The Phnom Penh Post Search

Search form

ក្រ​សួង​ព្រ​មាន​ពី​ស​កម្ម​ភាព​អា​ជីវ​កម្ម​ ពុះ​ដី​ឡូត៍​លក់

Content image - Phnom Penh Post
ទិដ្ឋភាព​អតិថិជន​មកមើល​ដីពុះឡូត៍លក់នៅតាម​បណ្ដោយផ្លូវជាតិលេខ ៣​​។ ហ្វេសប៊ុក

ក្រ​សួង​ព្រ​មាន​ពី​ស​កម្ម​ភាព​អា​ជីវ​កម្ម​ ពុះ​ដី​ឡូត៍​លក់

ភ្នំពេញៈ ​អ្នក​វិ​និ​យោគ​នៅ​ក្នុង​អា​ជីវ​កម្ម​ទិញ​លក់​ដី​បាន​សា​ទរ​វិ​ធាន​ការ​របស់​ក្រ​សួង​ ដែល​តម្រូវ​ឲ្យ​អា​ជីវ​កម្ម​ពុះ​​​ដី​ឡូត៍​​លក់​​ដែល​​កំ​ពុង​កើត​មាន​ស្ទើរ​​គ្រប់​កន្លែង​នៅ​ទូ​ទាំង​ប្រ​ទេស​ត្រូវ​ចុះ​​បញ្ជី​ ខណៈ​​អា​ជ្ញា​ធរ​​​បាន​ចាត់​ទុក​ថា ​វា​ស្ទើរ​តែ​​ក្លាយ​ជា​ស​កម្ម​ភាព​​អ​នា​ធិប​តេ​យ្យ​ទៅ​ហើយ​។

ក្រ​សួង​រៀប​ចំ​ដែន​ដី​ ន​គ​រូ​ប​នី​យ​កម្ម ​និង​សំ​ណង់​ កាល​ពី​ថ្ងៃ​អង្គារ​ ផ្សព្វ​ផ្សាយ​ប្រ​កាស​​​ស្តី​ពី​​ «ការ​អភិ​វឌ្ឍ​ដី» ដែល​​តម្រូវ​ឲ្យ​គ្រប់​ស​កម្ម​ភាព​នៃ​ ការ​អភិ​វឌ្ឍ​ដី​ទាំង​អស់​ត្រូវ​តែ​​​សុំ​ច្បាប់​​​អនុ​ញ្ញាត​ពី​អា​ជ្ញា​ធរ​មាន​ស​មត្ថ​កិច្ច​​ជា​មុន ខណៈ​ក្រ​សួង​សង្កេត​ឃើញ​ថា ​​ការអភិ​វឌ្ឍ​ដី (ពុះ​ដីឡូត៍​លក់) នា​ពេល​បច្ចុ​ប្បន្ន​​​មាន​ភាព​រញ៉េ​រញ៉ៃ​ ហើយ​មិន​បាន​​​​សុំ​ច្បាប់​អនុ​ញ្ញាត​ពី​អា​ជ្ញា​ធរ​។

លោក ​ម៉ោង ​ម៉ា​តាំង​ ម្ចាស់​គម្រោង​ពុះ​​ដី​ឡូត៍​មួយ​កន្លែង ស្ថិត​​ក្នុង​ស្រុក​ឧដុង្គ​ ខេត្ត​ កំ​ពង់​ស្ពឺ ​ដែល​មាន​​ដី​ទំ​ហំ​ជា​​ង​ ៧ ​ហិក​តា​​​ឲ្យ​ដឹង​ថា ទី​តាំង​ពុះ​ដី​ឡូ​ត៍​លក់ ​ពេល​នេះ​មាន​ស្ទើរ​គ្រប់​ទី​កន្លែង​។

លោក ​ម៉ា​តាំង ​និ​យាយ​ថា​ អា​ជី​វ​កម្ម​របស់​​លោក​ មិន​​​បាន​សុំ​ច្បាប់​​ពី​អា​ជ្ញា​ធរ​នោះ​ទេ​ ប៉ុន្តែ​លោក​គ្រាន់​តែ​​ធ្វើ​លិ​ខិត​​​ផ្ទេរ​សិទ្ធិ​កាន់​កាប់​ចំ​ណែក​ដី​​ទៅ​ឲ្យ​អតិ​ថិ​ជន​នៅ​​ថ្នាក់​ស្រុក​នៅ​ពេល​មាន​ការ​ជួញ​ដូរ​។

