វ៉ាស៊ីនតោនៈ ការលក់លំនៅឋានថ្មីនៅអាមេរិក បានកើនឡើងកាលពីខែមុន ប៉ុន្តែជាការកើនឡើងតិចតួចជាងការរំពឹងទុក ដែលនេះជាការបន្តចុះខ្សោយជាប់ៗគ្នាក្នុងវិស័យលំនៅឋាននៅអាមេរិក។ នេះបើយោងតាមទិន្នន័យពីរដ្ឋាភិបាលដែលបានចេញផ្សាយកាលពីថ្ងៃពុធ។
កំណើនការលក់លំនៅឋានលក្ខណៈគ្រួសារតូចថ្មីៗកាលពីខែមិថុនា បានស្ទុះងើបឡើងវិញពីការធ្លាក់ចុះរយៈពេល ២ ខែ ដោយការលក់ក្នុងខែឧសភា គឺទាបជាងការរាយការណ៍បឋម។
ប៉ុន្តែបន្ថែមទៅនឹងការបង្ហាញទិន្នន័យថ្មី ការលក់លំនៅឋានចាស់ៗ ក៏បានធ្លាក់ចុះផងដែរ ដែលការធ្លាក់ចុះនេះបានធ្វើឲ្យមានក្តីបារម្ភទៅដល់ក្រុមសេដ្ឋវិទូមួយចំនួន។
ការលក់ផ្ទះថ្មីកាលពីខែមិថុនា បានកើនឡើង ៧ ភាគរយ បើធៀបនឹងខែឧសភា ដល់អត្រាប្រចាំឆ្នាំចំនួន ៦៤៦ ០០០ យូនីត។
ចំនួននេះអាចត្រូវបានប្រែប្រួល ហើយក្រុមមន្ដ្រីបានព្រមានថា និន្នាការជាច្រើនត្រូវការរយៈពេល ៤ ខែ ដើម្បីកើនឡើងវិញ។
ប៉ុន្តែកំណើនទីផ្សារលំនៅឋានយឺត អាចជាសញ្ញាមួយនៃសកម្មភាពសេដ្ឋកិច្ចកាន់តែខ្សោយ និងកាត់បន្ថយប្រភេទផ្សេងទៀតជាច្រើន ដូចជាការលក់គ្រឿងសង្ហារិម និងការលក់ឧបករណ៍ប្រើប្រាស់ក្នុងផ្ទះ ដែលអាចវាស់វែងលើការគណនានៃផលិតផលក្នុងស្រុកសរុប (GDP)។
តម្លៃមធ្យមសម្រាប់ផ្ទះថ្មី បានកើនឡើង ៥,៩ ភាគរយ ដល់ ៣១០ ៤០០ ដុល្លារ ជាការស្ទុះងើបឡើងវិញធៀបនឹងខែឧសភា ប៉ុន្តែនៅតែស្ថិតក្រោមខែមេសា។ តម្លៃជាមធ្យមបានធ្លាក់ចុះ គឺបានបង្ហាញការចុះខ្សោយតម្រូវការសម្រាប់លំនៅឋានប្រណីត។
ចំនួនផ្ទះដែលមិនទាន់លក់ចេញ មិនផ្លាស់ប្តូរច្រើនទេ ជាមួយនឹងលំនៅឋានថ្មី ៣៣៨ ០០០ ត្រូវបានដាក់ទៅចូលនៅលើទីផ្សារកាលពីចុង ខែមិថុនា ដែលតំណាងឲ្យការផ្គត់ផ្គង់រយៈពេល ៦ ខែ នៅក្នុងល្បឿនការលក់បច្ចុប្បន្ន។
ក្នុងទីផ្សារកាន់តែធំសម្រាប់លំនៅឋានចាស់ៗ សកម្មភាពមានការចុះខ្សោយគួរឲ្យភ្ញាក់ផ្អើល បើទោះបីតម្លៃការលក់កាលពីខែមុន បានកើនឡើងដល់កម្រិតខ្ពស់បំផុតថ្មីក៏ដោយ។ នេះបើតាមទិន្នន័យការស្ទង់មតិឯកជនដែលចេញផ្សាយកាលពីថ្ងៃអង្គារ។
លោក Ian Shepherdson នៅក្រុមហ៊ុន Pantheon Macroeconomics បានឲ្យដឹងថា ការដាក់ពាក្យសុំកម្ចីទិញផ្ទះនៅពេលនេះបង្ហាញការលក់អាចកើនឡើងនៅឆមាសទី២ ឆ្នាំ ២០១៩។
លោកថ្លែងថា៖ «ការលក់ផ្ទះថ្មី មានដំណើរការយឺតបន្តិច យើងរំពឹងថា ការលក់កាន់តែរឹងមាំ នៅក្នុងឆមាសទី២ ឆ្នាំ ២០១៩ នេះ»៕ AFP/LA