.jpg)
អគារ Vattanac Tower ដែលជាអគារការិយាល័យជួលកម្រិត A។ ហុង មិនា
ភ្នំពេញៈ ទំហំនៃការជួលទីតាំងអគារការិយាល័យនៅក្នុងរាជធានីភ្នំពេញក្នុងត្រីមាសទី ២ ឆ្នាំ ២០១៨ បានកើនឡើងក្នុងអត្រាទាប បើធៀបទៅនឹងត្រីមាសទី ១ ខណៈអ្នកជំនាញលើកឡើងថា កំណើននេះបានឈានដល់កម្រិតជិតឆ្អែតហើយ។
របាយការណ៍ដែលភ្នំពេញ ប៉ុស្តិ៍ ទើបទទួលបានបង្ហាញថា ទំហំនៃការជួលទីតាំងការិយាល័យគិតត្រឹមដំណាច់ត្រីមាសទី ២ បានកើនដល់ប្រមាណជាង ២៩៣ ០០០ ម៉ែត្រការ៉េ ខណៈកាលពីត្រីមាសទី ១ ឆ្នាំ ២០១៨ មានប្រមាណជាង ២៧៧ ០០០ ម៉ែត្រការ៉េដោយកើនឡើង ៥ ភាគរយ។
របាយការណ៍របស់ក្រុមហ៊ុនអចលនទ្រព្យ CBRE Cambodia បានបង្ហាញថា គិតមកដល់ត្រីមាសទី ២ ឆ្នាំនេះទំហំអគារការិយាល័យសរុបមានជាង ៣៣៥ ០០០ ម៉ែត្រការ៉េក្នុងនោះការជួលការិយាល័យកម្រិត A មានអត្រា ៦៧ ភាគរយ កម្រិត B មាន ៩៣ ភាគរយ និងកម្រិត C មានចំនួន ៩២ ភាគរយ។
ទោះបីយ៉ាងនេះក្តីក្នុងត្រីមាសទី ២ មិនមានអគារការិយាល័យថ្មីត្រូវបានដាក់ជួលនោះទេ ខណៈកាលពីត្រីមាសទី ១ មានអគារការិយាល័យថ្មី ទំហំ ១៤ ៣៥០ ម៉ែត្រការ៉េត្រូវបានដាក់ចូលក្នុងទីផ្សារ។
លោកស្រី អាន សុធីតា នាយិកាក្រុមហ៊ុនអចលនទ្រព្យ CBRE Cambodia កាលពីថ្ងៃម្សិលមិញបានឲ្យដឹងថា កំណើនតិចតួចនេះដោយសារទីផ្សារអគារការិយាល័យជួលនៅពេលនេះក៏កំពុងឈានទៅរកភាពឆ្អែត។
លោកស្រី សុធីតា មានប្រសាសន៍ថា៖ «ការកើនឡើងនេះដោយសារតែកំណើនក្រុមហ៊ុនក្នុងស្រុកកំណើនវិនិយោគផ្ទាល់ពីបរទេស និងការផ្លាស់ប្តូរឥរិយាបថរបស់បុគ្គលពីជួលផ្ទះ ឬវីឡាទៅជួលអគារការិយាល័យ»។
បច្ចុប្បន្ននៅក្នុងរាជធានីភ្នំពេញមានអគារការិយាល័យកម្រិត A ចំនួន ១៦ ភាគរយ កម្រិត B ២០ ភាគរយ និងកម្រិត C ៦៤ ភាគរយ។ នេះបើយោងតាមលោកស្រី អាន សុធីតា។
ការិយាល័យកម្រិត A មានតម្លៃជួលចន្លោះពី ២៨ ទៅ ៣៨ ដុល្លារក្នុង ១ ម៉ែត្រការ៉េ ការិយាល័យកម្រិត B តម្លៃពី ១៨ ទៅ ២៨ ដុល្លារ និងកម្រិត C តម្លៃពី ១០ ទៅ ១៨ ដុល្លារ។ តម្លៃនេះមិនមានការប្រែប្រួលនោះទេបើធៀបនឹងរយៈពេលជាង ៣ ឆ្នាំមកនេះ។
លោក ណុប យឿន ប្រធានគ្រប់គ្រងអគារការិយាល័យជួល City Tower ដែលផ្គត់ផ្គង់ការិយាល័យកម្រិត B បានឲ្យដឹងថា បច្ចុប្បន្ន City Tower បានជួលទីតាំងការិយាល័យបាន ៥០ ភាគរយហើយក្នុងទំហំសរុប ៥ ០០០ ម៉ែត្រការ៉េ ដោយមិនមានការជួលថ្មីទេនៅត្រីមាសទី ២ នេះ។ លោកថ្លែងថា៖ «ខ្ញុំគិតថា អត្រាប្រើប្រាស់អគារការិយាល័យរបស់ខ្ញុំនឹងមិនកើនច្រើនទៀតទេក្នុងឆ្នាំនេះ ព្រោះបច្ចុប្បន្នមានការិយាល័យជាច្រើនកំពុងដាក់ជួលលើទីផ្សារ»។
យោងតាម CBRE Cambodia នៅដំណាច់ឆ្នាំ ២០១៨ គេរំពឹងថានឹងមានអគារការិយាល័យថ្មីចំនួន ៥ ទៀតដាក់ចូលក្នុងទីផ្សារ ដែលនឹងធ្វើឲ្យទំហំអគារការិយាល័យសរុបនឹងកើនដល់ជិត ៤០០ ០០០ ម៉ែត្រការ៉េ។ ទាក់ទងនឹងកំណើននេះលោកស្រី សុធីតា បានបញ្ជាក់ថាអត្រានៃការជួលទីតាំងអគារការិយាល័យអាចនឹងធ្លាក់ចុះវិញនៅឆ្នាំ ២០១៩។
របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ដែលបានផ្សព្វផ្សាយកាលពីពេលថ្មីៗនេះបានបង្ហាញថា ក្នុងរយៈពេល ៦ ខែ ឆ្នាំ ២០១៨ សមត្ថកិច្ចក្រសួង និងរាជធានី ខេត្ត បានផ្ដល់លិខិតអនុញ្ញាតសាងសង់បានចំនួន ១ ៦៤៣ គម្រោងលើផ្ទៃក្រឡាសំណង់សរុប ៥,៣៥ លានម៉ែត្រការ៉េ និងមានតម្លៃប៉ាន់ស្មានប្រមាណ ២,១៥ ពាន់លានដុល្លារអាមេរិក៕
