ក្រុងហាណូយៈ ឧស្សាហកម្មទេសចរណ៍ដែលកំពុងកើនឡើង និងសេដ្ឋកិច្ចកំពុងត្រចះត្រចង់របស់ប្រទេសវៀតណាមបានទាក់ទាញចំណាប់អារម្មណ៍ក្នុងទីផ្សារសណ្ឋាគារ និងរមណីយដ្ឋានរបស់ប្រទេសនេះពីវិនិយោគិននៅទូទាំងតំបន់ ដែលធ្វើឲ្យវៀតណាមក្លាយជាទីផ្សារមួយក្នុងចំណោមទីផ្សារដែលគេនិយាយខ្លាំងបំផុតក្នុងតំបន់អាស៊ីប៉ាស៊ីហ្វិក។
យោងតាមក្រុមហ៊ុន Jones Lang Lasalle Property (JLL) ការរស់ឡើងវិញរបស់ឧស្សាហកម្មនេះបានជំរុញឲ្យមានតម្រូវការសណ្ឋាគាររបស់សាជីវកម្មនៅទូទាំងប្រទេស ខណៈការលើកលែងទិដ្ឋាការការភ្ជាប់ជើងហោះហើរត្រង់ថ្មី និងការធ្វើទីផ្សារដែលមានភាពប្រសើរឡើងបានជំរុញភាពទាក់ទងរបស់ប្រទេសនេះចំពោះអ្នកធ្វើដំណើរកម្សាន្ត។
ដូចប្រទេសជាច្រើនទៀតនៅតំបន់អាស៊ីអាគ្នេយ៍ដែរ តម្រូវការធ្វើដំណើរកម្សាន្តត្រូវបានជំរុញដោយភ្ញៀវទេសចរជនជាតិចិនដីគោកដែលបានកើនឡើងដល់កម្រិតខ្ពស់បំផុតកាលពីឆ្នាំមុនទាក់ទងនឹងកំណើននៃការមកដល់។
កាលពីឆ្នាំមុនវៀតណាមបានទទួលភ្ញៀវទេសចរអន្តរជាតិចំនួន ១៥,៥ លាននាក់ កើនឡើង ១៩,៩ ភាគរយធៀបនឹងឆ្នាំ ២០១៧ ។ នេះបើយោងតាមរដ្ឋបាលជាតិទេសចរណ៍វៀតណាម (VNAT)។
ចំនួនអ្នកទស្សនាអន្តរជាតិដែលធ្វើដំណើរទៅកម្សាន្តនៅប្រទេសវៀតណាមគិតត្រឹមខែតុលាបានកើនឡើងដល់ ១៤,៥ លាននាក់កើនឡើង ១៣ ភាគរយធៀបនឹងរយៈពេលដូចគ្នាកាលពីឆ្នាំមុន។
ក្នុងនាមជាមជ្ឈមណ្ឌលសេដ្ឋកិច្ច និងទេសចរណ៍ធំបំផុតទាំង ៣ ទីក្រុងហូជីមិញ ទីក្រុងហាណូយ និងទីក្រុងដាណាងមើលឃើញកំណើនភ្ញៀវទេសចរក្នុងអំឡុងពេលដូចគ្នានេះ ហើយទីក្រុងទាំង ៣ នេះក៏បានរាយការណ៍ពីការសាងសង់បន្ទប់សណ្ឋាគារបន្ថែមផងដែរ ដើម្បីបំពេញតម្រូវការ។
គិតត្រឹមខែកញ្ញាការមកដល់របស់ភ្ញៀវទេសចរនៅទីក្រុងហូជីមិញបានកើនឡើង ១៤,៣ ភាគរយធៀបនឹងពេលដូចគ្នានៅឆ្នាំមុន។ នៅឆ្នាំនេះទីក្រុងនេះបានកត់ត្រាបន្ទប់សណ្ឋាគារថ្មីចំនួន ១ ១១៤ បន្ទប់ដែលធ្វើឲ្យចំនួនបន្ទប់សរុបកើនដល់ ២០ ២០០ បន្ទប់។ នៅដំណាច់ឆ្នាំ ២០២១ ការផ្គត់ផ្គង់បន្ទប់សណ្ឋាគាររបស់ទីក្រុងនេះត្រូវបានព្យាករថានឹងកើនដល់ ២២ ០០០ បន្ទប់ ដែល ៥៥,៤ ភាគរយនៃចំនួននេះនឹងជាបន្ទប់ទំនើប។
កំណើននៃការមកដល់របស់ភ្ញៀវទេសចរក្នុងទីក្រុងហាណូយមានចំនួន ៩,៥ ភាគរយគិតត្រឹមខែកញ្ញាឆ្នាំនេះ។ នៅត្រីមាសទី ៤ ឆ្នាំនេះបន្ទប់ចំនួន ១ ០០៨ នឹងត្រូវបានបន្ថែមទៅក្នុងវិស័យសណ្ឋាគាររបស់រដ្ឋធានីនេះដែលធ្វើការផ្គត់ផ្គង់សរុបកើនដល់ ១៨ ៦៩៩ បន្ទប់ ដែលប្រហែល ៩៧ ភាគរយនៃការផ្គត់ផ្គង់ថ្មីនេះគឺជាបន្ទប់មធ្យម និងបន្ទប់ទំនើប។
