.jpg)
ទិដ្ឋភាពទីក្រុងបាងកកមើលពីលើៃកំពូលព្រះវិហារ នៅវត្តសាកេត។ រូបថត AFP
ក្រុងបាងកកៈ ក្រុមហ៊ុនអភិវឌ្ឍន៍អចលនទ្រព្យនៅក្នុងប្រទេស ថៃ គួរតែមានការប្រុងប្រយ័ត្នជាងនេះ ចំពោះសន្ទនីយភាពហិរញ្ញវត្ថុ និងការចាប់ផ្តើមផ្គត់ផ្គង់អចលនទ្រព្យថ្មីៗ ព្រោះការលក់មុនចាប់ផ្តើមគម្រោង (Presales) សម្រាប់លំនៅឋាន និងការផ្ទេរកម្មសិទ្ធិទំនងជានៅរក្សាដដែលក្នុងឆ្នាំ ២០១៩ នេះ គឺដូចទៅនឹងការរំពឹងទុកនាពេលកន្លងមក។ នេះបើយោងតាមកាសែតបាងកកប៉ុស្តិ៍។
កាសែតបាងកកប៉ុស្តិ៍បានរាយការណ៍ដោយស្រង់សំដីរបស់លោក Atip Bijanonda ប្រធានសមាគមអាជីវកម្មលំនៅឋាន (HBA) ខណៈលោកបានថ្លែងកាលពីថ្ងៃចន្ទថា បើសេដ្ឋកិច្ចពិភពលោកមិនមានភាពប្រសើរឡើងទេ នឹងមានផលប៉ះពាល់ត្រឡប់មួយទៅលើសេដ្ឋកិច្ចថៃ។ គោលនយោបាយសហរដ្ឋអាមេរិក នឹងបង្កឲ្យការវិនិយោគក្នុងប្រទេស ចិន ថមថយ ដែលនឹងជះឥទ្ធិពលដល់ប្រទេសផ្គត់ផ្គង់នានាដូចជាប្រទេស ថៃ ជាដើម។
លោក Atip ថ្លែងថា៖ «ផលវិបាកនៃសង្គ្រាមពាណិជ្ជកម្មរវាងអាមេរិក ជាមួយចិន អាចបង្កឲ្យមានការជម្រុះបុគ្គលិកខ្លះ និងធ្វើឲ្យថមថយការវិនិយោគថ្មី។ បើសិនសេដ្ឋកិច្ចពិភពលោកជះឥទ្ធិពលដល់សេដ្ឋកិច្ចថៃ អំណាចទិញនឹងធ្លាក់ចុះ»។
ខណៈដែលវិស័យអចលនទ្រព្យជាធម្មតាពឹងផ្អែកលើគម្រោងហេដ្ឋារចនាសម្ព័ន្ធនោះ វានឹងពឹងផ្អែកលើថា តើរដ្ឋាភិបាលថៃអាណត្តិក្រោយ នឹងបន្តគោលនយោបាយសំខាន់ៗស្តីពីគម្រោងធំៗដូចជាគម្រោងច្រករបៀងសេដ្ឋកិច្ចខាងកើត (EEC) ខ្សែរថភ្លើង ២ គន្លង រថភ្លើងល្បឿនលឿនភ្ជាប់ព្រលានយន្តហោះធំទាំង ៣ និងបណ្តាញដឹកជញ្ជូនសាធារណៈទ្រង់ទ្រាយធំថ្មីៗក្នុងទីក្រុងបាងកកដែរ ឬយ៉ាងណា។
ការដាក់កម្រិតដល់ការផ្តល់ប្រាក់កម្ចី និងការដំឡើងអត្រាការប្រាក់ នឹងធ្វើឲ្យប៉ះពាល់ដល់អំណាចទិញរបស់អ្នកទិញផ្ទះថ្មីផងដែរ។ ពួកគេនឹងទទួលបានបន្ទាត់ឥណទានទាបជាងមុន ខណៈដែលអត្រាច្រានចោលកម្ចីទិញផ្ទះពីធនាគារនានា នឹងមានកាន់តែខ្ពស់។
