The Phnom Penh Post Search

Search form




Logo of Phnom Penh Post newspaper Phnom Penh Post - ការបាក់រលំ​អគារ​ធំៗ​ ២ ជា​ការដាស់តឿន​ដល់​ក្រុមហ៊ុន​អភិវឌ្ឍន៍

ការបាក់រលំ​អគារ​ធំៗ​ ២ ជា​ការដាស់តឿន​ដល់​ក្រុមហ៊ុន​អភិវឌ្ឍន៍

Content image - Phnom Penh Post
គំនរ​អគារ​ដែល​បាន​បាក់រ​លំនៅ​ខេត្ត​កែប​កាលពី​ថ្ងៃទី​ ៣ ខែ​មករា​នេះ​។ ហេង ជីវ័ន

ការបាក់រលំ​អគារ​ធំៗ​ ២ ជា​ការដាស់តឿន​ដល់​ក្រុមហ៊ុន​អភិវឌ្ឍន៍

ភ្នំពេញៈ ការរលំ​បាក់​អគារ​ចំនួន​ ២ ​នៅ​ខេត្ត​ជាប់​ឆ្នេរសមុទ្រ​របស់​កម្ពុជា​គឺ​ខេត្ត​កែប និង​ខេត្ត​ព្រះសីហនុ ជាការ​ដាស់តឿន​មួយ​ដល់​ក្រុមហ៊ុន​អភិវឌ្ឍន៍​អចលនទ្រព្យ​ឲ្យ​ប្រុងប្រយ័ត្ន​បន្ថែមទៀត​សម្រាប់​គម្រោង​របស់ខ្លួន ដោយ​យកចិត្ត​ទុកដាក់​បន្ថែម​លើ​ស្ដង់ដា​ខ្ពស់ ដើម្បី​ទទួល​បាន​ទំនុកចិត្ត​ពី​សាធារណជន និង​ការជឿជាក់​របស់​អ្នកទិញ​។

កាលពី​ថ្ងៃទី​ ៣ ​ខែ​មករា អគារ​កម្ពស់​ ៦ ​ជាន់​នៅក្នុង​ខេត្ត​កែប​បាន​បាក់រលំ ដែល​បណ្ដាល​ឲ្យ​មាន​អ្នកស្លាប់ ៣៦ ​នាក់ រងរបួស ២៣ ​នាក់​ផ្សេងទៀត ​ដែល​គ្រាន់តែ​រយៈពេល​ប្រហែល ៧ ខែ បន្ទាប់ពី​អគារ​កម្ពស់​ ៧ ​ជាន់​ បាន​បាក់​រលំ​កាលពី​ខែ​មិថុនា​ឆ្នាំ​មុន ​នៅ​ខេត្ត​ព្រះសីហនុ ដែល​សម្លាប់​មនុស្ស ២៨ ​នាក់ និង​បណ្ដាល​ឲ្យ​រងរបួស​ ២៦ នាក់​ផ្សេងទៀត​។

លោក ច្រឹក សុខនីម ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា (CVEA) និង​ជា​អគ្គនាយក​ក្រុមហ៊ុន Century 21 Mekong ដែល​កំពុង​អភិវឌ្ឍ​គម្រោង Luxury Holiday Villas លើ​ផ្ទៃដី​ទំហំ ៩៧ ហិកតា​នៅ​ខេត្តកំពត​បាន​ប្រាប់​ភ្នំពេញ​ប៉ុស្ដិ៍​កាលពី​ម្សិលមិញ​ថា ការបាក់​រលំ​អគារ​ ២ ​នៅ​ក្រុងព្រះសីហនុ និង​ខេត្ត​កែប​គឺជា​មេរៀន​មួយ​សម្រាប់​ក្រុមហ៊ុន​អភិវឌ្ឍន៍​ទាំងអស់ និង​អ្នកទិញ ដើម្បី​ធ្វើឲ្យ​ប្រាកដ​ថា គម្រោង​សាងសង់​ទាំងអស់​ត្រូវតែមាន​ស្ដង់ដា​ខ្ពស់ និង​បង្ការ​ហានិភ័យ​បានល្អ ដើម្បី​ចៀសផុត​គ្រោះថ្នាក់​ណាមួយ​នៅពេល​អនាគត​។

