ក្រុងដាណាងៈ កំណើនវិស័យទេសចរណ៍យ៉ាងលឿន និងជាប់ជានិច្ចបានក្លាយជាភាពទាក់ទាញមួយសម្រាប់គម្រោងអចលនទ្រព្យវិស័យទេសចរណ៍នៅទីក្រុងដាណាងភាគកណ្តាលប្រទេស វៀតណាម ក្នុងរយៈពេល ១ ទសវត្សរ៍ចុងក្រោយនេះ។
គម្រោងសណ្ឋាគារ និងរមណីយដ្ឋានដែលកំពុងរីកចម្រើនបច្ចុប្បន្ន ផ្តល់បន្ទប់ចំនួន ២៨ ០០០ បន្ទប់កើនឡើង ១០ ដងធៀបនឹងឆ្នាំ ២០០៧ សម្រាប់ភ្ញៀវទេសចរ ១៥ លាននាក់ដែលរំពឹងថា នឹងទៅទស្សនាទីក្រុងនេះក្នុងឆ្នាំ ២០៣០។
ប្រធានសមាគមទេសចរណ៍ក្រុងដាណាងលោក Huynh Tan Vinh បានថ្លែងថា វិស័យទេសចរណ៍ក៏បានបង្កើតការងារចំនួន ១៤ ម៉ឺនកន្លែងផងដែរសម្រាប់ពលរដ្ឋក្នុងតំបន់ និងតំបន់ជិតខាងស្មើនឹង ២៥ ភាគរយនៃកម្លាំងការងាររបស់ក្រុងនេះ។
លោក Vinh បានថ្លែងថា ទេសភាពស្អាតយ៉ាងវិសេសនៃឆ្នេរសមុទ្រ ទន្លេ និងភ្នំ ព្រមទាំងទេសភាពនៃតំបន់ភ្នំ Son Tra និង Ba Na-Nui Chua បានទាក់ទាញភ្ញៀវទេសចរ ៦,៧ លាននាក់ទៅលេងទីក្រុងនេះក្នុងឆ្នាំ ២០១៧ ហើយ ២,៣ លានក្នុងចំណោមនោះជាជនបរទេស។ ក្នុងរយៈពេលឆមាសទី ១ នៃឆ្នាំ ២០១៨ ភ្ញៀវទេសចរចំនួន ៣,៣ លាននាក់ រួមទាំងភ្ញៀវទេសចរបរទេសចំនួន ១,៦ លាននាក់ បានសម្រុកទៅលេងទីក្រុងនេះ។
លោកបានបន្តថា ភាពរីកចម្រើននៃវិស័យទេសចរបានទាក់ទាញការវិនិយោគដ៏ច្រើននៅក្នុងវិស័យអចលនទ្រព្យទេសចរណ៍សម្រាប់ភាពរីកចម្រើននាពេលខាងមុខ ហើយក្រុមហ៊ុនអភិវឌ្ឍន៍វិស័យអចលនទ្រព្យធំៗភាគច្រើនបានវិនិយោគនៅតាមឆ្នេរសមុទ្រដែលមានប្រវែង ៩០ គីឡូម៉ែត្ររបស់ខេត្តនេះ។
ទីក្រុងឆ្នេរសមុទ្រនេះបានក្លាយជាទីតាំងវិនិយោគមួយសម្រាប់ក្រុមហ៊ុនសណ្ឋាគារយីហោប្រណីតៗជាច្រើនដូចជា ក្រុមហ៊ុន Novotel ក្រុមហ៊ុន Fusion Suite និងក្រុមហ៊ុន Sheraton និងក្រុមហ៊ុនក្នុងស្រុកដូចជា Vinpearl ក្រុមហ៊ុន Sovico ក្រុមហ៊ុន Furama ក្រុមហ៊ុន Da Phuoc Urban និងក្រុមហ៊ុន Muong Thanh ដែលបានចាប់ផ្តើមការងារលើគម្រោងរបស់ពួកគេក្នុងទីក្រុងនេះចន្លោះពីឆ្នាំ ២០១៣‑២០១៥។
ភាពរីកចម្រើនវិស័យអចលនទ្រព្យទេសចរណ៍ជាប្រវត្តិសាស្រ្តរបស់ទីក្រុងនេះត្រូវបានជំរុញដោយកិច្ចប្រជុំ APEC នាពេលថ្មីៗនេះ។
