.jpg)
អគារខុនដូគំរូ ដាក់តាំងបង្ហាញក្នុងកម្មវិធីមួយនៅក្រុងប៉េកាំង។ រូប AFP
ក្រុងប៉េកាំងៈ ការលក់អចលនទ្រព្យក្នុងទីក្រុងសំខាន់ៗរបស់ប្រទេស ចិន ត្រូវបានរំពឹងថានឹងបន្តធ្លាក់ចុះក្នុងត្រីមាសទី១ ក្នុងឆ្នាំ ២០១៩ នេះ ខណៈដែលរដ្ឋាភិបាលថ្នាក់មូលដ្ឋានបង្កើនល្បឿនបទប្បញ្ញត្តិគ្រប់គ្រងទីផ្សារលំនៅឋាន។
ការលក់លំនៅឋានពាណិជ្ជកម្មសរុបនៅក្នុងទីក្រុងចំនួន ៤០ ដែលតាមដានដោយទីភ្នាក់ងារស្រាវជ្រាវអចលនទ្រព្យ E-house China R&D Institute ធ្លាក់ចុះ ៣១ ភាគរយនៅខែមករាធៀបនឹងខែធ្នូ។
ធៀបនឹងខែមករា ឆ្នាំ ២០១៨ ការធ្លាក់ចុះមាន ១៤ ភាគរយ ដោយការលក់លំនៅឋានក្នុងទីក្រុងលំដាប់ទី៣ និងទី៤ បានធ្លាក់ចុះ ២១ ភាគរយ។
លោក Shen Xin ដែលជាអ្នកស្រាវជ្រាវប្រចាំក្រុមហ៊ុន E-house បានថ្លែងថា កត្តាដែលបង្កឲ្យមានការធ្លាក់ចុះនេះគឺដោយសារអាជ្ញាធរមូលដ្ឋាននិងអាជ្ញាធរកណ្តាលកំពុងខិតខំទប់ស្កាត់ការទិញលំនៅឋានសម្រាប់ទុកលក់កេងយកចំណេញ និងទប់ស្កាត់ការរក្សាតម្លៃឲ្យមានស្ថិរភាព។
លោកបានថ្លែងបន្តថា ចំនួនកិច្ចព្រមព្រៀងនៅក្នុងទីក្រុងទាំង ៤០ នេះត្រូវបានរំពឹងថានឹងបន្តធ្លាក់ចុះនៅក្នុងត្រីមាសទី១ ដែលអាចនឹងធ្លាក់ចុះបន្ថែមទៀតនៅក្នុងទីក្រុងលំដាប់ទី២ ដល់ទី៤។
ទិវាសន្និសីទការងារសេដ្ឋកិច្ចកណ្តាលប្រចាំឆ្នាំបានអំពាវនាវឲ្យមានយន្តការរយៈពេលវែងដើម្បីរក្សាការអភិវឌ្ឍរឹងមាំរបស់ទីផ្សារអចលនទ្រព្យ ក្រោមគោលការណ៍ដែលថា «លំនៅឋានគឺសម្រាប់រស់នៅ មិនមែនសម្រាប់ទុកលក់យកចំណេញទេ» ដែលអ្នកវិភាគបានឲ្យដឹងថា គោលការណ៍នេះនឺងមានឥទ្ធិពលសម្រាប់បទប្បញ្ញត្តិទីផ្សារអចលនទ្រព្យរបស់ចិននាឆ្នាំនេះ៕ People''s Daily/PS
