.jpg)
ទិដ្ឋភាពអគារខ្ពស់ៗក្នុងទីក្រុងបាងកក ប្រទេសថៃ។ រូបថត AFP
ក្រុងបាងកកៈ អ្នកទិញខុនដូ គួរតែដើរស៊ើបសួរតម្លៃសិនមុនពេលធ្វើការសម្រេចចិត្តទិញខុនដូណាមួយ ដោយសារខុនដូយូនីតជាច្រើនយូនីតដែលមិនទាន់លក់ចេញបាននិងកំពុងដាក់លក់ក្នុងតម្លៃក្រោមតម្លៃមុនពេលសាងសង់ (Presale price)។ នេះបើយោងតាមកាសែតបាងកកប៉ុស្តិ៍។
លោក Opas Sripayak ប្រធានប្រតិបត្តិក្រុមហ៊ុន LPN Development Plc ដែលចុះបញ្ជីនៅផ្សារហ៊ុនថៃបានប្រាប់កាសែតបាងកកប៉ុស្តិ៍ថា គម្រោងមួយចំនួនកំពុងដាក់លក់យូនីតខុនដូក្នុងតម្លៃទាបជាងកម្រិតតម្លៃមុនសាងសង់ ឬតម្លៃក្នុងអំឡុងពេលសាងសង់កាលពី ២-៣ ឆ្នាំមុនចំនួន ១៥ ភាគរយ ខណៈដែលក្រុមហ៊ុនអភិវឌ្ឍន៍ជាច្រើនចង់បញ្ចេញស្តុកផ្គត់ផ្គង់ឲ្យអស់។
លោកបញ្ជាក់ថា គម្រោងខុនដូជាច្រើនដែលបានដំណើរការកាលពីមុន និងបានបញ្ចប់នៅឆ្នាំមុនមានយូនីតជាច្រើនដែលលក់មិនទាន់ចេញ ដោយសារតែខុនដូទាំងនោះមានតម្លៃខ្ពស់ពេក ឬបានផ្តល់ជូនលក្ខណៈពិសេសដែលអតិថិជនអាចមិនត្រូវការ។
លោក Opas បានថ្លែងថា៖ «គម្រោងទាំងនោះមានបំណងទាក់ទាញចំណាប់អារម្មណ៍របស់អ្នកទិញ និងជំរុញការលក់តាមរយៈការបន្ថែមលក្ខណៈពិសេសដែលលើសពីតម្រូវការមូលដ្ឋាន»។ លោកបន្តថា៖ «ប៉ុន្តែការធ្វើដូច្នេះបានបង្កើនតម្លៃកាន់តែខ្ពស់ដែលអ្នកទិញជួនកាលមិនអាចទិញបាន»។
ក្នុងផ្នែកខុនដូតម្លៃទាបដែលមានតម្លៃ ៥០ ០០០ បាត (១ ៦៥០ ដុល្លារ) ក្នុង ១ ម៉ែត្រការ៉េ ឧទាហរណ៍គម្រោងមួយចំនួនបានដាក់លក់បន្ទប់ដែលមានពិតានខ្ពស់ជាងកម្ពស់ធម្មតាដែលមាន ២,៤ ម៉ែត្រក្នុងយូនីតជាច្រើនដើម្បីទាក់ទាញក្រុមអ្នកទិញ។
លក្ខណៈពិសេសមួយចំនួនដូចជាអាងហែលទឹកខ្នាតអូឡាំពិក ឬអាងហែលទឹកទំនើប ម៉ាស៊ីនទឹកក្ដៅ និងទឹកធ្លាក់អាចជាអ្វីដែលអតិថិជនទិសដៅមិនត្រូវការ។
លក្ខណៈបន្ថែមទាំងនេះបង្កើនតម្លៃលក់រហូតដល់ ៥០ ភាគរយធៀបនឹងលក្ខណៈពិសេសធម្មតា។ នេះបើយោងតាមលោក Opas។