នៅដំណាច់ឆ្នាំ ២០២១ រដ្ឋធានីហាណូយនឹងមានចំនួនជាង ២០ ៤០០ បន្ទប់ដែលប្រហែល ៥៩,៨ ភាគរយគឺជាបន្ទប់ទំនើប។
ជាមួយកំណើនភ្ញៀវទេសចរ ២៦,១ ភាគរយគិតត្រឹមខែកក្កដាឆ្នាំនេះ ក្នុងអំឡុងឆ្នាំ ២០១៩-២០២១ ទីក្រុងដាណាងរំពឹងថានឹងបន្ថែមបន្ទប់ថ្មី ៩ ៤៧៩ ទៀតទៅក្នុងការផ្គត់ផ្គង់បច្ចុប្បន្នដែលក្នុងនោះ ៨១,១ ភាគរយព្យាករថានឹងជាបន្ទប់ទំនើប និងបន្ទប់មធ្យម។
ការវិនិយោគលើសណ្ឋាគារកាន់តែមានច្រើន វិនិយោគិនកាន់តែស្គាល់រសជាតិផ្សេងៗ។
ដោយសារកំណើនទេសចរណ៍ និងសេដ្ឋកិច្ច ទីផ្សារប្រតិបត្តិការទិញលក់សណ្ឋាគារក្នុងប្រទេសវៀតណាមមានភាពមមាញឹកនៅឆ្នាំនេះ។
យោងតាមក្រុមអ្នកជំនាញអចលនទ្រព្យក្នុងប្រទេសវៀតណាម វិនិយោគិនបរទេសកំពុងស្វែងរកឱកាសវិនិយោគដែលមានប្រាក់ចំណេញខ្ពស់ក្នុងការប្រតិបត្តិការទ្រព្យសកម្មសណ្ឋាគារដែលមានលំហូរសាច់ប្រាក់រួចស្រេច ខណៈវិនិយោគិនក្នុងស្រុកភាគច្រើនចង់អភិវឌ្ឍសណ្ឋាគារ និងរមណីយដ្ឋានពីដីធំទំនេរធំៗ។
ប្រតិបត្តិការដែលកំពុងធ្វើឡើងមួយចំនួនក្នុងទីផ្សារនៅឆ្នាំនេះ រួមមានការលក់រមណីយដ្ឋាន Ho Tram Grand Strip ទៅឲ្យក្រុមហ៊ុន Warburg Pincus ខណៈក្រុមហ៊ុន Berjaya Group បានផ្ទេរភាគហ៊ុន ៧៥ ភាគរយនៃភាគហ៊ុនរបស់រមណីយដ្ឋាន TPC Nghi Tam Village ទៅឲ្យក្រុមហ៊ុន Hanoi Hotel Tourism Development។
រមណីយដ្ឋាន TPC Nghi Tam Village កាន់កាប់ដោយសណ្ឋាគារ Intercontinental Hotel ក្នុងទីក្រុងហាណូយដែលមានតម្លៃជាង ៥៣,៤ លានដុល្លារ។
កាលពីថ្ងៃទី ៧ ខែវិច្ឆិកា សណ្ឋាគារ InterContinental Hotels Group (IHG) បានចុះហត្ថលេខាលើកិច្ចព្រមព្រៀងជាមួយក្រុមហ៊ុន Ho Tram Project Company Limited (HTP) ដើម្បីប្តូរម៉ាកយីហោសណ្ឋាគារ The Grand Ho Tram នៅរមណីយដ្ឋានសមាហរណកម្ម Ho Tram Strip ទៅជាសណ្ឋាគារ InterContinental Grand Ho Tram ក្នុងរយៈពេល ១ ឆ្នាំ។
អ្នកស្រី Serena Lim អនុប្រធានរបស់សណ្ឋាគារ IHG ទទួលបន្ទុកការអភិវឌ្ឍនៅអាស៊ីអាគ្នេយ៍ និងកូរ៉េថ្លែងថា៖ «ខណៈការធ្វើដំណើរអន្តរជាតិ និងក្នុងស្រុកបន្តកើនឡើង ការពង្រីកអចលនទ្រព្យ និងសណ្ឋាគារ និងរមណីយដ្ឋានជួយឲ្យយើងស្ថិតក្នុងទីតាំងដ៏អស្ចារ្យក្នុងការផ្តល់បទពិសោធផ្សេងៗសម្រាប់ភ្ញៀវចម្រុះ»។
ក្រុមហ៊ុន JLL ក៏បានផ្តល់ប្រឹក្សាដល់ប្រតិបត្តិការទិញលក់សណ្ឋាគារផ្កាយ ៥ មួយផងដែរក្នុងទីក្រុងញ៉ាចាង ខេត្តខាញ់ហៅនៅក្នុងពេលថ្មីៗនេះ៕ ANN/KC