.jpg)
ទិដ្ឋភាពក្រុងបាងកកមើលពីលើកំពូលព្រះវិហារនៅវត្តសាកែត ក្នុងក្រុងបាងកក។ រូបថត AFP
ក្រុងបាងកកៈ ការផ្គត់ផ្គង់ខុនដូថ្មីដែលកំពុងចាប់ផ្តើមធ្វើឡើងនៅក្រុងបាងកក និងតំបន់ជុំវិញ (Greater Bangkok) នៅឆ្នាំនេះ នឹងធ្លាក់ចុះ ១៣ ភាគរយ មកត្រឹម ៥៣ ០០០ យូនីត ដែលដូចគ្នាទៅនឹងបរិមាណជាមធ្យមរបស់ទីផ្សារក្នុងរយៈពេល ៥ ឆ្នាំចុងក្រោយនេះ។ នេះបើយោងតាមកាសែតបាងកកប៉ុស្តិ៍កាលពីចុងខែមុន។
លោកស្រី Nalinrat Cha-reonsuphong នាយកគ្រប់គ្រងក្រុមហ៊ុនពិគ្រោះយោបល់អចលនទ្រព្យ Nexus Property Marketing បានប្រាប់កាសែតបាងកកប៉ុស្តិ៍ថា តម្រូវការខុនដូក្នុងឆ្នាំ ២០១៩ នឹងមានចន្លោះពី ៥០ ០០០ ទៅ ៥៥ ០០០ យូនីត ពោលគឺជិតស្មើនឹងបរិមាណលក់ក្នុងឆ្នាំ ២០១៨ ដែលមានចំនួន ៥២ ០០០ យូនីត។ ក្នុងនោះ ខុនដូ ៣១ ៨០០ យូនីតបានដាក់លក់នៅក្នុងឆ្នាំ ២០១៨ និង ២០ ៣០០ យូនីត បានដាក់លក់នៅក្នុងឆ្នាំ ២០១៧ ឬមុននេះ។
លោកស្រីថ្លែងថា៖ «ក្រុមហ៊ុនអភិវឌ្ឍន៍គួរតែផ្តោតលើខុនដូក្នុងទីក្រុង និងទីផ្សារដែលមានតម្លៃមធ្យម ដោយសារខុនដូរប្រភេទនេះ មានតម្រូវការជាក់លាក់នឹងមានអ្នកទិញច្រើនបំផុត។
លោកស្រីបន្តថា៖ «ខុនដូក្នុងផ្នែកទាំងនេះមានស្ថិរភាព និងនិរន្តរភាពជាងអ្នកទិញដែលជាជនបរទេស ឬទីផ្សារវិនិយោគ»។
កាសែតបាងកកប៉ុស្តិ៍បានរាយការណ៍ដោយដកស្រង់ទិន្នន័យពីក្រុមហ៊ុន Nexus ថា ខុនដូក្នុងទីក្រុងដែលមានតម្លៃក្រោម ៧៥ ០០០ បាត (ប្រហែល ២ ៣១៥ ដុល្លារ) ក្នុង ១ ម៉ែត្រការ៉េ ឬទាបជាង ២,៥ លានបាត (ប្រហែល ៧៧ ០០០ ដុល្លារ) ក្នុង ១ យូនីតមានតម្រូវការពិត ខណៈដែលខុនដូរតម្លៃមធ្យមធ្លាក់ចុះពី ៧៥ ០០០ ទៅ ១១០ ០០០ បាតក្នុង ១ ម៉ែត្រការ៉េឬ ២,៥ ទៅ ៦ លានបាតក្នុង ១ យូនីត។
លោកស្រីបានលើកឡើងថា ក្រុមហ៊ុនអភិវឌ្ឍន៍ក៏បង្តើតផលិតផលនានាសម្រាប់តម្រូវការជាក់លាក់ផងដែរ ដូចជាខុនដូសម្រាប់អ្នកចូលចិត្តហាត់ប្រាណ ឬសម្រាប់អ្នកស្រឡាញ់សត្វចិញ្ចឹម និងខុនដូសម្រាប់មនុស្សចាស់ជាដើម។
យោងតាមការស្រាវជ្រាវទីផ្សាររបស់ក្រុមហ៊ុន Nexus ចំនួនផ្គត់ផ្គង់ខុនដូថ្មីដែលចាប់ផ្តើមនៅឆ្នាំមុន មានចំនួន ៦០ ៩០០ យូនីតពី ១៣៨ គម្រោង ដែលធ្វើឱ្យការផ្គត់ផ្គង់សរុបមានរហូតដល់ ៦១០ ៩០០ យូនីត។
យោងតាមកាសែតបាងកកប៉ុស្តិ៍ បរិមាណផ្គត់ផ្គង់ខុនដូថ្មីច្រើនបំផុត គឺស្ថិតក្នុងតំបន់ Phaya Thai-Ratchadaphisek-Phahon Yothin ដែលមានចំនួន ២១ ១០០ យូនីត ស្មើនឹង ៣៥ ភាគរយ បន្ទាប់មកគឺតំបន់ Phra Khanong-Suan Luang មានចំនួន ១៣ ៥០០ យូនីតដែលស្មើនឹង ២២ ភាគរយ និងតំបន់ Thon Buri-Petchkasem មានចំនួន ៨ ៥០០ យូនីត ស្មើនឹង ១៤ ភាគរយ។
