ក្រុងវ៉ាស៊ីនតោនៈ ការសាងសង់លំនៅឋានថ្មីនៅអាមេរិកបានធ្លាក់ចុះរយៈពេល ២ ខែ ជាប់គ្នាគិតត្រឹមខែមិថុនា ដោយសារតែក្រុមហ៊ុនអភិវឌ្ឍន៍បានសាងសង់អាផាតមានកាន់តែតិចនៅតំបន់ភាគខាងលិច និងតំបន់ភាគខាងត្បូងរបស់ប្រទេស។ នេះបើយោងតាមទិន្នន័យផ្លូវការដែលចេញផ្សាយនៅសប្តាហ៍មុន។
ល្បឿននៃការសាងសង់ផ្ទះថ្មីនេះហាក់ដូចជានឹងកាន់តែថមថយបន្ថែមទៀត ដោយសារការចេញលិខិតអនុញ្ញាតសម្រាប់ការសាងសង់ថ្មីៗនូវលំនៅឋានដែលត្រូវការចាំបាច់ខ្លាំងបានធ្លាក់ចុះឥតរំពឹងទុក ពោលគឺធ្លាក់មកនៅត្រឹមកម្រិតទាបបំផុតក្នុងរយៈពេល ២ ឆ្នាំ ដែលការធ្លាក់ចុះនេះត្រូវបាននាំមុខដោយការធ្លាក់ចុះយ៉ាងខ្លាំងនៅតំបន់ភាគខាងលិច និងតំបន់ភាគខាងត្បូង។
វិស័យលំនៅឋាន គឺជាវិស័យដ៏សំខាន់មួយនៃសេដ្ឋកិច្ចរបស់អាមេរិក ដែលជួយជំរុញការចំណាយរបស់អតិថិជន និងបម្រើជាម៉ែត្រវាស់វែងមួយនៃសុខុមាលភាពសេដ្ឋកិច្ចរបស់អាមេរិក។
ប៉ុន្តែ ខណៈពេលដែលការសាងសង់មានការកើនឡើងតិចតួចនៅត្រីមាសទី២ ធៀបនឹងការសាងសង់កាលពីដើមឆ្នាំនេះ ការសាងសង់នេះមិនកំពុងរក្សាបានទៅតាមល្បឿនតម្រូវការនោះទេ។
ក្រសួងពាណិជ្ជកម្មអាមេរិកបានរាយការណ៍ថា ការសាងសង់លំនៅឋានបានធ្លាក់ចុះ ០,៩ ភាគរយ កាលពីខែមិថុនា ធៀបនឹងខែឧសភា ដែលធ្លាក់ចុះមកនៅត្រឹមអត្រាប្រចាំឆ្នាំ ១,២៥ លានខ្នង ដែលកែតម្រូវតាមរដូវកាល។
ចំនួននោះមានកម្រិតទាបជាងការព្យាកររបស់ក្រុមសេដ្ឋវិទូ និងទាបជាងតួលេខកាលពីខែមិថុនាឆ្នាំមុនជាង ៦ ភាគរយ។
ការចេញលិខិតអនុញ្ញាតសម្រាប់គម្រោងសាងសង់ថ្មីៗ បានធ្លាក់ចុះ ៦ ភាគរយ មកនៅត្រឹមកម្រិតទាបបំផុតចាប់តាំងពីខែឧសភាឆ្នាំ ២០១៧ និងទាបជាងកម្រិតកាលពី ១ ឆ្នាំមុន ៦,៦ ភាគរយ។
ទោះជាយ៉ាងណា ការធ្លាក់ចុះការចេញលិខិតអនុញ្ញាតនេះកើតមាននៅវិស័យអាផាតមិនដែលប្រែប្រួលខ្លាំងដែលបានធ្លាក់ចុះជិត ២១ ភាគរយ នៅខែមិថុនា។
ក្រុមមន្ដ្រីបានព្រមានថា ទិន្នន័យប្រចាំខែនេះ មានកម្រិតលម្អៀងខ្លាំង។
ទោះបីជាអត្រាគ្មានការងារធ្វើមានកម្រិតទាប ប្រាក់ឈ្នួលកើនឡើង និងអត្រាកម្ចីទិញផ្ទះធ្លាក់ចុះក្តី ក៏ទំនុកចិត្តក្នុងចំណោមក្រុមហ៊ុនអភិវឌ្ឍន៍លំនៅឋាននៅអាមេរិកមិនពុះកញ្ជ្រោលឡើយក្នុងរយៈពេលប៉ុន្មានខែថ្មីៗនេះ។ ក្រុមអ្នកវិភាគស្ដីបន្ទោសកត្តានេះថា បណ្តាលមកពីកង្វះកម្លាំងពលកម្ម និងការកើនចំណាយលើសម្ភារ។
ក្រុមសេដ្ឋវិទូបានឲ្យដឹងថា ទីផ្សារលំនៅឋានទំនងជានឹងកើនឡើងនៅចុងឆ្នាំនេះ ដើម្បីឆ្លើយតបតាមតម្រូវការដ៏រឹងមាំ។
លោក Ian Shepherdson មកពីក្រុមហ៊ុន Pantheon Macroeconomics បានឲ្យដឹងនៅក្នុងរបាយការណ៍ស្រាវជ្រាវមួយថា ក្នុងគ្រាដែលមានការកើនឡើងការដាក់ពាក្យសុំកម្ចីទិញផ្ទះ «យើងរំពឹងថា ការលក់លំនៅឋាននឹងកើនដល់កម្រិតខ្ពស់ថ្មីនៅចុងរដូវក្ដៅ ឬដើមរដូវស្លឹកឈើជ្រុះ ដែលនឹងបង្កើនការសាងសង់ផ្ទះនៅពេលនោះ»៕ AFP/LA