ក្រុងវ៉ាស៊ីនតោនៈ ទិន្នន័យរបស់រដ្ឋាភិបាលអាមេរិកបានបង្ហាញកាលពីថ្ងៃអង្គារថា ការសាងសង់លំនៅឋានថ្មីបានធ្លាក់ចុះខ្លាំងដោយមិននឹកស្មាននៅទូទាំងសហរដ្ឋអាមេរិកកាលពីខែធ្នូ មកនៅត្រឹមកម្រិតទាបបំផុតរបស់ខ្លួនក្នុងរយៈពេលជាង ២ ឆ្នាំ។
ទិន្នន័យក្រសួងពាណិជ្ជកម្មដែលត្រូវបានពន្យារពេលចេញផ្សាយដោយសារតែការបិទរដ្ឋាភិបាលចាប់ពីខែធ្នូដល់ខែមករា បានចេញផ្សាយក្នុងគ្រាដែលមានការធ្លាក់ចុះយ៉ាងខ្លាំងនៅតំបន់ហិរញ្ញវត្ថុ Wall Street ដែលក្រុមសេដ្ឋវិទូឲ្យដឹងថា អាចធ្វើឲ្យយឺតយ៉ាវដល់ការវិនិយោគក្នុងវិស័យមួយចំនួនទៀត។
ទោះបីជាការធ្លាក់ចុះការសាងសង់ក៏ដោយ ក៏តួលេខក្នុងទិន្នន័យស្ដីពីការអនុញ្ញាតការសាងសង់បានចង្អុលទៅរកការស្ទុះងើបឡើងវិញក្នុងការសាងសង់អាផាតមិន ដែលជាប្រភេទលំនៅឋានងាយប្រែប្រួល។
ក្រសួងពាណិជ្ជកម្មអាមេរិកបានឲ្យដឹងទៀតថា ការចាប់ផ្ដើមការសាងសង់លំនៅឋានសរុប បានធ្លាក់ចុះ ១១,២ ភាគរយមកនៅត្រឹមអត្រាប្រចាំឆ្នាំ ១,០៨ លានយូនីតដែលកែតម្រូវតាមរដូវកាល ពោលគឺទាបជាងអ្វីដែលក្រុមសេដ្ឋវិទូកំពុងរំពឹងទុក និងជាចំនួនទាបបំផុតគិតចាប់តាំងពីខែកញ្ញា ឆ្នាំ ២០១៦ មក។
ការចាប់ផ្ដើមសាងសង់លំនៅឋានលក្ខណៈគ្រួសារទោល បានធ្លាក់ចុះក្នុងរយៈពេល ៤ ខែជាប់គ្នា។
តួលេខនៃការអនុញ្ញាតសាងសង់ដែលបានចេញ គឺជាសញ្ញាមួយនៃការសាងសង់នៅក្នុងផែនការជាបន្តបន្ទាប់ បានកើនឡើងខ្ពស់ជាងការរំពឹងទុក គឺដល់អត្រាប្រចាំឆ្នាំ ១,៣៣ លានយូនីត ដែលត្រូវបានជំរុញដោយការកើនឡើងភ្លាមៗនៃការអនុញ្ញាតការសាងសង់អាផាតមិន។
ការចុះខ្សោយក្នុងវិស័យលំនៅឋានកាលពីឆ្នាំមុន បានបណ្ដាលឲ្យមានការបារម្ភចំពោះកំណើនសេដ្ឋកិច្ចអាមេរិកក្នុងរយៈពេលខ្លី ប៉ុន្តែក្រុមអ្នកវិភាគបានឲ្យដឹងថា តម្រូវការត្រូវបានរំពឹងថានឹងស្ទុះងើបឡើងវិញនៅឆ្នាំនេះ ដោយសារតែតម្លៃផ្ទះធ្លាក់ចុះ។
តួលេខកាលពីខែធ្នូ ឆ្នាំមុន ភាគច្រើន អាចមិនត្រឹមត្រូវទាំងស្រុងឡើយ ហើយក្រុមមន្ដ្រីបានព្រមានថានិន្នាការនានា អាចត្រូវការរយៈពេល ៦ ខែទើបលេចឡើង។
ប៉ុន្តែលោក Ian Shepherdson បម្រើការនៅក្រុមហ៊ុន Pantheon Macroeconomics បានឲ្យដឹងកាលពីថ្ងៃអង្គារថា តួលេខខែធ្នូ «គួរឲ្យបារម្ភ» ប៉ុន្តែមិនទំនងជានឹងធ្លាក់ចុះ បន្ថែមទៀតនោះទេ។
ភាពចលាចលនៅក្នុងតំបន់ហិរញ្ញវត្ថុ Wall Street របស់អាមេរិកកាលពីខែធ្នូ «ច្បាស់ណាស់បានបន្លាចក្រុមហ៊ុនសាងសង់លំនៅឋាន ដូច្នេះការស្ទុះងើបឡើងវិញក្នុងទីផ្សារនេះនៅឆ្នាំនេះ គួរតែត្រូវបានដើរតាមពីក្រោយដោយការស្ទុះងើបឡើងវិញក្នុងសកម្មភាពការសាងសង់ក្នុងរយៈពេល ២-៣ ខែក្រោយ»៕ AFP/LA