គម្រោងសំខាន់ ២ រួមមាន គម្រោងកន្លែងកម្សាន្តទេសចរណ៍ CocoBay Da Nang ដែលអភិវឌ្ឍដោយក្រុមហ៊ុន Empire Group និងគម្រោងអគារអាផាតមិនទំនើប និងសណ្ឋាគារផ្កាយ ៥ Soleil Da Nang នៅលើឆ្នេរ My Khe Beach មានទឹកប្រាក់វិនិយោគសរុបចំនួន ១,០៦ ពាន់លានដុល្លារអាមេរិក។
គម្រោង Soleil Da Nang គឺជាគម្រោងសណ្ឋាគារ និងអាផាតមិនធំបំផុតក្នុងទីក្រុងនេះដែលមានសណ្ឋាគារផ្កាយ ៥ កម្ពស់ ៥៨ ជាន់ និងអគារអាផាតមិន ៤៧ ជាន់ចំនួន ៣ ហើយនឹងចាប់ផ្តើមសាងសង់ផ្ទះល្វែងប្រណីតចំនួន ១ ពាន់ខ្នងក្នុងឆ្នាំ ២០២០។
បើយោងតាមទីភ្នាក់ងារជំរុញការវិនិយោគរបស់ទីក្រុងនេះបានឲ្យដឹងថា ទីក្រុងនេះត្រូវបានកំណត់ថាជាទិសដៅមួយសម្រាប់ការវិនិយោគបរទេសក្នុងប្រទេសវៀតណាម និងស្ថិតនៅក្នុងក្រុមកំពូលចំនួន ៥ នៅក្នុងសន្ទស្សន៍ប្រកួតប្រជែងប្រចាំខេត្ត (PCI) រយៈពេល ៦ ឆ្នាំចុងក្រោយនេះ។
យោងតាមរបាយការណ៍មួយទីផ្សារអចលនទ្រព្យរបស់ទីក្រុងដាណាងក្នុងឆមាសទី ១ ឆ្នាំ ២០១៨ បន្ទប់សណ្ឋាគារពីផ្កាយ ៣ ដល់ផ្កាយ ៥ យ៉ាងហោចណាស់ ១ ៤០០ បន្ទប់ នឹងផ្សព្វផ្សាយនៅអនឡាញចាប់ពីឆមាសទី ២ នៃឆ្នាំ ២០១៨ ខណៈគម្រោងអាផាតមិនថ្មីចំនួន ៣ នឹងផ្តល់បន្ទប់ចំនួន ៨៣០ ទៅដល់ទីផ្សារនេះនាពេលបន្ទាប់ក្នុងឆ្នាំនេះ។
វិស័យអចលនទ្រព្យទេសចរណ៍នៅតែជាភាពទាក់ទាញការវិនិយោគយ៉ាងមានប្រជាប្រិយភាពនៅក្នុងទីក្រុងភាគកណ្តាលនេះ ដោយទាក់ទាញការវិនិយោគផ្ទាល់ពីបរទេស (FDI) ចំនួន ២៥ ភាគរយដែលមានតម្លៃ ១,៨ ពាន់លានដុល្លារ គឺ ៥៤ ភាគរយនៃទុនសរុបនៃការវិនិយោគផ្ទាល់ពីបរទេស (FDI) ក្នុងទីក្រុងនេះ។
រហូតមកដល់បច្ចុប្បន្ននេះ ទីក្រុងនេះបានទាក់ទាញគម្រោងវិនិយោគផ្ទាល់ពីបរទេសចំនួន ៦០៩ គម្រោងដែលមានតម្លៃ ៣,១ ពាន់លានដុល្លារ ហើយ ១៧៤ នៃគម្រោងទំាងនោះ ដែលមានតម្លៃ ២,១៩ ពាន់លានដុល្លារគឺស្ថិតនៅក្នុងវិស័យសេវា។
អាជីវកម្មជាង ២ ២០០ ត្រូវបានបង្កើតឡើងនៅក្នុងឆមាសទី ១ នៃឆ្នាំ ២០១៨ ដែលមានទុនវិនិយោគដែលចុះបញ្ជីចំនួន ៤៩៥ លានដុល្លារ៕ ANN/PS