ទីតាំងទាំង ៣ នេះក៏បានមើលឃើញកំណើនខ្ពស់បំផុតនៃការផ្គត់ផ្គង់ខុនដូថ្មីផងដែរនៅក្នុងរយៈពេល ៥ ឆ្នាំកន្លងមកនេះ ជាមួយនឹងកំណើនចន្លោះពី ៦៥ ទៅ ៧០ ភាគរយ ដោយសារតំបន់នេះមានទីតាំងនៅជិតផ្លូវដឹកជញ្ជូនធំៗ និងងាយស្រួលស្វែងរកដីសម្រាប់គម្រោងអភិវឌ្ឍន៍ខុនដូថ្មី។
ក្នុងចំណោមការផ្គត់ផ្គង់ខុនដូថ្មី ការផ្គត់ផ្គង់ ៤១ ភាគរយជាខុនដូតម្លៃខ្ពស់ដែលមានតម្លៃចាប់ពី ១១០ ០០០ ទៅ ១៩០ ០០០ បាតក្នុង ១ ម៉ែត្រការ៉េ ឬចាប់ពី ៤ ទៅ ៨ លានបាតក្នុង១យូនីត បន្ទាប់មកគឺខុនដូតម្លៃមធ្យមមាន ២៧ ភាគរយ និងខុនដូក្នុងទីក្រុងមាន ២១ ភាគរយ។
លោកស្រី Nalinrat បន្ថែមថា ចំនួនដ៏ច្រើននៃការផ្គត់ផ្គង់ខូនដូតម្លៃខ្ពស់ថ្មីដែលចាប់ផ្តើមនៅឆ្នាំមុន មិនស្របជាមួយនឹងចំណូលរបស់ប្រជាពលរដ្ឋក្នុងទីក្រុងបាងកកទេ ដោយសារតម្លៃដីកើនឡើងខ្លាំង។
លោកស្រីថ្លែងថា៖ «នៅតាមទីតាំងល្អៗ ដូចជាតំបន់ Thong Lor, Phrom Phong និង Ekamai តម្លៃខុនដូនៅឆ្នាំមុន កើនឡើងរហូតដល់ ៤០០ ០០០ បាតក្នុង ១ ម៉ែត្រការ៉េ ហើយនៅឆ្នាំនេះនឹងកើនឡើងដល់ ៥០០ ០០០បាត»។
លោកស្រីបន្ថែមថា៖ «ក្នុងតម្លៃនេះ តម្រូវការនៅមានកម្រិតខ្លាំងណាស់ ហើយយើងឆ្ងល់ថា តើមានអ្នកទិញណាដែលអាចមានលទ្ធភាពទិញ»។
មានខុនដូចំនួន ៦២ ៧០០ យូនីតដែលមិនទាន់លក់ដាច់នៅក្នុងទីផ្សារដែលនឹងត្រូវដាក់លក់នៅឆ្នាំនេះ។ ដោយសារកត្តាអវិជ្ជមានមួយចំនួនដូចជាការកំណត់ទំហំកម្ចីថ្មី និងការកើនឡើងអត្រាការប្រាក់ ទីផ្សារគួរពិនិត្យមើលទៅលើយូនីតដែលកំពុងត្រូវបានបញ្ចប់ និងផ្ទេរកម្មសិទ្ធិនៅឆ្នាំនេះ។
តម្លៃជាមធ្យមក្នុង ១ ម៉ែត្រការ៉េនៃការផ្គត់ផ្គង់ខុនដូថ្មីដែលចាប់ផ្តើមនៅឆ្នាំមុន បានកើនឡើង ៧,៦ ភាគរយទៅដល់ ១៤០ ៦០០ បាតពី ១៣០ ៦០០ បាតនៅឆ្នាំ ២០១៧។
ការកើនឡើងថ្លៃខ្ពស់បំផុតកើតមាននៅកណ្តាលទីក្រុងដែលមានកំណើនរហូតដល់ ១០ ភាគរយ ដែលស្មើនឹង ២៣១ ០០០ បាតក្នុង ១ ម៉ែត្រការ៉េ បន្ទាប់មកគឺតំបន់ជាយក្រុងដែលមានកំណើន ៧ ភាគរយស្មើនឹង ១១៣ ២០០ បាត។
លោកស្រី Nalinrat ថ្លែងថា គម្រោងពីការបណ្តាក់ទុនរួមរបស់បរទេសជាមួយក្រុមហ៊ុនអភិវឌ្ឍន៍ថៃ នឹងបន្តកើនឡើងរហូតដល់ ៣០ ភាគរយនៃចំនួនផ្គត់ផ្គង់ខុនដូថ្មីសរុប ដែលនឹងចាប់ផ្តើមដាក់លក់នៅឆ្នាំនេះ ពោលគឺកើនពី ២៦ ភាគរយឬស្មើ ១៥ ៨២០ យូនីតពី ២៤ គម្រោងនៅឆ្នាំមុន៕ NS
