ភ្នំពេញៈ កម្ពុជាបាននាំចូលគ្រឿងសំណង់មានតម្លៃសរុបជាង ៣១៧ លានដុល្លារកាលពីត្រីមាសទី ១ ឆ្នាំ ២០២០ ដែលក្នុងនោះសម្ភារសំណង់ទូទៅ មានតម្លៃរហូតដល់ជាង ២២៦ លានដុល្លារ។ នេះបើតាមទិន្នន័យពីក្រសួងពាណិជ្ជកម្ម។
ទិន្នន័យពីក្រសួងពាណិជ្ជកម្មដែលភ្នំពេញប៉ុស្តិ៍ទើបទទួលបានបង្ហាញថា ចាប់ពីខែមករាដល់ខែ មីនា ឆ្នាំ ២០២០ កម្ពុជានាំចូលគ្រឿងសំណង់ពីបរទេសមានតម្លៃសរុប ៣១៧, ៧៤ លានដុល្លារ ស្មើនឹងបរិមាណ ៨៧៩ ៣៩៤ តោនក្នុងនោះសម្ភារសំណង់ទូទៅមានតម្លៃ ២២៦,៣៣ លានដុល្លារ ក្នុងបរិមាណ ៣៩៤ ៣៤៥ តោន ដែកមានតម្លៃ ៦៦,៨២ លានដុល្លារ ក្នុងបរិមាណចំនួន ១០០ ៤៤០ តោន និងស៊ីម៉ងត៍មានតម្លៃ ២៤,៥៧៣ លានដុល្លារ និងមានបរិមាណ ៣៨៣ ៦០៣ តោន។
គ្រឿងសំណង់ដែលនាំចូលមកកម្ពុជា ភាគច្រើនមកពីប្រទេសចិនថៃ វៀតណាម ម៉ាឡេស៊ី អ៊ីតាលី និងអាល្លឺម៉ង់ជាដើម។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានប្រាប់ភ្នំពេញប៉ុស្តិ៍ កាលពីថ្ងៃពុធថា ការសាងសង់នៅកម្ពុជាក្នុងត្រីមាសទី ១ មានភាពល្អប្រសើរនាពេលដំបូង ប៉ុន្តែវាបានធ្លាក់ល្បឿនខ្លះនៅចុងត្រីមាស ដោយសារតែការរីករាលដាលនៃជំងឺកូវីដ១៩ ដែលធ្វើឲ្យការដ្ឋានមួយចំនួនត្រូវបន្ថយល្បឿនសាងសង់ និងមានមួយចំនួនទៀតឈានដល់ការផ្អាកទៀតផង។
លោកបន្តថា បើនិយាយពីត្រីមាសទី ១ គឺអ្វីៗមានភាពល្អប្រសើរទាំងអស់ ហេតុនេះតម្រូវការគ្រឿងសំណង់ក៏មានបរិមាណច្រើនដែរ។
ទោះជាយ៉ាងណាលោកអះអាងថា៖ «ចាប់ពីដើមខែមករារហូតដល់ពាក់កណ្តាលខែមីនា សកម្មភាព និងតម្រូវការប្រើប្រាស់គ្រឿងសំណង់គឺមានភាពធម្មតា តែវាបានធ្លាក់ចុះយ៉ាងច្រើនចាប់ពីដើមខែមេសាមក»។
លោកលើកឡើងទៀតថា បច្ចុប្បន្នមិនត្រឹមតែវិស័យសាងសង់ទេដែលធ្លាក់ចុះ សូម្បីតែទីផ្សារអចលនទ្រព្យក៏ស្ងប់ស្ងាត់ដែរ។ លោកបានថ្លែងថា៖ «សម្រាប់ត្រីមាសទី ២ នេះ ខ្ញុំគិតថានឹងមានការធ្លាក់ចុះគ្រប់វិស័យដោយមិនមែនតែវិស័យសំណង់នោះទេ»។
