.jpg)
ក្រុងបាងកកៈ ក្រុមហ៊ុនអភិវឌ្ឍន៍លំនៅឋានថៃ AP Thailand Plc ដែលចុះបញ្ជីក្នុងផ្សារហ៊ុនថៃ រំពឹងថា ការលក់មុនបញ្ចប់គម្រោង (presales) នឹងទទួលបានទឹកប្រាក់ចំនួន ៤៣ ពាន់លានបាត (១,៣ ពាន់លានដុល្លារ) និងទទួលបានប្រាក់ចំណូល ៣៥ ពាន់លានដុល្លារនៅចុងឆ្នាំ ២០១៨ ដែលខ្ពស់ជាងទិសដៅ ១០ ភាគរយ។ នេះបើតាមកាសែតបាងកកប៉ុស្តិ៍។
លោក Anuphong Assavabhokhin ប្រធានប្រតិបត្តិក្រុមហ៊ុន AP បានប្រាប់ កាសែតបាងកកប៉ុស្តិ៍កាលពីសប្តាហ៍មុនថា សម្ទុះនេះនឹងបន្តកើតមានក្នុងឆ្នាំ ២០១៩ បើទោះជាមានកត្តាអវិជ្ជមាននានា ដូចជាការដំឡើងអត្រាការប្រាក់ និងលក្ខខណ្ឌតម្រូវថ្មីរបស់ធនាគារកណ្តាលថៃស្តីពីកម្ចីទិញផ្ទះ ដែលចូលជាធរមាននៅខែមេសា ឆ្នាំ ២០១៩ ក្តី។
លោកបានថ្លែងថា៖ «វិធានថ្មីរបស់ធនាគារកណ្តាលមិនមានអ្វីថ្មីទេ ដោយសារកម្រិតកំណត់តម្លៃធៀបនឹងកម្ចីត្រូវបានអនុវត្តក្នុងឆ្នាំ ២០០៣ ហើយឥទ្ធិពលមានតិចតួចណាស់»។
លោកបន្ថែមថា៖ «ផលប៉ះពាល់ទីផ្សារនឹងមានរយៈពេលតែក្នុងខែដំបូងបន្ទាប់ពីវិធានថ្មីនេះចាប់ផ្តើមអនុវត្តប៉ុណ្ណោះ។ បន្ទាប់ពីនោះមក ស្ថានភាពនឹងវិលត្រឡប់ទៅរកប្រក្រតីវិញ»។
សម្រាប់រយៈពេល ១១ ខែក្នុងឆ្នាំនេះ ក្រុមហ៊ុន AP បានកត់ត្រាការលក់មុន ៤១,៥ ពាន់លានបាត ហើយរំពឹងថានឹងទទួលបាន ៤៣ ពាន់លានបាតនៅដំណាច់ឆ្នាំនេះ ដែលខ្ពស់ជាងទិសដៅដែលមាន ៣៩,៨ ពាន់លានបាត។
កាលពីឆ្នាំមុន ក្រុមហ៊ុននេះទទួលប្រាក់ពីការលក់មុននេះចំនួន ៤២,៩ ពាន់លានបាត ដែលខ្ពស់ជាងទិសដៅដែលមានតែ ២៦ ពាន់លានបាត និងកើនឡើងពី ២២,៤ ពាន់លានបាតក្នុងឆ្នាំ ២០១៦។
ទឹកប្រាក់ចំនួន ២១,៨ ពាន់លានបាតនៃការលក់មុននេះបានពីគម្រោងខុនដូ ដែលដំណើរការដោយក្រុមហ៊ុនបណ្តាក់ទុនរួមគ្នាជាមួយក្រុមហ៊ុនអភិវឌ្ឍន៍ជប៉ុន Mitsubishi Estate Group។
ក្រុមហ៊ុន AP ទទួលបានទឹកប្រាក់ចំនួន ១៩,៧ ពាន់លានបាតពីការលក់ផ្ទះកម្ពស់ទាបៗ (ផ្ទះទោល ផ្ទះ ២ ជាន់ និង townhouse) ដោយទទួលបានលទ្ធផលរឹងមាំនៅទូទាំងផ្នែកទាំងអស់។
ប្រាក់ចំណូលគិតត្រឹមដំណាច់ខែកញ្ញា ឆ្នាំ ២០១៨ សរុបមានចំនួន ២៧,១ ពាន់លានបាត កើនឡើង ៤៩ ភាគរយពីចំនួន ១៨ ពាន់លានបាតក្នុងរយៈពេលដូចគ្នាកាលពីឆ្នាំ ២០១៧។ ចំណែកដែលចូលរួមចម្បងក្នុងកំណើនប្រាក់ចំណូលនេះគឺគម្រោងខុនដូទំនើប Vittorio Residence ដែលស្ថិតនៅតាមបណ្តោយផ្លូវ Sukhumvit Soi 39 ដែលមានតម្លៃ ៣,២ ពាន់លានបាត ដែលត្រូវបានលក់ចេញអស់នៅត្រីមាសទី ៣។
ក្រុមហ៊ុន AP រំពឹងថា នៅដំណាច់ឆ្នាំនេះនឹងទទួលបានប្រាក់ចំណូលចំនួន ៣៥ ពាន់លានបាត ខ្ពស់ជាងទិសដៅដែលមានតែ ៣២ ពាន់លានបាត។ កត្តាចូលរួមចំណែកសំខាន់មួយចំពោះប្រាក់ចំណូលនៅត្រីមាសទី ៤ នេះ នឹងជាគម្រោងផ្ទះទោលតម្លៃខ្ពស់ Palazzo Srinakarin ដែលមានតម្លៃចាប់ពី ២៩ លានបាតឡើងទៅក្នុង ១ ខ្នង។
លោក Anuphong បានមានប្រសាសន៍ថា៖ «យើងមិនចាំបាច់ប្រើប្រាស់យុទ្ធនាការនានា ដើម្បីពន្លឿនការផ្ទេរកម្មសិទ្ធិក្នុងរយៈពេល ២ ខែចុងក្រោយនេះទេ ដោយសារយើងបានឈានដល់ទិសដៅយើងរួចទៅហើយ»៕ KC
