The Phnom Penh Post Search

Search form

ការ​យល់​ឃើញ​ខុស​ៗ​គ្នា​ អំពី​អចលនទ្រព្យ​របស់​ប្រជាជន​កម្ពុជា

Content image - Phnom Penh Post
អ្នក​ស្រី ថា បូរ៉ានី ​វ័យ ៦១​ឆ្នាំ ជា​អតីត​សិល្ប​ការិនី​ខាង​ផ្នែក​របាំ​ប្រពៃណី​ខ្មែរ​ អ្នក​ស្រី​បាន​រស់នៅ​ក្នុង​អគារ​ប៊ុល​ឌិញ​ស​អស់​រយៈពេល ៣៦​ឆ្នាំ​មក​ហើយ​។ ផា លីណា

ការ​យល់​ឃើញ​ខុស​ៗ​គ្នា​ អំពី​អចលនទ្រព្យ​របស់​ប្រជាជន​កម្ពុជា

ដោយ​ត្រូវ​បាន​លើក​ឡើង​ជា​ច្រើន​សា​មក​ហើយ​ថា ប្រទេស​កម្ពុជា​កំពុង​ឆ្លង​កាត់​ការ​កើន​ឡើង​ខ្លាំង​នៅ​ក្នុង​ទីផ្សារ​អចលនទ្រព្យ​ក្នុង​ពេល​បច្ចុប្បន្ន​នេះ​។

ក្រៅ​ពី​អ្នក​ជំនាញ​ដែល​បាន​ព្យាករ​ថា ​ការ​ហួស​កម្រិត​នៅ​ក្នុង​ទីផ្សារ​ក្នុង​រយៈពេល​ពីរ​ឆ្នាំ​ខាង​មុខ​នេះ ចំនួន​ការ​លក់​ខុន​ដូ និង​បុរី ក៏​បាន​ថយ​ចុះ​ទន្ទឹម​នឹង​នោះ​តម្លៃ​ក៏​ត្រូវ​បាន​ធ្លាក់​ចុះ​ចាប់​តាំង​ពី​ដើម​ខែ​មុន​មក​ម្ល៉េះ ប៉ុន្តែ​ផ្នែក​មួយ​ទៀត មិន​អាច​និយាយ​បាន​ថា បែប​នេះ​ដែរ​ទេ​។

ប្រជាជន​មួយ​ចំនួន​ធំ​មិន​សូវ​យក​ចិត្ត​ទុក​ដាក់​នឹង​ព្រឹត្តិការណ៍​នេះ​ទេ ដោយ​មាន​ប្រជាជន​ជា​ច្រើន​មិន​អើពើ​ហើយ​មួយ​ចំនួន​បាន​លើក​ឡើង​ពី​ស្ថានភាព​នយោបាយ ដែល​នាំ​ឲ្យ​វិស័យ​ផ្សេងៗ​នៅ​ ក្នុង​ប្រទេស​ពុំ​សូវ​ជា​មាន​សារៈសំខាន់​។

បុគ្គលិក​ការិយាល័យ​មួយ​រូប លោក វិទូ ដែល​មាន​អាយុ ៣០​ឆ្នាំ រស់​នៅ​ផ្ទះ​ល្វែង​មួយ​ដែល​មាន​កម្ពស់​២​ជាន់​។ លោក​ជួល​ផ្ទះ​នេះ​ក្នុង​តម្លៃ​៣០០​ដុល្លារ​ក្នុង​មួយ​ខែ។ ដោយ​មិន​សូវ​ជា​ខ្វល់ខ្វាយ​ពី​បញ្ហា​ធំ​ដុំ លោក​បាន​លើក​ជា​បញ្ហា​អំពី ប្រព័ន្ធ​ទឹក​ដែល​ខ្សោយ​ក៏​ដូច​ជា​មាន​ចម្ងាយ​នៅ​ឆ្ងាយ​ពី​កណ្តាល​ទីក្រុង​។

Content image - Phnom Penh Post
ទិដ្ឋភាព​នៃ​បន្ទប់​លំនៅ​ឋាន​មួយ​កន្លែង​នៅ​ក្នុង​អគារ​ប៊ុល​ឌិញ​ស​កាល​ពី​ដើម​សប្តាហ៍​នេះ​។ ផា លីណា

លោក​បាន​ថ្លែង​ថា​ ៖ «​ខ្ញុំ​មិន​ដឹង​ថា ទីផ្សារ​អចលនទ្រព្យ​កើន​ឡើង ឬ​យ៉ាង​ណា​ទេ ព្រោះ​ខ្ញុំ​មិន​សូវ​ជា​តាម​ដាន​ប៉ុន្មាន​ទេ​។ បើ​ខ្ញុំ​ឃើញ​ព័ត៌មាន​ពី​បញ្ហា​នេះ ខ្ញុំ​ក៏​មើល ប៉ុន្តែ​បើ​មិន​មាន​ទេ ខ្ញុំ​ក៏​មិន​មើល​ទៅ​»​។ លោក​បាន​បន្ត​ថា គាត់​មិន​ដឹង​ពី​តម្លៃ​ ដី ផ្ទះ ដែល​លោក​រស់នៅ​សព្វ​ថ្ងៃ​នោះ​ទេ ប៉ុន្តែ​លោក​ដឹង​ថា តម្លៃ​ដី​គឺ​បាន​ឡើង​ថ្លៃ។