លោក​ថ្លែងថា​៖ «​មាន​តម្រូវការ​ឲ្យ​មាន​ការសហការ​រួមគ្នា​ក្នុង​ចំណោម​ភាគី​ពាក់ព័ន្ធ ដូចជា​ក្រុមហ៊ុន​អភិវឌ្ឍន៍ ក្រុមហ៊ុន​សាងសង់ អាជ្ញាធរ​មូលដ្ឋាន​ពាក់ព័ន្ធ ដើម្បី​ប្រាកដ​ថា គម្រោង​ទាំងអស់​ត្រូវតែ​មានការ​អនុញ្ញាត​ការសាងសង់​មាន​ឈ្មោះ​ក្រុមហ៊ុន​សាងសង់ និង​ភ្នាក់ងារ​អចលនទ្រព្យ​ដែល​គ្រប់គ្រង​ការលក់​គម្រោង​»​។

លោក​បន្តថា​៖ «​ជាមួយ​គ្នា​នេះដែរ​សម្រាប់​អ្នកទិញ​ត្រូវតែ​ប្រាកដ​ថា ពួកគេ​ទទួល​បាន​ព័ត៌មាន​ទាំងអស់​របស់​គម្រោង​មុនពេល​សម្រេចចិត្ត​»​។

ប៉ុន្តែ​លោក សុខនីម មិនបាន​លើកឡើង​នូវ​ក្តីបារម្ភ​នោះទេ​ថា ការបាក់​រលំ​អគារ​ទាំងនេះ​នឹង​បង្ក​ផលប៉ះពាល់​អវិជ្ជមាន​ដល់​ឧស្សាហកម្ម​ទាំងមូល​។ លោក​បន្តថា​៖ «​ខ្ញុំ​មិន​គិតថា ការណ៍​នេះ​នឹង​បង្កើត​ឲ្យ​មាន​រូបភាព​មិនល្អ​សម្រាប់​ឧស្សាហកម្ម​ទាំងមូល​ឡើយ​។ ប៉ុន្តែ​វា​ផ្ដល់​ការដាស់តឿន​មួយ​ឲ្យ​ក្រុមហ៊ុន​អភិវឌ្ឍន៍​គោរព​តាមច្បាប់ និង​ជា​ការជូន​ព័ត៌មាន​ដល់​សាធារណជន​។ ការណ៍​នេះ​គឺជា​ចំណុច​ដ៏ល្អ​ក្នុង​ការបង្កើន​ទំនុកចិត្ត​ក្នុង​ចំណោម​សាធារណជន​ផងដែរ​»​។

Content image - Phnom Penh Post
ទិដ្ឋភាព​ទីក្រុង​ភ្នំពេញ​នាពេល​បច្ចុប្បន្ន​មើល​ពី​ទី​ខ្ពស់​។ ហេង ជីវ័ន

បុគ្គលិក​ម្នាក់​របស់​គម្រោង​វិនិយោគ New Landmark ដែល​ជា​គម្រោង​សណ្ឋាគារ​កន្លែង​កម្សាន្ត និង​ខុនដូ​ដែល​វិនិយោគ​ដោយ​ក្រុមហ៊ុន Prince Real Estate Group ដែលជា​ក្រុមហ៊ុន​ពហុផលិតផល​អចលនទ្រព្យ​ចិន និង​មាន​ទីតាំង​នៅ​តាម​បណ្ដោយ​ឆ្នេរ​ជ័យជម្នះ​បាន​ប្រាប់​ភ្នំពេញ​ប៉ុស្ដិ៍​ថា គម្រោង​នេះ​មិន​មើលឃើញ​ផលប៉ះពាល់​ណាមួយ​ដោយសារ​តែ​ការរលំ​អគារ​កម្ពស់​ ៧ ជាន់​កាលពី​ខែ​មិថុនា​ឆ្នាំមុន​ឡើយ ខណៈ​ដែល​ការលក់​នៅតែ​កំពុង​បន្ត​ទៅ​មុខ ហើយ​ការសាងសង់​នឹងត្រូវ​បញ្ចប់​ត្រឹម​ឆ្នាំ​ ២០២៣​។

