.jpg)
កម្មករកំពុងធ្វើការលើគ្រោងដែកសំណង់អគារមួយនៅក្រុងម៉ៃអាមី។ រូបថត AFP
ក្រុងវ៉ាស៊ីនតោនៈ គម្រោងសាងសង់លំនៅឋានដែលបានចាប់ផ្ដើមកាលពីខែកក្កដាឆ្នាំនេះនៅសហរដ្ឋអាមេរិកបានធ្លាក់ចុះខ្លាំងគ្មានរំពឹងទុកជាមុនធៀបនឹងខែមិថុនា ដោយសារតែការធ្លាក់ចុះយ៉ាងខ្លាំងក្នុងផ្នែកសាងសង់អាផាតមិន។ នេះបើយោងតាមទិន្នន័យចេញផ្សាយនៅខែសីហានេះ។
ក្រសួងពាណិជ្ជកម្មអាមេរិកបានឲ្យដឹងថា ការធ្លាក់ចុះនេះបានរីករាលដាលនៅទូទាំងប្រទេសនេះជាមួយនឹងការធ្លាក់ចុះខ្លាំងគ្រប់ទីកន្លែងលើកលែងតែនៅតំបន់ភាគខាងលិច។
ការធ្លាក់ចុះខ្លាំង ២ ដងជាប់គ្នាគឺជាព័ត៌មានកាន់តែអាក្រក់នៅក្នុងវិស័យនេះដែលជាវិស័យដ៏សំខាន់របស់សេដ្ឋកិច្ចអាមេរិកដែលបានប្រឈមនឹងឧបសគ្គនានាដោយសារតែកង្វះកម្មករការចំណាយកាន់តែខ្ពស់លើសម្ភារមួយចំនួន និងការកើនឡើងតម្លៃផ្ទះដែលបានរារាំងអនាគតអ្នកទិញលំនៅឋាន។
គម្រោងថ្មីៗដែលបានចាប់ផ្ដើមកាលពីខែមុនបានធ្លាក់ចុះ ៤ ភាគរយធៀបនឹងខែមិថុនាមកនៅត្រឹមអត្រាប្រចាំឆ្នាំ ១,១៩១ លានខ្នងដែលត្រូវបានកែតម្រូវតាមរដូវពោលគឺនៅក្រោមអ្វីដែលក្រុមអ្នកវិភាគបានរំពឹងទុក។ នេះបើយោងតាមទិន្នន័យនេះ។
អ្វីដែលជាចំណុចល្អនោះ គឺការអនុញ្ញាតសាងសង់បានកើនឡើង ៨,៤ ភាគរយដែលស្ទុះងើបឡើងវិញពីកម្រិតទាបបំផុតក្នុងរយៈពេល ២ ឆ្នាំ។ ការកើនឡើងនេះបានផ្ដល់ក្ដីសង្ឃឹមថា ការផ្គត់ផ្គង់នឹងកើនឡើង និងកាត់បន្ថយសម្ពាធមួយចំនួន ជាពិសេសសម្រាប់វិស័យអាផាតមិន។
ជាមួយនឹងការកើនឡើងតម្លៃលំនៅឋានគ្រួសារទោល តម្រូវការបានកើនឡើងសម្រាប់អាផាតមិនសម្រាប់ជួល ប៉ុន្តែការសាងសង់យូនីតពហុគ្រួសារបានធ្លាក់ចុះ ១៧,២ ភាគរយកាលពីខែកក្កដា និងធ្លាក់ចុះ ៤,៧ ភាគរយធៀបនឹងរយៈពេលដូចគ្នានៅឆ្នាំ ២០១៨។
ប៉ុន្តែក្រសួងពាណិជ្ជកម្មអាមេរិកបានរាយការណ៍ថា ការអនុញ្ញាតការសាងសង់ដែលបានចេញសម្រាប់គម្រោងអាផាតមិនកើនឡើងជិត ២៥ ភាគរយ។
ក្រុមមន្ដ្រីបានរំឭកថា ទិន្នន័យប្រចាំខែនេះអាចនឹងមានកម្រិតលម្អៀងធំ ហើយវាអាចត្រូវការរយៈពេល ៦ ខែមុនពេលមានមាននិន្នាការថ្មីមួយ។
លោក Ian Shepherdson មកពីក្រុមហ៊ុន Pantheon Macroecono-mics ឲ្យដឹងថា លោករំពឹងថាការលក់នឹងកើនឡើងនៅក្នុងឆមាសទី ២ ឆ្នាំនេះដែលនឹងជំរុញការសាងសង់ថ្មី។
លោកបានឲ្យដឹងនៅក្នុងរបាយការណ៍ស្រាវជ្រាវមួយថា៖ «ក្រុមហ៊ុនសាងសង់លំនៅឋានមានការប្រុងប្រយ័ត្ន ប៉ុន្តែការធ្លាក់ចុះអត្រាការប្រាក់កម្ចីទិញផ្ទះនៅក្នុងរយៈពេលប៉ុន្មានសប្ដាហ៍ថ្មីៗនេះនឹងជំរុញការលក់ ហើយសកម្មភាពការសាងសង់នឹងកើតឡើងតាមនោះ»៕ LA