វិទូ​យក​ចិត្ត​ទុក​ដាក់​ទៅ​លើ​បញ្ហា​នយោបាយ​នៅ​ក្នុង​ប្រទេស​កម្ពុជា ដោយ​លោក​បាន​និយាយ​ថា ​៖ «​ប្រសិន​បើ​ស្ថានភាព​នយោបាយ​មាន​ស្ថិរភាព តម្លៃ​អចលន​ទ្រព្យ​នឹង​កើន​ឡើង​។ ប៉ុន្តែ​ប្រសិន​បើ​មិន​មាន​ស្ថិរភាព​ទេ តម្លៃ​នឹង​ធ្លាក់​ចុះ​ហើយ​។ ដូច្នេះ​វា​អាស្រ័យ​ទៅ​លើ​ស្ថានភាព​នយោបាយ​»​។

អ្នក​នាង ចរិយ៉ា មាន​វ័យ​២៨​ឆ្នាំ ហើយ​ម្តាយ​របស់​អ្នក​នាង គឺជា​ម្ចាស់​ខុនដូ​ផារីយ៉ា ដែល​មាន​ទីតាំង​នៅ​ផ្លូវ​៩៩​។ អ្នក​នាង គឺជា​អ្នក​ជួល​យូនីត​ទាំង​អស់​នៅ​ក្នុង​ខុនដូ​នោះ​។ អ្នក​នាង​រស់​នៅ​ក្នុង​យូនីត​មួយ ហើយ​ជួល​យូនីត​ដែល​នៅ​សល់​ក្នុង​តម្លៃ​ចាប់​ពី ៥០០​ដុល្លារ ដោយ​ខុនដូ​នោះ​គឺ​សម្រាប់​អ្នក​ដែល​មាន​ប្រាក់​ចំណូល​កណ្តាល​។

អ្នក​នាង​យល់​ថា ទីផ្សារ​អចលន​ទ្រព្យ​នឹង​បន្ត​រីក​ចម្រើន​ទៅ​មុខ​ទៀត ដោយ​អ្នក​នាង​បាន​ប្រាប់​ថា ​៖ «​ខ្ញុំ​គិត​ថា ការ​កើន​ឡើង​នេះ​ល្អ ព្រោះ​បើ​មាន​ខុន​ដូ​ច្រើន បរទេស​នឹង​មក​ច្រើន អ៊ីចឹង​សេដ្ឋ​កិច្ច​យើង​ក៏​ដើរ​ដែរ​។ ខ្ញុំ​គិត​ថា មិន​អាច​មាន​ខុន​ដូ​ច្រើន​ពេក​ទេ ព្រោះ​ខ្ញុំ​ឃើញ​មាន​ភ្ញៀវ​ច្រើន​ណាស់​ដែល​គេ​មក​វិនិយោគទុន​នៅ​ស្រុក​ខ្មែរ​»​។

នៅ​ផ្នែក​ម្ខាង​ទៀត​នៃ​សង្គម អ្នក​ស្រី ធន់ សុនីណា ដែល​មាន​វ័យ​២៨​ឆ្នាំ មាន​តួនាទី​ជា​នាយក​ប្រតិបត្តិ​របស់​ក្រុមហ៊ុន O.S.C Co., Ltd. ដែល​ជា​ក្រុមហ៊ុន​ផ្គត់ផ្គង់​បរិក្ខារ​ពេទ្យ និង​ប្រឹក្សា​សំណង់​។

អ្នក​ស្រី បាន​បង្ហាញ​ពី​ការ​យល់​ឃើញ​អំពី​គោល​គំនិត​របស់​ប្រជា​ពលរដ្ឋ​ដែល​មាន​ប្រាក់​ចំណូល​ខ្ពស់ និង​រស់​នៅ​ក្នុង​បុរី​ទៅ​លើ​ទីផ្សារ​អចលនទ្រព្យ​។

ដោយ​មាន​លំនៅ​ក្នុង​បុរី Camko City អ្នក​ស្រី​បាន​ឲ្យ​ដឹង​ថា ៖ «វិស័យ​នេះ​ធ្លាប់​មាន​ការ​រីក​ចម្រើន​ច្រើន​រហូត​មក​ដល់​បច្ចុប្បន្ន​នេះ​ដោយ​កាល​ពី​ពេល​មុន​នោះ​មិន​សូវ​ជា​មាន​ដៃ​គូ​ប្រកួត​ប្រជែង​ច្រើន​នោះ​ទេ​។ ប៉ុន្តែ​ទីផ្សារ​ដែល​ធំ​នៅ​ពេល​នេះ ក៏​នៅ​តែ​បន្ត​រីក​លូត​លាស់​ដែរ​។ ខ្ញុំ​អាច​និយាយ​បាន​ថា យូនីត​ទាំង​អស់​នៅ​ទី​នេះ​ត្រូវ​បាន​លក់​អស់​ហើយ ហើយ​ម្ចាស់​ម្នាក់​យ៉ាង​ហោច​ណាស់​ក៏​មាន​២​ទៅ​៣​យូនីត​ដែរ​»។