បុគ្គលិក​ដែល​ស្នើសុំ​មិន​បញ្ចេញ​ឈ្មោះ​បាន​ឲ្យ​ដឹងថា​៖ «​គម្រោង​របស់​យើង បន្ត​ការរីកចម្រើន​ល្អ ហើយ​យើង​នឹង​ទទួលបាន​អ្នកទិញ​យូនីត​របស់​គម្រោង ដោយសារ​តែ​យើង​មាន​ក្រុមហ៊ុន​សាងសង់​ល្បីឈ្មោះ ដែល​មាន​បទពិសោធ​នៅក្នុង​ប្រទេស​ជាច្រើន​ដូចជា​មកពី​ប្រទេស​អូស្ដ្រាលី និង​ទីក្រុង​ឡុងដ៍​ដែល​បង្កើន​ទំនុកចិត្ត​ដល់​អ្នកទិញ​»​។

គម្រោង New Landmark ដែល​បាន​ចាប់ផ្ដើម​បើក​ការដ្ឋាន​សាងសង់​ចាប់តាំងពី​ពាក់កណ្ដាល​ខែមិថុនា ឆ្នាំ​មុន​ត្រូវ​បាន​សាងសង់​ដោយ​ក្រុមហ៊ុន​ល្បីឈ្មោះ China Construction Fourth Engineering Division (Cambodia) Corp​។

ក្រុមហ៊ុន​អភិវឌ្ឍន៍​អចលនទ្រព្យ The Flora ដែលជា​ក្រុមហ៊ុន​អចលនទ្រព្យ​ក្នុងស្រុក​កំពុង​ចាប់ផ្តើម​គម្រោង​ខុនដូ​ប្រណីត​មួយ​ឈ្មោះថា The Flora Suites ដែលមាន​កម្ពស់ ៣៨ ជាន់​នៅ​សង្កាត់​បឹង​កេងកង​ ១ ខណ្ឌ​បឹងកេងកង ភ្នំពេញ​។

លោក លឹម កុកឡុង ប្រធាន និង​ជា​អគ្គនាយក​ក្រុមហ៊ុន The Flora បាន​ឲ្យ​ដឹងថា អគារ The Flora Suites នឹង​សាងសង់​ជាមួយ​ភាពទំនើប ការរចនា​ស្ទីល​តាម​បែប​ប្រទេស​លោក​ខាងលិច ហើយ​នឹង​ត្រូវការ​រយៈពេល​ប្រហែល​ ៣ ​ឆ្នាំ​ដើម្បី​បញ្ចប់​។ អគារ​នេះ​នឹងត្រូវ​សាងសង់​នៅ​ផ្ទៃដី​ទំហំ ២០ ៧៨៦ ម៉ែត្រការ៉េ ហើយ​នឹង​មាន ១៩៨ ​យូនីត​។ ប៉ុន្តែ​លោក​មិនបាន​បង្ហាញ​ការវិនិយោគ​សរុប​សម្រាប់​គម្រោង​នេះ​ទេ​។

លោក សាំង សុភ័ក្ដរ៉ាឌី ជំនួយការ​អនុប្រធាន​របស់​ក្រុមហ៊ុន The Flora បាន​ប្រាប់​ភ្នំពេញ​ប៉ុស្ដិ៍​ថា ក្រុមហ៊ុន​នឹង​ចាប់ផ្ដើម​ការសាងសង់​អគារ​កម្ពស់ ៣៨ ជាន់​នេះ​គ្រោង​នឹង​ចាប់ផ្ដើម​នៅ​ពាក់កណ្ដាល​ឆ្នាំនេះ​។

លោក​ថ្លែងថា​៖ «​ការសាងសង់​របស់​យើង​ត្រូវតែ​គោរព​តាម​ស្ដង់ដា ហើយ​យើង​ទទួល​បាន​ការអនុញ្ញាត​ពី​ក្រសួង​ដែនដី​។ ជាមួយ​គ្នា​នេះ​ដែរ យើង​ក៏​ទិញ​ធានារ៉ាប់រង​ផងដែរ ដើម្បី​ធានា​ឲ្យ​ប្រាកដ​ថា អ្នកទិញ​មាន​អារម្មណ៍​ទុកចិត្ត​ជាមួយ​គម្រោង​នេះ ប្រសិន​បើ​មាន​អ្វីមួយ​កើតឡើង​»​។

