ភ្នំពេញៈ ជាមួយនឹងគម្រោងចំនួន ៨ ដែលបានបញ្ចប់ការសាងសង់ក្នុងឆមាសទី១ ឆ្នាំ ២០១៩ នេះ ការផ្គត់ផ្គង់បន្ទប់ខុនដូនៅរាជធានីភ្នំពេញ បានកើនឡើងប្រមាណ ១៧ ភាគរយ បើធៀបទៅនឹងដំណាច់ឆ្នាំ ២០១៨ និងកើនឡើង ៩៣ ភាគរយ បើធៀបនឹងដំណាច់ឆ្នាំ ២០១៧។ នេះបើយោងតាមការសិក្សារបស់ក្រុមហ៊ុនអចលនទ្រព្យ CBRE Cambodia។
បើតាមរបាយការណ៍ស្រាវជ្រាវរបស់ក្រុមហ៊ុនអចលនទ្រព្យ CBRE Cambodia ដែលចេញផ្សាយកាលពីម្សិលមិញ បានបង្ហាញថា ក្នុងរយៈពេល ៦ ខែដំបូងក្នុងឆ្នាំ ២០១៩ ខុនដូថ្មីចំនួន ១៣ គម្រោងដែលស្មើនឹង ២ ៤៨០ យូនីត ត្រូវបានដាក់ចូលក្នុងទីផ្សារ។ ការដាក់បញ្ចូលថ្មីនេះបានធ្វើឲ្យចំនួនបន្ទប់ខុនដូក្នុងរាជធានីភ្នំពេញ កើនពីចំនួន ១៤ ១៧៧ យូនីត កាលពីចុងឆ្នាំ ២០១៨ មកដល់ ១៦ ៦៥៧ យូនីត នាចុងឆមាសទី១ ឆ្នាំ ២០១៩។
របាយការណ៍ដដែលឲ្យដឹងថា ក្នុងចំណោមខុនដូ ១៦ ៦៥៧ យូនីត មាន ២៤ ភាគរយ ជាប្រភេទតម្លៃសមរម្យ ៥១ ភាគរយ ជាប្រភេទមធ្យម និង ២៥ ភាគរយ ជាប្រភេទប្រណីត។
ការស្រាវជ្រាវរកឃើញថា បច្ចុប្បន្នខុនដូតម្លៃសមរម្យ មានតម្លៃជាមធ្យម ១ ៥០០ ដុល្លារក្នុង ១ ម៉ែត្រការ៉េ ខុនដូប្រភេទមធ្យម មានតម្លៃ ២ ៥០០ ដុល្លារ និងប្រភេទប្រណីត មានតម្លៃចាប់ពី ៣ ២០០ ដុល្លារឡើងទៅ។
ទាក់ទងនឹងការជួលខុនដូវិញ តម្លៃជួលបានកើនតិចតួច ដោយខុនដូប្រភេទប្រណីតមានតម្លៃជាមធ្យម ១៤,៦ ដុល្លារ ក្នុង ១ ម៉ែត្រការ៉េ សម្រាប់រយៈពេល ១ ខែ កើនឡើង ២,៨ ភាគរយ បើធៀបនឹងចុងឆ្នាំ ២០១៨ និងខុនដូតម្លៃមធ្យមមានតម្លៃ ១២ ដុល្លារ កើន ៤,៣ ភាគរយ។
ក្នុងឆមាសទី១ ឆ្នាំ ២០១៩ នេះ ក៏មានគម្រោងថ្មីៗចំនួន ១៣ ដែលស្មើនឹងជាង ៥ ៨០០ យូនីត បានប្រកាសបើកលក់ផងដែរ។
លោកស្រី អាន សុធីតា នាយិកាក្រុមហ៊ុន CBRE Cambodia ថ្លែងថា ទីផ្សារខុនដូក្នុងរាជធានីភ្នំពេញនៅតែបន្តមានភាពល្អប្រសើររបស់ខ្លួន ពិសេសខុនដូតម្លៃសមរម្យ។
លោកស្រីបន្តថា ដោយសារចរាចរណ៍នៅក្នុងទីក្រុងភ្នំពេញកាន់តែចង្អៀត ស្របពេលដែលផ្នត់គំនិតប្រជាជនចំពោះការរស់នៅក្នុងខុនដូមានកាន់តែច្រើននោះ បានធ្វើឲ្យមានការវិនិយោគចាប់ពីដើមឆ្នាំ ២០១៩ មក ដែលភាគច្រើនជាប្រភេទខុនដូតម្លៃសមរម្យ។
លោកស្រីថ្លែងថា៖ «និន្នាការរបស់អ្នកវិនិយោគខុនដូនៅពេលនេះ គឺភាគច្រើនចាប់យកអតិថិជនក្នុងស្រុក ខុសពីពេលមុនដែលការវិនិយោគខុនដូភាគច្រើនផ្តោតតែទៅលើអតិថិជនជាជនបរទេស»។
បើតាមលោកស្រី សុធីតា គម្រោងដែលមានបញ្ចប់ក្នុងឆមាសទី១ មានដូចជា Park Axis Residences, Vista Condo និង Diamond Twin។
របាយការណ៍ខាងលើក៏បានព្យាករដែរថា នៅដំណាច់ឆ្នាំ ២០១៩ ចំនួនបន្ទប់ខុនដូក្នុងរាជធានីភ្នំពេញ នឹងកើនដល់ ៣១ ១០០ យូនីត បើមិនមានគម្រោងណាប្រកាសពន្យារពេលសាងសង់។ ប្រភេទខុនដូតម្លៃសមរម្យ នឹងមានដំណើរកាន់តែល្អ ខណៈដែលខុនដូដែលស្ថិតនៅឆ្ងាយពីតំបន់ប្រជុំជនអាចប្រឈមនឹងបញ្ហាទីផ្សារ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម ឲ្យដឹងថា ទោះបីបច្ចុប្បន្នទីផ្សារខុនដូនៅកម្ពុជាមិនសូវមានសម្ទុះខ្លាំង ហើយតម្លៃលក់ និងជួលមិនសូវមានការប្រែប្រួលធៀបនឹងឆ្នាំមុនក្តី ក៏ឱកាសវិនិយោគនៅតែមាន ពិសេសខុនដូដែលមានតម្លៃសមរម្យ។
លោកបន្តថា កំណើនសេដ្ឋកិច្ច និងកំណើនប្រាក់ចំណូលរបស់ប្រជាជនខ្មែរ នឹងធ្វើឲ្យវិស័យនេះបន្តលូតលាស់ទៅមុខទៀត។ លោកថ្លែងថា៖ «ខុនដូតម្លៃសមរម្យនឹងបន្តកើនឡើងច្រើននាពេលខាងមុខ»៕ LA