​លោក​អះ​អាង​ថា៖​ «កន្លង​មក​ខ្ញុំ​តែង​​ធ្វើ​តាម​ទម្លាប់​ ​គឺ​ទាល់​តែ​មាន​អ្នក​ទិញ​ ទើ​ប​​ចាប់​ផ្តើម​​ធ្វើ​ឯក​សារ​ទៅ​អា​ជ្ញា​ធរ​ស្រុក​។ ​ដី​ពុះ​ឡូត៍​​​ខ្ញុំ​ពេល​នេះ​​​លក់​ជិត​អស់​​ហើយ​​​»។

ទោះ​បី​យ៉ាង​នេះ​ក្តី ​លោក​អះ​អាង​ថា ​អា​ជីវ​កម្ម​របស់​លោក​នឹង​គោ​រព​ទៅ​តាម​ការ​ទាម​ទារ​របស់​រដ្ឋា​ភិ​បាល។

លោក​បាន​បញ្ជាក់​ថា៖​ «​ប្រ​សិន​បើ​ក្រ​សួង​​ចេញ​សេច​ក្តី​ណែ​នាំ​​​ឲ្យ​ធ្វើ​អ្វី ​ខ្ញុំ​នឹង​​ធ្វើ​តាម។ ក្នុង​នាម​ជា​អ្នក​រក​ស៊ី​ ខ្ញុំ​ចង់​​ឲ្យ​គ្រប់​ភាគី​ពាក់​ព័ន្ធ​ឈ្នះ​ទាំង​អស់​គ្នា គឺ​ម្ចាស់​ដី អតិ​ថិ​ជន ​និង​រដ្ឋ»។

លោក​ កេត ​វុធ​ដុង ​ម្ចាស់​គម្រោង​ពុះ​ដី​ឡូត៍​ម្នាក់​ទៀត ​​ស្ថិត​​ក្នុង​ស្រុក​ថ្ពង​ ខេត្ត​កំ​ពង់​ស្ពឺ បាន​ឲ្យ​ដឹង​ថា ការ​ចុះបញ្ជី​ត្រឹម​ត្រូវ​នឹង​ធ្វើ​ឲ្យ​អតិ​ថិ​ជន​គេច​ផុត​ពី​ហា​និ​ភ័យ​ និង​ការ​ភូត​កុ​ហក។

​លោក​​ថ្លែង​ថា​៖​ «​ប្រ​កាស​ស្តី​ពី​ការ​អភិ​វឌ្ឍ​ដី​ពិត​ជា​មាន​សារៈ​សំ​ខាន់​ណាស់​ព្រោះ​នឹង​ចូល​រួម​ចំ​ណែក​ធ្វើ​ឲ្យ​ការ​គ្រប់​គ្រង​ដី​​នៅ​កម្ពុជា​កាន់​តែ​មាន​លក្ខណៈ​ល្អ​ប្រ​សើរ​។ នៅ​ពេល​មាន​បញ្ហា​អ្វី​មួយ​កើត​ឡើង​ យើង​តែង​រត់​ទៅ​រក​ច្បាប់​ឲ្យ​ជួយ​ដូ​ច្នេះ​ដើ​ម្បី​កុំ​ឲ្យ​មាន​បញ្ហា​ គ្រប់​គ្នា​ត្រូវ​គោ​រព​ច្បាប់​»​។

លោក ​លាង ​បូរ៉ា (Leang Bora) ដែល​​បច្ចុ​ប្បន្ន​កំ​ពុង​ស្វែង​រក​ទិញ​ដី​នៅ​តាម​​ផ្លូវ​ជាតិ​លេខ​ ៥១​ ដើ​ម្បី​យក​ទៅ​​ពុះ​ជា​ឡូត៍​តូច​ៗ​បាន​ឲ្យ​ដឹង​ថា ​ខណៈ​រដ្ឋា​ភិ​បាល​តម្រូវ​ឲ្យមាន​កា​រចុះ​បញ្ជី ​នី​តិ​​វិធី​នៃ​ការ​សុំ​ច្បាប់​គួរ​តែ​មាន​ភាព​ងាយ​ស្រួល។

លោក​បញ្ជាក់​ថា៖​ «​ខ្ញុំ​សង្ឃឹម​ថា ការ​សុំ​ច្បាប់​អនុ​ញ្ញាត​នឹង​ត្រូវ​​ចំ​ណាយ​លុយ​ និង​ពេល​​វេលា​យូរ​​​ទេ​​»​​​។

