.jpg)
អាផាតមិនមួយកន្លែង នាទីក្រុងប៊ែរឡាំង។ AFP
ក្រុងប៊ែរឡាំងៈ អាជ្ញាធរទីក្រុងប៊ែរឡាំងកាលពីចុងខែកញ្ញាបានស្ថិតក្រោមការរិះគន់ដោយសារការចំណាយប្រាក់ជិត ១ ពាន់លានអឺរ៉ូ ដើម្បីទិញមកវិញនូវអតីតសំណង់អាផាតមិនលំនៅឋានសាធារណៈចំនួន ៦ ០០០ យូនីត ដែលត្រូវបានធ្វើឯកជនភាវូបនីយកម្ម ដើម្បីបញ្ចុះតម្លៃជួលដែលកំពុងកើនឡើង។
ស្ថិតក្រោមកិច្ចព្រមព្រៀងដែលបានប្រកាសកាលពីចុងខាងមុន ក្រុមហ៊ុនលំនៅឋានរដ្ឋ Gewobag នឹងទិញអាផាតមិន (ផ្ទះល្វែង) ដែលដើមឡើយសាងសង់សម្រាប់ធ្វើជាលំនៅឋានសង្គមកិច្ចចាប់ពីទសវត្សរ៍ឆ្នាំ ១៩៦០ ដល់ ១៩៩០។
តម្លៃ ៩២០ លានអឺរ៉ូ (ប្រហែល ១ ពាន់លានដុល្លារ) ច្រើនជាង ២ ដងធៀបនឹង ៤០៥ លានអឺរ៉ូ នៅពេលទីក្រុងនេះបានធ្វើឯកជនភាវូបនីយកម្មអចលនទ្រព្យនេះនៅឆ្នាំ ២០០៤។ នេះបើតាមប្រព័ន្ធផ្សព្វផ្សាយអាល្លឺម៉ង់។
លោក Michael Mueller អភិបាលទីក្រុងប៊ែរឡាំងឲ្យដឹងថា កិច្ចព្រមព្រៀងនេះសំដៅ «រក្សាតម្លៃជួលក្នុងទីក្រុងប៊ែរឡាំងមានស្ថិរភាព»។
ការទិញនេះបង្ហាញពីការធ្វើជាតូបនីយកម្មជាថ្មីដ៏ធំដែលបានអនុវត្តដោយទីក្រុងនេះ ជាទីដែលតម្លៃជួលបានកើនឡើង ២ ដងក្នុងរយៈពេល ១ ទសវត្សរ៍កន្លងមកនេះ។
លោក Markus Terboven សមាជិកក្រុមប្រឹក្សាភិបាលក្រុមហ៊ុន Gewobag បានឲ្យដឹងថា កិច្ចព្រមព្រៀងជាមួយក្រុមហ៊ុនអចលនទ្រព្យឯកជន Ado Properties នេះនឹងធ្វើឲ្យស្ដុកលំនៅឋានរបស់ខ្លួនកើនឡើងដល់ «ប្រហែល ៦៨ ០០០ យូនីត និងទទួលបានផ្ទៃក្រឡារស់នៅសម្រាប់អ្នកជួលក្នុងទីក្រុងប៊ែរឡាំងច្រើនជាង ១០ ០០០ នាក់»។
គណបក្សប្រកាន់ស្ដាំជ្រុល AfD បានវាយប្រហារមួយផ្នែកលើវិធានការនេះថា ជា «ការចំណាយប្រាក់ឥតប្រយោជន៍» ហើយគណបក្សប្រជាធិបតេយ្យសេរី (FDP) ដែលមានទំនោរទៅរកពាណិជ្ជកម្មបានចោទប្រកាន់ក្រុមហ៊ុន Gewobag រួមជាមួយនឹងរដ្ឋាភិបាលរបស់ទីក្រុងប៊ែរឡាំងពីបទ «ចូលរួមក្នុងការកេងចំណេញទីផ្សារអចលនទ្រព្យ»។
គណបក្ស FDP បានចោទប្រកាន់ថា៖ «នៅពេលនេះក្រុមហ៊ុន Gewobag ជំពាក់ប្រាក់រាប់លានដោយមិនបានបង្កើតផ្ទៃក្រឡារស់នៅថ្មី ១ ម៉ែត្រការ៉េនោះទេ»។
ការទិញដែលធ្វើឡើងថ្មីបំផុតនេះបានធ្វើឡើងប៉ុន្មានខែបន្ទាប់ពីអាជ្ញាធររដ្ឋធានីអាល្លឺម៉ង់មួយនេះបានទិញផ្ទះល្វែងចំនួន ៦៧០ យូនីតនៅតាមបណ្ដោយទីប្រជុំជន Karl Marx Allee ពីម្ចាស់ឯកជនក្នុងគោលបំណងរក្សាតម្លៃជួលឲ្យទាបផងដែរ។
ការកើនឡើងតម្លៃជួលលំនៅឋានបានក្លាយជាបញ្ហាដ៏សំខាន់មួយនៅទីក្រុងប៊ែរឡាំង ដែលបណ្ដាលឲ្យអ្នកជួលមួយចំនួនពិចារណារកដំណោះស្រាយជ្រុលនិយមនានារួមទាំងការធ្វើយុទ្ធនាការរឹបអូសស្ដុកលំនៅឋានពីម្ចាស់ផ្ទះដ៏មានឥទ្ធិពលនានា។
ប្រកាសអាសន្នដោយនិន្នាការនេះ រដ្ឋាភិបាលទីក្រុងប៊ែរឡាំងកាលពីខែមិថុនា បានយល់ព្រមចំពោះការដាក់ចេញសេចក្ដីព្រាងច្បាប់មួយដែលនឹងរួមមានទាំងការពិន័យជាការបង្កកការជួល ៥ ឆ្នាំចាប់ពីឆ្នាំ ២០២០ ទៅ។
ក្រុងប៊ែរឡាំងឲ្យដឹងថា សេចក្ដីព្រាងច្បាប់នេះនឹងមានបំណងទប់ស្កាត់ការដំឡើងថ្លៃជួលអាផាតមិនចំនួន ១,៥ លានយូនីត៕ LA
