT និង AI) ដើម្បីដោះស្រាយបញ្ហានគរូបនីយកម្មដែលកំពុងតែចោទឡើងនាពេលបច្ចុប្បន្ន។
លោកបញ្ជាក់ថា៖ «ទីក្រុងឆ្លាតវៃ នឹងនាំមនុស្សឲ្យឆ្ពោះទៅរកកន្លែងរស់នៅដែលមានភាពងាយស្រួល សម្បូរបែប និងមានផាសុកភាព»។
លោក លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា ដែលតំណាងឲ្យវិស័យឯកជនទាំងអស់នៅកម្ពុជា បាននិយាយថា បច្ចុប្បន្នវិស័យសំណង់ និងហេដ្ឋារចនាសម្ព័ន្ធ គឺជាវិស័យមួយដែលលេចធ្លោ និងមានភាពរីកចម្រើនគួរឲ្យកត់សម្គាល់ក្នុងចំណោមវិស័យអាទិភាពទាំង ៤ ដែលទ្រទ្រង់ដល់កំណើនសេដ្ឋកិច្ចកម្ពុជា រួមមាន វិស័យកសិកម្ម វាយនភណ្ឌ ទេសចរណ៍ និងហិរញ្ញវត្ថុ។
លោកបន្តថា វិនិយោគិនជប៉ុន បានរួមចំណែកយ៉ាងច្រើនក្នុងការជួយជំរុញឲ្យវិស័យសំណង់នៅកម្ពុជារីកចម្រើន។ អ្នកវិនិយោគជប៉ុន នៅលេខរៀងទី៣ សម្រាប់ការវិនិយោគវិស័យសំណង់នៅកម្ពុជា ចាប់ពីឆ្នាំ ២០០០ ដល់ឆ្នាំ ២០១៨។
លោកថ្លែងថា៖ «ប្រទេស កម្ពុជា នៅមានឱកាសច្រើនសម្រាប់ការវិនិយោគ ពិសេសវិស័យសំណង់ និងហេដ្ឋារចនាសម្ព័ន្ធ ហើយក៏អាចជួយឲ្យវិនិយោគិនបានប្រាក់ចំណេញខ្ពស់ផងដែរ»។
លោក អ៊ូក ឆេងលី ប្រធានគ្រប់គ្រងទូទៅក្រុមហ៊ុនអចលនទ្រព្យ Century 21 Fuji Realty ដែលមានអតិថិជនភាគច្រើនជាជនជាតិជប៉ុន បានប្រាប់ថា ចំនួនអ្នកវិនិយោគជប៉ុនដែលចូលមកកម្ពុជា បានកើនឡើងជាបន្តបន្ទាប់។ ជប៉ុន គឺជាអ្នកវិនិយោគដែលមាន ភាពប្រាកដប្រជា ដូច្នេះការទទួលបានទំនុកចិត្ត គឺជារឿងសំខាន់បំផុត។
លោកអះអាងថា៖ «វេទិកានេះ គឺពិតជាមានសារៈសំខាន់ណាស់ ព្រោះវានឹងអាចជួយធ្វើឲ្យចំនួនអ្នកវិនិយោគជប៉ុនចូលមកកម្ពុជាបានកាន់តែច្រើនបន្ថែមទៀត»។
ទោះបីជាយ៉ាងណា លោក ឆេងលី បញ្ជាក់ថា មុនពេលចូលទៅវិនិយោគនៅប្រទេសណាមួយ ជប៉ុនអាចមានដំណើរយឺតជាងគេ តែបើពួកគាត់ទៅប្រទេសណាមួយទាល់តែប្រទេសនោះមានភាពច្បាស់លាស់ណាស់។
បើតាម លោក ជា សុផារ៉ា កាលពីឆ្នាំ ២០១៨ កម្ពុជាទទួលបានភ្ញៀវទេសចរបរទេសចំនួន ៦,២ លាននាក់ ក្នុងនោះជនជាតិជប៉ុនឈរនៅលំដាប់លេខ ៧ ដោយមានជាង ២១ ម៉ឺននាក់ កើនឡើង ៣,៥ ភាគរយ ធៀបនឹងឆ្នាំ ២០១៧។
ក្រុមហ៊ុនធំៗរបស់ជប៉ុន កំពុងបោះទុនវិនិយោគស្ទើរគ្រប់វិស័យនៅកម្ពុជា មានដូចជា វិស័យអេឡិចត្រូនិក វាយនភណ្ឌ ផ្សារទំនើប សំណង់ កសិកម្ម សណ្ឋាគារ និងទេសចរណ៍។ ជាងនេះទៀត បច្ចុប្បន្នមានក្រុមហ៊ុនជប៉ុនប្រមាណ ៨៦ កំពុងប្រតិបត្តិការនៅតាមបណ្តាតំបន់សេដ្ឋកិច្ចពិសេសនានា ដោយបង្កើតការងារបានជាង ២ ម៉ឺននាក់ និងមានទុនវិនិយោគជាង ៤២៥ លានដុល្លារ៕ LA