ប្រ​កាស​ស្តី​ពី «​​ការ​អភិ​វឌ្ឍ​ដី»​ ដែលត្រូវ​​បាន​ចុះ​ហត្ថ​លេ​ខា​ដោយ​លោក​ ជា សុ​ផា​រ៉ា រ​ដ្ឋ​មន្ត្រី​​ក្រ​សួង​រៀប​​ចំ​ដែន​ដី​ ន​គ​រូប​នីយ​កម្ម​ និង​សំ​ណង់​កាល​ពី​ថ្ងៃ​ទី​ ១១ ខែ​ឧសភា ឆ្នាំ​ ២០១៨ មាន​គោល​បំ​ណង​លើក​កម្ពស់​ការ​គ្រប់​​គ្រង​ដី​ឲ្យ​បាន​ត្រឹម​ត្រូវ ​និង​ចំ​គោល​ដៅ ​ដើ​ម្បី​​ធា​នា​ការ​អភិ​វឌ្ឍ​ដែន​ដី ​និង​នគរូ​បនី​យ​កម្ម​ ប្រ​កប​ដោយ​ចីរ​ភាព​ តុល្យ​ភាព និង​​ប្រ​សិទ្ធ​ភាព​និង​គ្រប់​គ្រង​ការ​អភិ​វឌ្ឍ​ដី​បំ​បែក​ក្បាល​ដី ឬ​ការ​បង្រួម​ក្បាល​ដី​ទៅ​ជា​ដី​ឡូត៍​សម្រាប់​លក់​ និង​/ឬ​សាង​សង់​លំ​នៅ​ឋាន​ អគារ​ឧស្សា​ហ​កម្ម​ពា​ណិជ្ជ​កម្ម និង​ទេស​ចរណ៍។

ប្រ​កាស​​បាន​ឲ្យ​ដឹង​ទៀត​ថា សម្រាប់​​គម្រោង​អភិ​វឌ្ឍ​ន៍​ដី ដែល​មាន​ទំ​ហំ​ផ្ទៃ​ដី​ធំ​​ជាង​ ៣០ ០០០ ម៉ែត្រ​កា​រ៉េ​ត្រូវ​​ស្នើ​សុំ​​​លិ​ខិត​អនុ​ញ្ញាត​ពី​​​ក្រ​សួង​​រៀប​ចំ​ដែន​ដី​ ខណៈ​គម្រោង​អភិ​វឌ្ឍន៍​ដី​ មាន​ទំ​ហំ​ផ្ទៃ​ដី​តូច​ជាង​ ឬ​ស្មើ​ ៣០ ០០០ ​ម៉ែ​ត្រ​កា​រ៉េ​ត្រូវ​ស្នើ​សុំ​ពី​ថ្នាក់​​រាជ​ធា​នី​ ខេត្ត ​និង​ដី​​​ទំ​ហំ​តូច​ជាង​ ឬ​ស្មើ​ ៥ ០០​០ ​ម៉ែត្រ​ការ៉េ​ត្រូវ​ស្នើ​សុំ​ពី​ថ្នាក់​​​​​ ស្រុក ខណ្ឌ​​​។

លោក ប៉ែន ​សុផល​ រដ្ឋលេ​ខាធិ​ការ​នៃ​ក្រ​សួង​រៀប​ចំ​ដែន​ដី ​នគ​រូ​ប​នី​យកម្ម​និង​​សំ​ណង់ បាន​ឲ្យ​ដឹង​ថា ការ​កំណត់​ឲ្យ​មាន​ការ​សុំ​ច្បាប់​អនុញ្ញា​ត​ជា​មុន​ នឹង​ជួយ​កាត់​បន្ថយ​ចំ​ណុច​អ​វិជ្ជ​​មាន​បាន​យ៉ាង​ច្រើន​ខណៈ​វិ​ស័យ​នេះ​កំ​ពុង​ហក់​ឡើង​។

លោក​​ព្រ​មាន​​​ថា​ នឹង​ចាត់​​វិ​ធាន​ការ​តាម​​ផ្លូវ​ច្បាប់​ចំ​ពោះ​ម្ចាស់​ដី​ណា​​ដែល​ធ្វើ​សកម្ម​ភាព​ពុះ​ដី​ឡូត៍​លក់​ដោយ​មិន​បាន​​សុំ​ច្បាប់​ត្រឹម​ត្រូវ ឬ​ធ្វើ​ការ​លក់​បោក​ប្រាស់​អ​តិ​ថិ​ជន​​​៕​LA

អត្ថបទគួរចាប់អារម្មណ៍