អង្គការ​អន្តរជាតិ​ខាង​ការងារ (ILO) ​កាលពី​ថ្ងៃ​អង្គារ​បាន​អំពាវនាវ​ឲ្យ​រដ្ឋាភិបាល​យកចិត្ត​ទុកដាក់​កាន់តែ​ខ្លាំង​ដល់​ហានិភ័យ​ដែល​កម្មករ​រាប់ពាន់​នាក់​ប្រឈម​រាល់ថ្ងៃ និង​ទាមទារ​ឲ្យ​មាន​វិធានការ​ជាបន្ទាន់​ដើម្បី​កែលម្អ​សុខភាព និង​សុវត្ថិភាព​ការងារ​។

អង្គការ ILO បាន​កត់សម្គាល់​ថា នេះ​ជា​ការរលំ​លើក​ទី​ ២ ដែល​កើតឡើង​នៅក្នុង​ប្រទេស​កម្ពុជា​ក្នុង​រយៈពេល​មិន​ដល់​ ៧ ​ខែ​ផង បន្ទាប់ពី​ការរលំ​អគារ​មួយ​នៅ​ក្រុង​ព្រះសីហនុ​កាលពី​ខែមិថុនា​។ អង្គការ​នេះ​ក៏បាន​កត់សម្គាល់​ថា ឧប្បត្តិហេតុ​ចុងក្រោយ​នេះ​គឺជា «​គ្រោះថ្នាក់​កន្លែង​ការងារ​ដែល​បណ្ដាល​ឲ្យ​មាន​មនុស្ស​ស្លាប់​ច្រើន​បំផុត​នៅក្នុង​ប្រទេស​កម្ពុជា​ក្នុង​រយៈពេល​ប៉ុន្មាន​ឆ្នាំ​ថ្មីៗ​នេះ​»​។

យោងតាម​ក្រសួង​ដែនដី នគរូបនីយកម្ម និង​សំណង់ រដ្ឋាភិបាល​បានអនុម័ត​ការវិនិយោគ​មូលធន​ក្នុង​វិស័យ​សំណង​ដែលមាន​ទឹកប្រាក់​ប្រហែល ៩,៣ ​ពាន់​លាន​ដុល្លារ​នៅ​ឆ្នាំមុន កើនឡើង​ជិត ៨០ ​ភាគរយ​ធៀប​នឹង​ឆ្នាំ​​ ២០១៨ ដោយ​ភាគច្រើន​នៃ​កំណើន​បាន​មកពី​គម្រោង​នៅ​ក្រុងព្រះសីហនុ​។

គិត​ត្រឹម​ខែ​វិច្ឆិកា​ឆ្នាំ​មុន ក្រុមហ៊ុន​ចុះបញ្ជី​ដែល​ធ្វើ​ការងារ​លើ​គម្រោង​សាងសង់​នៅ​កម្ពុជា​មាន​ចំនួន ១០-៨១ ក្រុមហ៊ុន​។ ដោយ​ក្នុងនោះ ក្រុមហ៊ុន​ចំនួន ៤៨៥ គឺជា​ក្រុមហ៊ុន​បរទេស​មកពី​បណ្ដា​ប្រទេស​ជាច្រើន​ដូចជា​ចិន កូរ៉េ ថៃ សិង្ហបុរី បារាំង ចក្រភព​អង់គ្លេស និង​អាមេរិក​៕ LA

អត្ថបទគួរចាប់អារម្មណ៍

  • ជនជាតិ​ភាគតិច និង​សង្គម​ស៊ីវិល​ប្ដឹង​ជំទប់​ឃុំ និង​អភិបាលរង​ខេត្ត ​រឿង​ចេញ​បណ្ណ​សម្គាល់​ដី​ជាន់​លើ​ដី​ព្រៃ

