.jpg)
ទិដ្ឋភាពនៅការដ្ឋានសាងសង់លំនៅឋានមួយកន្លែងក្នុងរាជធានីភ្នំពេញ។ ហ៊ាន រង្សី
ភ្នំពេញៈ ការផ្តល់កម្ចីនៅក្នុងវិស័យអចលនទ្រព្យ និងសំណង់ពីសំណាក់គ្រឹះស្ថានធនាគារនៅកម្ពុជាគិតត្រឹមចុងឆមាសទី ១ ឆ្នាំ ២០២០ នេះមានទឹកប្រាក់ប្រមាណជិត ៧,៦៩ ពាន់លានដុល្លារ កើនឡើង ១៦,២៣ ភាគរយពីចំនួនប្រមាណជាង ៦,៦១ ពាន់លានដុល្លារ កាលពីដំណាច់ឆ្នាំ ២០១៩។
របាយការណ៍ NBC ដែលចេញផ្សាយកាលពីសប្តាហ៍មុនឲ្យដឹងថា គិតត្រឹមចុងឆមាសទី ១ ឆ្នាំ ២០២០ ទំហំនៃការផ្តល់ឥណទានអតិថិជនរបស់គ្រឹះស្ថានធនាគារនៅកម្ពុជាមានទឹកប្រាក់សរុប ២៦,៧ ពាន់លានដុល្លារក្នុងនោះការផ្តល់កម្ចីនៅក្នុងវិស័យអចលនទ្រព្យ និងសំណង់មានសរុប ២៨,៨ ភាគរយ ដែលស្មើនឹងទឹកប្រាក់ប្រមាណជិត ៧,៦៩ ពាន់លានដុល្លារ។
ឥណទានក្នុងវិស័យអចលនទ្រព្យ និងសំណង់ទាំងនោះរួមមានការឲ្យកម្ចីទិញផ្ទះជាកម្មសិទ្ធិផ្ទាល់ខ្លួនមានចំនួន ១១,៦ ភាគរយ (ប្រហែល ៣ ០៩៧ លានដុល្លារ) សំណង់ ៩,២ ភាគរយ (ប្រហែល ២ ៤៥៦ លានដុល្លារ) និងការជួញដូរអចលនទ្រព្យ មានចំនួន ៨ ភាគរយ (ប្រហែល ២ ១៣៦ លានដុល្លារ)។
ដោយឡែកកាលពីដំណាច់ឆ្នាំ ២០១៩ ក្នុងចំណោមការផ្តល់ឥណទានអតិថិជនពីសំណាក់ធនាគារដែលមានទឹកប្រាក់សរុប ២៤,៥ ពាន់លានដុល្លារ គឺការផ្តល់កម្ចីក្នុងវិស័យអចលនទ្រព្យ និងសំណង់មានចំនួនសរុប ២៧ ភាគរយដែលស្មើនឹងប្រមាណជាង ៦,៦១ ពាន់លានដុល្លារ។ ឥណទានទាំងនោះមានការឲ្យកម្ចីទិញផ្ទះជាកម្មសិទ្ធិផ្ទាល់ខ្លួនមាន ១០ ភាគរយ (ប្រហែល ២៤៥០ លានដុល្លារ) សំណង់ ១០ ភាគរយ (ប្រហែល ២ ៤៥០ លានដុល្លារ) និងការជួញដូរអចលនទ្រព្យមានចំនួន ៧ ភាគរយ (ប្រហែល ១ ៧១៥ លានដុល្លារ)។
លោក ជា ចាន់តូ ទេសាភិបាលធនាគារជាតិនៃកម្ពុជាបានឲ្យដឹងក្នុងរបាយការណ៍ប្រចាំឆមាសទី ១ ឆ្នាំ ២០២០ ថា ទោះបីជារដ្ឋាភិបាលកម្ពុជាបានដាក់ចេញនូវវិធានការមួយចំនួនដើម្បីគ្រប់គ្រងការរីករាលដាលនៃជំងឺកូវីដ១៩ នេះហើយក៏ដោយ ក៏ផលអវិជ្ជមានមួយចំនួនបាននិងកំពុងកើតរួចមកហើយក្នុងវិស័យធនាគារនៅកម្ពុជា។
លោកបន្តថា ហានិភ័យចម្បងៗដែលអាចកើតមានពីការបន្តអូសបន្លាយនៃការរីករាលដាលជំងឺកូវីដ១៩ មានដូចជា ការធ្លាក់ចុះប្រាក់ចំណូលរបស់ប្រជាពលរដ្ឋ និងអាជីវកម្ម ការធ្លាក់ចុះនៃវិស័យសំណង់ និងអចលនទ្រព្យ និងការថយចុះនៃលំហូរមូលធនពីក្រៅប្រទេសមកក្នុងវិស័យធនាគារ។
លោកលើកឡើងថា៖ «បើទោះបីកម្ពុជាបានចាត់វិធានការគ្រប់គ្រងការរីករាលដាលជំងឺកូវីដ ១៩ ប្រកបដោយប្រសិទ្ធភាពក៏ដោយ វិស័យសំណង់នៅកម្ពុជាក៏ប្រឈមមុខនឹងការថយចុះផងដែរ ដោយសារតែប្រភពទុន ១ ផ្នែកទទួលបានមកពីក្រៅប្រទេស»។