អ្នកទទួលបានកម្ចីទិញផ្ទះដែលមានស្រាប់ នឹងមានថវិកាកាន់តែតិចសម្រាប់ការចំណាយបន្ថែម ដោយសារការដំឡើងអត្រាការប្រាក់។ សម្រាប់រាល់ការដំឡើងអត្រាការប្រាក់ ២៥ ចំណុចភាគរយ(percentage-point ឬចំនួនភាគរយធៀបនឹងភាគរយ) ប្រាក់ដើមកម្ចីរបស់អ្នកទទួលឥណទាននឹងត្រូវបានកាត់បន្ថយ ២ ភាគរយ ហើយការសងត្រឡប់ទៅវិញនឹងចំណាយពេលកាន់តែយូរ។
លោក Atip បានថ្លែងថា ពន្ធលើដីធ្លី និងអគារ ដែលនឹងចូលជាធរមាននៅដើមឆ្នាំ ២០២០ នឹងជំរុញបរិមាណផ្ទះទី ២ ឲ្យបញ្ចប់ស្របជាមួយនឹងការផ្គត់ផ្គង់លំនៅឋានថ្មី។ ការណ៍នេះនឹងមានផលប៉ះពាល់ដល់ការចាប់ផ្តើមផ្គត់ផ្គង់លំនៅឋានថ្មី។
លោកមានប្រសាសន៍ថា៖ «ក្រុមហ៊ុនអភិវឌ្ឍន៍គួរប្រុងប្រយ័ត្នជាងនេះអំពីសន្ទនីយភាពរបស់ពួកគេ ខណៈការចំណាយរបស់ក្រុមហ៊ុននឹងថេរ ប៉ុន្តែប្រាក់ចំណូលអាចនឹងខុសទិសដៅ»។
លោកបន្ថែមថា៖ «ការលក់ និងការផ្ទេរកម្មសិទិ្ធ នឹងមិនល្អដូចការរំពឹងទុក។ ពួកគេអាចត្រូវការទុនបម្រុងសម្រាប់លំហូរសាច់ប្រាក់កាន់តែល្អ»។
លោក Issara Boonyoung ប្រធានកិតិ្តយសសមាគម HBA បានថ្លែងថា តម្លៃដីនឹងនៅតែជាកត្តាសំខាន់មួយដែលបង្កើនការចំណាយលើការអភិវឌ្ឍ ជាពិសេសទីតាំងនៅជិតគម្រោងធំៗ។
នៅក្នុងខេត្តចំនួន ៣ ដែលជាទីតាំងរបស់គម្រោង EEC ការកើនឡើងតម្លៃដីនៅឆ្នាំនេះនឹងថមថយវិញ បន្ទាប់ពីកើនឡើងប៉ុន្មានឆ្នាំចុងក្រោយនេះ។
លោក Issara ថ្លែងថា តម្លៃស៊ីម៉ងត៍នៅឆ្នាំនេះនឹងកើនឡើង ៥ ភាគរយ ដែលដូចទៅនឹងកំណើនឆ្នាំមុនដែរ។ រួមជាមួយនឹងការចំណាយលើដី និងការអភិវឌ្ឍ តម្លៃលំនៅឋាននៅក្នុងឆ្នាំ ២០១៩ និងកើនឡើងប្រមាណពី ៣ ទៅ ៥ ភាគរយ។
ប្រភពមួយក្នុងវិស័យអចលនទ្រព្យបានឲ្យដឹងថា មានក្តីបារម្ភអំពីការផ្ទេរកម្មសិទ្ធិខុនដូក្នុងឆ្នាំ ២០១៩ នៅក្នុងចំណោមដៃគូជប៉ុនមួយចំនួនដែលបានបណ្តាក់ទុនរួមគ្នាជាមួយក្រុមហ៊ុនអភិវឌ្ឍន៍ក្នុងប្រទេស ថៃ ក្នុងគម្រោងខុនដូ ខណៈគម្រោងជាច្រើនគ្រោងនឹងបញ្ចប់នៅឆ្នាំនេះ៕ KC