លោកថ្លែងថា៖ «ក្រុមអ្នកទិញគួរតែពិចារណាថា តើពួកគេមានឱកាសប្រើប្រាស់ជាទៀងទាត់នូវលក្ខណៈពិសេសបន្ថែមទាំងនោះដែរឬទេនៅក្នុងការពិចារណាលើតម្លៃ»។ លោកបន្តថា៖ «ពួកគេមិនគួរពឹងផ្អែកលើអារម្មណ៍របស់ពួកគេក្នុងការសម្រេចចិត្តឡើយ ខណៈដែលមានជម្រើសជាច្រើនសម្រាប់ការផ្ដល់ជូន»។
កាសែតបាងកកប៉ុស្តិ៍បានរាយការណ៍ថា ខុនដូអាចមានតម្លៃខ្ពស់ពេក ដោយសារតែតម្លៃដីខ្ពស់ដែលកើនឡើងជាង ១០ ភាគរយក្នុង ១ ឆ្នាំនៅតាមតំបន់មួយចំនួន។
លោក Opas បានឲ្យដឹងទៀតថា កំណើនប្រាក់ចំណូលរបស់ប្រជាជន និងកំណើនសេដ្ឋកិច្ចមិនអាចតាមទាន់អត្រាកំណើនតម្លៃដីនោះទេ។
លោកបានឲ្យដឹងថា ការប្រកួតប្រជែងនៅលើទីផ្សារខុនដូនៅត្រីមាសទី ៤ នេះនឹងកាន់តែខ្លាំងឡើងៗ។
គម្រោងខុនដូជាច្រើនដែលបញ្ចប់ការសាងសង់រួចហើយ និងអាចផ្ទេរកម្មសិទ្ធិបានភ្លាមៗ និងមានសល់យូនីតដែលមិនទាន់លក់ចេញចំនួនច្រើនកំពុងដាក់លក់ក្នុងតម្លៃចុះភាគច្រើន។
ក្រុមហ៊ុន LPN មានខុនដូសង់រួច និងមិនទាន់លក់ចេញចំនួនប្រហែល ៤ ០០០ យូនីតដែលមានតម្លៃរួម ៨ ពាន់លានបាត។ ក្នុងចំនួននោះ ៥០០ យូនីតមានតម្លៃ ១ ពាន់លានបាតនឹងត្រូវដាក់លក់បញ្ចុះតម្លៃត្រឹមចុងខែនេះ។
ក្រុមហ៊ុន LPN រំពឹងថាយូនីតទាំងនេះនឹងលក់អស់ត្រឹមចុងឆ្នាំនេះ ហើយក្រុមហ៊ុនមានបំណងទទួលបានប្រាក់ចំណូល ៥ ពាន់លានបាតនៅត្រីមាសចុងក្រោយនៃឆ្នាំនេះ។
ប្រាក់ចំណូលក្នុងឆ្នាំ ២០១៩ នឹងមានចំនួនសរុប ១១ ពាន់លានបាតដែលរួមមាន ៧,៥ ពាន់លានបានពីខុនដូ ចំនួន ២,៥ ពាន់លានបានពីលំនៅឋានគ្រួសារទោល និងផ្ទះល្វែង និង ១ ពាន់លានបានពីសេវាកម្ម និងការជួល។
ក្រុមហ៊ុនគ្រោងចំណាយ ១៥០ លានបាតក្នុងដាក់ចេញគំនិតថ្មីមួយហៅថា តុល្យភាពកាន់តែប្រសើរ (better balance) ដើម្បីអប់រំអតិថិជនអំពីការជ្រើសរើសលំនៅឋានក្នុងក្ដីសុបិនដែលត្រូវនឹងរបៀបរស់នៅរបស់ពួកគេ។
តម្លៃភាគហ៊ុនក្រុមហ៊ុន LPN នៅពេលបិទការជួញដូរមិនប្រែប្រួលទេកាលពីថ្ងៃព្រហស្បតិ៍នៅលើផ្សារហ៊ុនថៃ ដោយត្រូវបានជួញដូរក្នុងតម្លៃ ៥,០៥ បាតដែលមានតម្លៃជួញដូរ ២០,១ លានបាត៕ LA
