សិង្ហបុរីៈ ទីផ្សារលំនៅឋានឯកជនបន្តងើបឡើងទៀតក្នុងខែវិច្ឆិកា ដោយការលក់កើនជិត ១៩ ភាគរយ ធៀបទៅនឹងខែតុលា បន្ទាប់ពីកើនឡើង ២២៥ ភាគរយ ក្នុងចំនួននៃផ្ទះថ្មីដែលបានដំណើរការលក់ផ្លូវការ។
កំណើនលក់កាលពីខែមុន ដល់ទៅ ៧៦៧ យូនីតពី ៦៤៥ ក្នុងខែតុលា ដែលកើតឡើងបន្ទាប់ពីការលក់ស្ទុះងើបបណ្តោះអាសន្នកាលពីខែតុលា បន្ទាប់ពីអាជ្ញាធរអភិវឌ្ឍន៍ទីក្រុង (URA) របស់សិង្ហបុរីបានបញ្ឈប់ការបោះផ្សាយឡើងវិញនូវជម្រើសទិញ (OTPs)។
អ្នកនាង Christine Sun ប្រធានក្រុមស្រាវជ្រាវ និងប្រឹក្សាយោបល់នៃក្រុមហ៊ុន OrangeTee & Tie បានលើកឡើងថា៖ «ការលក់ដំណើរការល្អក្នុងខែវិច្ឆិកា បង្ហាញថា មិនមែនគ្រប់ផ្នែកនៃទីផ្សារត្រូវរងផលប៉ះពាល់ដោយសារការរំខានថ្មីលើការចេញ OTPs នោះទេ។ មានអ្នកទិញស្មោះស្ម័គ្រជាច្រើន ដែលអាចលៃលកទិញលំនៅឋានឯកជន ដោយគ្មានការស្នើសុំពន្យារ OTPs»។
អ្នកនាងបាននិយាយថា ការជឿជាក់លើវ៉ាក់សាំងបានជំរុញទំនុកចិត្តអ្នកវិនិយោគចំពោះការងើបឡើងវិញនៃសេដ្ឋកិច្ចសិង្ហបុរី និងបង្កើនក្តីសង្ឃឹមដែលថា ការរីករាលដាលកូវីដ ១៩ ទូទាំងសកលលោកប្រហែលត្រូវបានគេគ្រប់គ្រងបានក្នុងពេលឆាប់ៗ។
អ្នកនាង Wong Siew Ying ប្រធានស្រាវជ្រាវ និងផែនការនៃក្រុមហ៊ុន PropNex បានលើកឡើងថា គម្រោងទាំងឡាយដែលមានស្រាប់បន្តលក់ជាធម្មតា៖ «ប្រហែល ៧០ ភាគរយ (ឬក៏ ៥៤០ យូនីត) នៃការលក់ក្នុងខែវិច្ឆិកា កើតពីគម្រោងដែលមាននៅលើទីផ្សារស្រាប់។
ក្រុមអ្នកវិភាគបាននិយាយថា ភាពនឹងធឹងនៃទីផ្សារលំនៅឋានឯកជន អាចមានឥទ្ធិពលខ្លាំងទៅក្នុងខែធ្នូ។
លោក Ismail Gafoor នាយកប្រតិបត្តិនៃ PropNex បានអះអាងថា ជាមួយការរឹតត្បិតការធ្វើដំណើរបណ្តាលមកពីការរីករាលដាលវីរុសដែលកាត់ផ្តាច់ផែនការវិស្សមកាលក្រៅប្រទេសជាច្រើន ខែទំនងមានអ្វីប្រែប្រួល ប៉ុន្តែជារយៈពេលអន់ថយសម្រាប់ការលក់អចលនទ្រព្យ។
លោកបាននិយាយថា ជាមួយគម្រោងថ្មី ២ ដែលចេញលក់ក្នុងខែធ្នូ គឺលំនៅឋាន Ki និង Clavon ដែលលក់អស់ ១៤៣ យូនីត និង ៤៤២ យូនីតរៀងគ្នា អំឡុងពេលបើកសម្ពោធរបស់ពួកគេ យើងរំពឹងការលក់ផ្ទះថ្មីនឹងមានដល់ ១ ០០០ យូនីត នៅក្នុងខែនេះ»។
គម្រោងថ្មីប្រមាណ ១៣ រំពឹងថា នឹងចូលទៅកាន់ទីផ្សារក្នុងខែខាងមុខនេះ រួមទាំងគម្រោង Normanton ដែលមាន ១ ៨៦២ យូនីត គម្រោង The Reef នៅតំបន់ King''s Dock ដែលមាន ៤២៩ យូនីត គម្រោង Midtown Modern មាន ៥៥៨ យូនីត។
លោក Nicholas Mak ប្រធានស្រាវជ្រាវ និង ប្រឹក្សាយោបល់នៃក្រុមហ៊ុន ERA Realty បាននិយាយថា គម្រោងលំនៅឋាន ២ គឺ Parc Central Residences និង Provence Residence ត្រូវរំពឹងថា នឹងសម្ពោធដាក់លក់នៅលើទីផ្សារ។
ប៉ុន្តែការលក់ក្នុងខែវិច្ឆិកានៅធ្លាក់ចុះ ៣៤ ភាគរយពី ១ ១៦៥ យូនីត ដែលបានលក់ក្នុងខែដូចគ្នាក្នុងឆ្នាំមុន។
ទិន្នន័យរបស់ URA បង្ហាញថា ប្រសិនបើខុនដូ EC ដែលជាគម្រោងកូនកាត់រវាងរដ្ឋ និងឯកជនត្រូវបានរាប់បញ្ចូលផ្ទះឯកជនថ្មី ៨១៥ ត្រូវបានលក់កាលពីខែមុន កើន ១៩ ភាគរយពីខែតុលា៕ ST_ANN/RR