សិង្ហបុរីៈ ការជួលទីតាំងសម្រាប់លក់រាយនៅសិង្ហបុរី ត្រូវគេរំពឹងថា ធ្លាក់ចុះយ៉ាងខ្លាំងក្នុងឆមាសទី ២ ឆ្នាំនេះ ចំពេលទីតាំងទំនេរកាន់តែច្រើនឡើងពីការធ្លាក់ចុះដោយសារការរីករាលដាលនៃជំងឺកូវីដ ១៩។ នេះបើយោងតាមរបាយការណ៍ដោយក្រុមហ៊ុនប្រឹក្សាអចលនទ្រព្យ Cushman & Wakefield (C&W) ដែលបានចេញផ្សាយសប្តាហ៍មុន។
របាយការណ៍នោះឲ្យដឹងថា ទោះបីជាអាជីវកម្មលក់រាយភាគច្រើននៅទីនេះបើកដំណើរការឡើងវិញពីថ្ងៃ ១៩ ខែមិថុនាក្រោយសម្រាករយៈពេល ២ ខែ វិធានការគម្លាតសង្គមនៅតែបន្តធរមាន។ រឿងនេះបានធ្វើឲ្យម្ចាស់អាជីវកម្មជាច្រើនដូចជាផ្នែកម្ហូបអាហារ និងភេសជ្ជៈ ផ្នែកសុខភាព និងកន្លែងហាត់ប្រាណ មិនអាចដំណើរការពេញសមត្ថភាពដែលបណ្តាលឲ្យអាជីវកម្មជាច្រើនបិទទ្វារ។
ជាលទ្ធផលទីតាំងទំនេរក្នុងតំបន់មិនសូវសំខាន់មួយចំនួនត្រូវគេរំពឹងថានឹងកើនឡើងក្នុងឆមាសទី ២ ឆ្នាំនេះ។
អ្នកស្រី Christine Li ប្រធានក្រុមអ្នកស្រាវជ្រាវនៃក្រុមហ៊ុន C&W ប្រចាំប្រទេសសិង្ហបុរី និង អាស៊ីខាងកើតបានបញ្ជាក់ថា៖ «ទីផ្សារលក់រាយទាំងមូលប្រហែលជួបប្រទះការធ្លាក់ចុះការជួលកាន់តែច្រើនក្នុងឆមាសទី ១ ឆ្នាំ ២០២០ ដោយសារភាពទំនេរដែលត្រូវគេរំពឹងខ្ពស់ អ្នកដំណើរកាន់តែតិច វិធានការគម្លាតសង្គម និងភាពមិនប្រាកដប្រជាផ្នែកសេដ្ឋកិច្ច ដោយសារកូវីដ១៩។
អ្នកស្រីនិយាយថា៖ «ថ្មីៗនេះម្ចាស់អគារជាច្រើននៅតែបន្តបិទទ្វារ ទាមទារតម្លៃជួលដូចពេលមុនកូវីដ ប៉ុន្តែពេលដែលទីតាំងទំនេរកាន់តែកើនឡើង ម្ចាស់អគារត្រូវគេរំពឹងថានឹងមានភាពបត់បែនច្រើនជាងមុន»។
ក្រុមហ៊ុននេះបាននិយាយថា ថ្លៃជួលទីតាំងលក់រាយទីតាំងល្អបានធ្លាក់ចុះយ៉ាងគំហុកនៅត្រីមាសទី ២ តាំងពី ៣ ខែមុនដែលនាំឱ្យការជួលនៅតំបន់ទីក្រុងធ្លាក់ចុះ ៣,៥ ភាគរយដល់ថ្លៃ ២០,៨៨ ដុល្លារក្នុង ១ ម៉ែត្រការ៉េក្នុង ១ ខែ។ ការជួលនៅទីតាំងសំខាន់វិញបានធ្លាក់ចុះ ១,៥ ភាគរយដូចនៅ Orchard (៣៤,៧៣ ដុល្លារក្នុង ១ ម៉ែត្រការ៉េ) និង ០,៩ ភាគរយនៅជាយក្រុង (៣១,៥៦ ដុល្លារក្នុង ១ ម៉ែត្រការ៉េ)។
សម្រាប់រយៈពេលពេញ ១ ឆ្នាំនេះ C&W រំពឹងថាទីតាំងជួលល្អៗនៅតំបន់ Orchard និងទីក្រុងដទៃទៀតធ្លាក់ចុះប្រហែល ១០ ភាគរយ ខណៈដែលទីតាំងជួលតំបន់លំដាប់ទី ២ ប្រហែលពើបប្រទះការធ្លាក់ចុះតិចជាង ៥ ភាគរយ។
C&W បាននិយាយថា ទីធ្លាទំនេរបន្ថែមទៀតនៅក្នុងទីតាំងមិនសំខាន់ត្រូវបានគេរំពឹងថានឹងចូលមកក្នុងទីផ្សារនៅឆមាសទី ២ នៃឆ្នាំ ២០២០ ខណៈដែលអ្នកជួលធ្វើប្រកបអាជីវកម្មជាធម្មតាស្ថិតនៅក្នុងកន្លែងមិនសំខាន់នៅក្នុងផ្សារពីព្រោះលក្ខខណ្ឌតម្រូវធំជាងនេះ។
លោក Mark Lampard នាយកប្រតិបត្តិនៃអ្នកតំណាងនៃអ្នកជួលប្រចាំតំបន់នៃក្រុមហ៊ុន C&W និយាយថា៖ «មានឱកាសខ្លះសម្រាប់អ្នកលក់រាយក្នុងការស្វែងរកកន្លែងលក់រាយសំខាន់ៗក្នុងអំឡុងពេលនេះ ដោយសារកន្លែងទំនេរកើនឡើង បើមិនដូច្នេះទេ ពួកគេក៏អាចស្វែងរកជម្រើសសំខាន់ៗនៅជាយក្រុងសម្រាប់ស្ថិរភាពបន្ថែមទៀត៕ Straitstime-ANN/RR