    មណ្ឌលគិរី: ពលរដ្ឋ​សហគមន៍​ជនជាតិ​ដើម​ភាគតិច និង​សង្គម​ស៊ីវិល​ចំនួន ៦ ​នាក់​ បាន​ដាក់​ពាក្យបណ្ដឹង​ចំនួន ២ ​ដាច់​ ដោយឡែក​ពី​គ្នា​ប្ដឹង​មនុស្ស ៤ ​នាក់ ​ទៅ​តុលាការខេត្ត​ក្នុង​នោះ​មាន​ជំទប់​ទី​ ១ ​ឃុំ​ប៊ូស្រា​ម្នាក់ និង​អភិបាលរង​ខេត្តមណ្ឌលគិរី​ម្នាក់​ដោយ​ចោទ​ពាក់ព័ន្ធ​ការចេញ​បណ្ណ​សម្គាល់​ម្ចាស់​ដីធ្លី​ជាន់​លើដី​គម្រប​ព្រៃឈើ និង​បទ​ចោទ​ពាក់ព័ន្ធ​លួច​គាស់​យក​ថ្ម​ធម្មជាតិ​

  • កាណាដា​ពិន័យ VW ១៥០ ​លាន​ដុល្លារ

    ក្រុងតូរ៉ុនតូៈ តុលាការ​ក្នុង​ទីក្រុង​តូរ៉ុនតូ​កាលពី​ថ្ងៃ​ពុធ​បាន​បញ្ជា​ឲ្យ​ក្រុមហ៊ុន Volkswagen (VW) បង់ប្រាក់​ពិន័យ ១៩៦,៥ លាន​ដុល្លារ​កាណាដា (១៥០ ​លាន​ដុល្លារ​អាមេរិក​) បន្ទាប់ពី​ក្រុមហ៊ុន​ផលិត​រថយន្ត​មួយ​នេះ​បាន​សារភាព​កំហុស​ចំពោះ​ការរំលោភច្បាប់​បរិស្ថាន​ក្នុង​រឿងអាស្រូវ​បោក​បន្លំ​ការបញ្ចេញ​កាបូន​។

  • សហជីព​បារាំង​​ព្យាយាម​បន្ត​ការ​តវ៉ា​ប្រឆាំង​ការ​កែ​ទម្រង់​ប្រាក់​សោធននិវត្តន៍​​ ដើម្បី​ដាក់​សម្ពាធ​លើ​រដ្ឋាភិបាល​​

    ក្រុង​ប៉ារីស៖ ក្រុម​សហជីព​បារាំង​កាល​ពី​ថ្ងៃ​ពុធ​ បាន​បន្ត​ធ្វើ​​កូដកម្ម​ជា​ច្រើន​ ដោយ​​មាន​​បំណង​បង្កើន​សម្ពាធ​​​​ទៅ​លើ​រដ្ឋាភិបាល​មុន​នឹង​រដ្ឋាភិបាល​នេះ​ ធ្វើ​ការ​បង្ហាញ​ការ​កែ​ទម្រង់​ប្រាក់​សោធននិវត្តន៍​ចុង​ក្រោយ ​ដែល​បាន​​​ជំរុញ​ឲ្យ​មាន​ការ​តវ៉ា​ពី​បញ្ហា​ការងារ​ធំ​បំផុត​នៅ​បារាំង​ជា​ច្រើន​ទសវត្សរ៍​នោះ​​។ ​

  • លាភ ​រដ្ឋា ​និង ​ផាន់ ​គ្រាន់ ​ប៉ះ​ថៃ​ចំណូល​ថ្មី​

    ភ្នំពេញ៖ ​អ្នក​លេង​កណ្តាប់​ដៃ​របស់​កម្ពុជា​ចំនួន ​២ ​នាក់ គឺ ​លាភ ​រដ្ឋា និង​ ផាន់ ​គ្រាន់​ ​នឹង​​ត្រូវ​បង្ហាញ​ខ្លួន​រួមគ្នា នៅ​​លើ​សង្វៀន​ SEATV នា​រសៀល​ថ្ងៃ​សៅរ៍​ស្អែក​នេះ ​ដោយ​ពួក​គេ​ត្រូវ​ជួប​ជាមួយ​​កីឡាករ​ថៃ​​ចំណូល​ថ្មី​ មិន​ធ្លាប់​មក​ប្រកួត​ក្នុង​សង្វៀន​នៅ​​ប្រទេស ​កម្ពុជា ​នោះ​ទេ​​។