ក្រុងបាងកកៈ ក្រុមហ៊ុនអចលនទ្រព្យ Grand Unity Development របស់ប្រទេសថៃនឹងរៀបចំធ្វើបទបង្ហាញនៅកោះតៃវ៉ាន់ និងក្រុងហុងកុងនៅខែមិថុនា ដើម្បីផ្សព្វផ្សាយគម្រោងខុនដូទំនើបថ្មីទៅកាន់អតិថិជនបរទេសក្នុងគ្រាដែលទីផ្សារក្នុងស្រុកធ្លាក់ចុះ។ នេះបើយោងតាមកាសែតបាងកកប៉ុស្តិ៍។
លោក Pattawin Wongsathien អនុប្រធានជាន់ខ្ពស់របស់ក្រុមហ៊ុនទទួលបន្ទុកធ្វើទីផ្សារសាជីវកម្ម និងការលក់បានប្រាប់កាសែតបាងកកប៉ុស្តិ៍ថា ការធ្វើរ៉ូដស្សូ (roadshow) នៅបរទេសនេះនឹងជារ៉ូដស្សូលើកដំបូងសម្រាប់ក្រុមហ៊ុន ខណៈដែលក្រុមហ៊ុនស្វែងរកការណែនាំគម្រោងរបស់ខ្លួនផ្ទាល់ទៅកាន់អតិថិជនបរទេស។
លោកមានប្រសាសន៍ថា៖ «ទីផ្សារបរទេសនឹងមិនមានបញ្ហាឡើយ ប្រសិនបើយើងប្រមូលបានការបង់ប្រាក់ជាមុន (down payment) បានច្រើន»។ លោកបន្ថែមថា៖ «ភាពអាចកើតមាននៃការណ៍ដែលអតិថិជនបរទេសបដិសេធមិនទទួលយកការផ្ទេរកម្មសិទ្ធិយូនីតនៅពេលគម្រោងបញ្ចប់នឹងមានកម្រិតទាបខ្លាំង ខណៈដែលយើងប្រមូលបាន ៣០ ភាគរយនៃតម្លៃយូនីតសម្រាប់ជាការបង់ប្រាក់ជាមុន»។
គម្រោងទី ១ ដែលត្រូវណែនាំនៅបរទេសនឹងជាគម្រោង Anil Sathorn 12 ដែលជាគម្រោងខុនដូទំនើបមានតម្លៃ ៣,៤ ពាន់លានបាត (ប្រហែល ១០៦ លានដុល្លារ) ដែលគ្រោងនឹងចាប់ផ្តើមសាងសង់នៅថ្ងៃទី ១៥ ខែមិថុនា។
ដោយសាងសង់នៅលើផ្ទៃដីទំហំ ១,៥ រ៉ៃ (០,២៤ ហិកតា) នៅជិតផ្លូវ Sathon Soi 12 គម្រោងនេះនឹងមានកម្ពស់ ៤២ ជាន់មាន ២២២ យូនីតមានផ្ទៃក្រឡាពី ៤៥ ទៅ ៥០០ ម៉ែត្រការ៉េក្នុង ១ យូនីត និងមានតម្លៃពី ១១ លានបាត (ប្រហែល ៣៤ ម៉ឺនដុល្លារ) ទៅ ៣០០ លានបាត (៦,២៨ លានដុល្លារ) ក្នុងមួយយូនីត។
លោក Pattawin បានថ្លែងថា៖ «នេះគឺជាលើកដំបូងហើយដែលយើងនឹងសាងសង់គម្រោងទំនើប ដូច្នេះយើងចង់ណែនាំគម្រោងនេះទៅកាន់អតិថិជនបទេស»។ លោកបន្ថែមថា៖ «យើងនឹងប្រើប្រាស់ទីតាំងនេះដើម្បីផ្សព្វផ្សាយគម្រោងនេះ ពីព្រោះផ្លូវ Sathon និងផ្លូវ Silom អតិថិជនក្នុងទីក្រុងហុងកុង និងកោះតៃវ៉ា់ន់ស្គាល់ច្បាស់»។
លោកឲ្យដឹងទៀតថានឹងមានស្ថានីយរថភ្លើង BTS ថ្មីមួយនៅជិតទីតាំងរបស់គម្រោង។ ស្ថានីយរថភ្លើងនេះនឹងបញ្ចប់ការសាងសង់នៅ ២-៣ ឆ្នាំក្រោយ ហើយតម្លៃអចលនទ្រព្យនឹងកើននៅទីតាំងនេះ៕ KC