អ្នក​ស្រី​បាន​ប៉ាន់​ប្រមាណ​ថា តម្លៃ​ផ្ទះ​នៅ Camko City គឺ​រវាង​ពី​២០​ម៉ឺន ​ទៅ​២៤​ម៉ឺន​ដុល្លារ ក្នុង​មួយ​យូនីត។

ពេល​ដែល​សួរ​ថា តើ​ហេតុ​អ្វី​បាន​ជា​អ្នក​ស្រី​គិត​ថា រដ្ឋាភិបាល​នៅ​តែ​មិន​ផ្តល់​ជា​លំនៅឋាន​ដែល​មាន​តម្លៃ​ទាប ឬ​សមរម្យ​សម្រាប់​ប្រជាជន​ភាគ​ច្រើន​នៅ​ប្រទេស​កម្ពុជា​? អ្នក​ស្រី នីណា បាន​បញ្ជាក់ ថា ​៖ «​ខ្ញុំ​គិត​ថា មក​ពី​ប្រជាជន​ផ្តោត​សំខាន់​ទៅ​លើ​តែ​តំបន់​កណ្តាល​ទីក្រុង​ដែល​ធ្វើ​ឲ្យ​តម្លៃ​ដី និង​ផ្ទះ​នៅ​ទីក្រុង​កើន​ឡើង​»។

គួរ​ឲ្យ​ភ្ញាក់​ផ្អើល អ្នក​ដែល​មិន​សូវ​អើពើ​លើ​បញ្ហា​អចលនទ្រព្យ​ជាង​គេ គឺ​ប្រជា​ពលរដ្ឋ​ដែល​មាន​ចំណូល​ទាប​។

អ្នក​ស្រី ថា បូរ៉ានី ដែល​មាន​វ័យ ៦១​ឆ្នាំ ជា​អតីត​សិល្បករ​ខាង​ផ្នែក​របាំ​ប្រពៃណី​ខ្មែរ​ អ្នក​ស្រី​បាន​រស់នៅ​អគារ​ប៊ុល​ឌិញ​ស​អស់​រយៈ​ពេល​៣៦​ឆ្នាំ​មក​ហើយ​។

កាល​ពី​សប្តាហ៍​មុន អគារ​ប៊ុល​ឌិញ​ស ត្រូវ​បាន​គេ​រាយការណ៍​ថា នឹង​អាច​មាន​ការ​វាយ​កម្ទេច ហើយ​អ្នក​ស្រី បូរ៉ានី បាន​ទទួល​ស្គាល់​ថា អ្នក​ស្រី​នឹង​ធ្វើ​ទៅ​តាម​គម្រោង​អ្វី​ដែល​រដ្ឋាភិបាល​មាន​សម្រាប់​អ្នក​ដែល​ស្នាក់​នៅ​អគារ​នោះ បើ​ទោះ​ជា​អ្នក​ស្រី​ផ្ទាល់​បាន​ទទួល​ជា​ប្រាក់​សំណង​ប៉ុន្មាន​ក៏​ដោយ។

អ្នក​ស្រី​បន្ត​ថា​ ៖ «​ខ្ញុំ​មិន​ដឹង​ពី​ទីផ្សារ​អចលនទ្រព្យ​ទេ ហើយ​ខ្ញុំ​មិន​ដឹង​ថា អ្វីៗ​ដើរ​ទៅ​ទិស​ណា​ដែរ​ទេ​។ ខ្ញុំ​ខ្វល់​តែ​ពី​ការ​ចូល​និវត្តន៍​របស់​ខ្ញុំ​តែ​ប៉ុណ្ណោះ​។ ខ្ញុំ​នៅ​ផ្ទះ ហើយ​ដេរ​ខោអាវ​ស្លៀក​។ ក្រៅ​ពី​នោះ ខ្ញុំ​មិន​ចង់​បាន​អ្វី​ទេ​»​។

អ្នក​ស្រី បូរ៉ានី បាន​បញ្ចប់​ថា​ ៖ «​រដ្ឋាភិបាល សូម​កុំ​ឲ្យ​ប្រជាជន​ចេញ​ទៅ​ទាំង​ទឹក​ភ្នែក​។ ពួក​យើង​ចង់​រស់​នៅ ឬ​ក៏​ចាក​ចេញ​ទាំង​សប្បាយ​ចិត្ត​»៕

អត្ថបទគួរចាប់អារម្មណ៍