លោក ជីវ ស៊ីវផេង អ្នកគ្រប់គ្រងទូទៅនៃសមាគមអ្នកសាងសង់កម្ពុជាកាលពីចុងសប្តាហ៍មុនបានប្រាប់ភ្នំពេញប៉ុស្តិ៍ថា ការសាងសង់នៅកម្ពុជាមិនបានធ្លាក់ចុះទេក្នុងត្រីមាសទី ១ ឆ្នាំ ២០២០ ដោយតាមទិន្នន័យក្រសួងរៀបចំដែនដី នគរូបនីយកម្ម និងសំណង់ទុនវិនិយោគដែលក្រសួងផ្តល់ច្បាប់សាងសង់បានកើនឡើងជាង ៥០ ភាគរយ។
លោកបានបន្តទៀតថា ខណៈជំងឺកូវីដ ១៩ មិនទាន់មានការរីករាលដាលខ្លាំង សម្ទុះការសាងសង់គឺមានភាពល្អប្រសើរក្នុងត្រីមាសទី ១ កន្លងមក។
លោកថ្លែងថា៖ «ក្នុងត្រីមាសទី ១ ទំហំទុនវិនិយោគវិស័យសំណង់ដែលក្រសួងដែនដី អនុម័តមានកំណើនជាង ៥១ ភាគរយធៀបនឹងរយៈពេលដូចគ្នាកាលពីឆ្នាំ ២០១៩»។
ខណៈបច្ចុប្បន្នគេសង្កេតឃើញមានការដ្ឋានសាងសង់មួយចំនួនមិនមានសកម្មភាពមមាញឹកដូចត្រីមាសទី ១ លោក ស៊ីវ ផេង អះអាងថា កូវីដ១៩ កំពុងធ្វើឲ្យមានផលប៉ះពាល់ទៅដល់វិស័យសំណង់នៅកម្ពុជាក្នុងត្រីមាសទី ២ នេះ។
លោក យស មុនីរ៉ាត់ អ្នកនាំពាក្យក្រសួងរ៉ែ និងថាមពលក្នុងសន្និសីទសារព័ត៌មានកាលពីសប្តាហ៍មុនបាននិយាយថា បច្ចុប្បន្នកម្ពុជាមានរោងចក្រផលិតស៊ីម៉ងត៍ចំនួន ៥ ដែលមានសមត្ថភាពអាចផលិតស៊ីម៉ងត៍បានដល់ជាង ៨ លានតោនក្នុង ១ ឆ្នាំ។
លោកថ្លែងថា៖ «បច្ចុប្បន្នកម្ពុជាមានលទ្ធភាពផលិតស៊ីម៉ងត៍ដោយខ្លួនឯង សម្រាប់ផ្គត់ផ្គង់ក្នុងស្រុកបានដោយមិនចាំបាច់យកពីប្រទេសក្រៅដូចមុនទៀតទេ»។ ឥឡូវយើងមានរោងចក្រ ផលិតស៊ីម៉ងត៍បម្រើសេចក្តីត្រូវការគ្រប់គ្រាន់ពោលគឺមិនចាំបាច់យកថវិកាទៅចំណាយលើស៊ីម៉ងត៍ទេ»។
យោងតាមក្រសួងពាណិជ្ជកម្មកាលពីឆ្នាំ ២០១៩ កម្ពុជាបាននាំចូលគ្រឿងសំណង់មានតម្លៃសរុប ១ ៦៩៦,៣១ លានដុល្លារ កើនឡើង ៥៨,៩៧ ភាគរយ បើធៀបនឹងឆ្នាំ ២០១៨ ដែលមានតម្លៃត្រឹម ១ ០៦៧,០៤ លានដុល្លារ។ ចំណែកបរិមាណនៃការនាំចូលគឺមានកំណើន ៤៦,៧១ ភាគរយ ពីចំនួន ៣ ១៨១ ១៤១ តោន ទៅដល់ចំនួន ៤ ៦៦៧ ៥៥០ តោន៕ LA