លោកបន្ថែមថា សេដ្ឋកិច្ចកម្ពុជាត្រូវបានរំពឹងថា នឹងមានអត្រាកំណើនអវិជ្ជមានក្នុងឆ្នាំ ២០២០ នេះដែលជាកំណើនទាបបំផុតចាប់ពីឆ្នាំ ១៩៩៥ មក។ ប៉ុន្តែបើជំងឺកូវីដ ១៩ អាចទប់ស្កាត់បានត្រឹមចុងឆ្នាំ ២០២០ នេះ កំណើនសេដ្ឋកិច្ចកម្ពុជាសម្រាប់ឆ្នាំ ២០២១ អាចនឹងងើបឡើងវិញក្នុងទម្រង់ជាអក្សរ «V»។
លោក សឹង ភន នាយកប្រតិបត្តិឥណទាននៃធនាគារអេស៊ីលីដា ភីអិលស៊ី បានប្រាប់ភ្នំពេញប៉ុស្តិ៍កាលពីថ្ងៃពុធថា នៅក្នុងឆមាសទី ១ ឆ្នាំ ២០២០ នេះ ការផ្តល់កម្ចីទិញផ្ទះទៅឲ្យអតិថិជនរបស់ធនាគារអេស៊ីលីដាបានធ្លាក់ចុះតិចតួច ព្រោះក្នុងអំឡុងពេលនៃរីករាលដាលជំងឺកូវីដ ១៩ នេះធនាគារបានផ្តោតការយកចិត្តទុកដាក់ខ្លាំងទៅលើការផ្តល់ឥណទានដល់វិស័យដែលប៉ះពាល់ខ្លាំងពិសេសសហគ្រាស ធុនតូច និងមធ្យម។
លោកថ្លែងថា៖ «ការផ្តល់ឥណទានរបស់អេស៊ីលីដាបានធ្លាក់ចុះក្រោម ១ ភាគរយនៅក្នុងឆមាសទី ១ បើធៀបនឹងចុងឆ្នាំមុន ប៉ុន្តែខ្ញុំរំពឹងថាវានឹងមានសម្ទុះឡើងវិញនៅក្នុងឆមាសទី ២ នេះ»។
បើតាមលោក សឹង ភន រហូតមកដល់ពេលនេះការផ្តល់ឥណទានទិញផ្ទះរបស់ធនាគារអេស៊ីលីដាមានប្រមាណ ១៤២ លានដុល្លារ។
ប្រធានសមាគមអចលនទ្រព្យសកល និងជាប្រធានក្រុមហ៊ុន KW Sam Sn Realty Co., Ltd លោក សំ សុខនឿន បាននិយាយថា ការផ្តល់ឥណទានរបស់ធនាគារកំពុងដើរតួនាទីយ៉ាងសំខាន់ក្នុងការជួយជំរុញកំណើនសេដ្ឋកិច្ចជាតិ ក៏ដូចជាផ្តល់ឱកាសឲ្យប្រជាពលរដ្ឋខ្មែរអាចមានផ្ទះផ្ទាល់ខ្លួន ពីព្រោះបច្ចុប្បន្នមិនសូវមានប្រជាជនណាមានប្រាក់ទាំងដុលយកទៅទិញអចលនទ្រព្យទេ។
លោកបន្តថា ការផ្តល់ឥណទានក្នុងវិស័យអចលនទ្រព្យក៏បាននិងកំពុងបង្កើតឱកាសការងារជាច្រើននៅកម្ពុជាផងដែរ។
លោកបន្តថា៖ «ការកើនឡើងនៃប្រាក់កម្ចីទិញផ្ទះរបស់ធនាគារ គឺជាសញ្ញាណដែលបង្ហាញថា វិស័យអចលនទ្រព្យនៅកម្ពុជានៅតែមានដំណើរទៅមុខល្អ»។
ទោះយ៉ាងណាលោកអះអាងថា ទន្ទឹមនឹងកំណើននៃការផ្តល់ឥណទានទិញផ្ទះពីសំណាក់ធនាគារនេះ និន្នាការនៃការទិញផ្ទះតាមរយៈការបង់រំលស់ជាមួយក្រុមហ៊ុនអភិវឌ្ឍន៍ក៏កើតមានច្រើនផងដែរ។
ជាមួយនឹងក្តីសុទិដ្ឋិនិយមលោក សំ សុខនឿន បានប្រាប់ថាការផ្តល់ឥណទានទិញផ្ទះរបស់វិស័យធនាគារនៅកម្ពុជានឹងមានសម្ទុះទៀតនៅពេលខាងមុខ ខណៈអត្រាការប្រាក់របស់ធនាគារក៏នឹងធ្លាក់ចុះបន្ថែមទៀតដែរ ព្រោះបើនិយាយពីអត្រាការប្រាក់ធនាគារនៅកម្ពុជានាពេលនេះគឺនៅមានកម្រិតខ្ពស់ បើធៀបជាមួយនឹងប្រទេសដទៃទៀត៕
