.jpg)
ក្រុងបាងកកៈ ក្រុមហ៊ុនអភិវឌ្ឍន៍លំនៅឋានគួរស្វែងរកយុទ្ធសាស្រ្តដោះស្រាយជាមួយនឹងលក្ខខណ្ឌតម្រូវថ្មីនៃកម្ចីទិញផ្ទះដែលដាក់ចេញដោយធនាគារកណ្តាលថៃ ហើយគួរមានការប្រុងប្រយ័ត្នចំពោះការផ្គត់ផ្គង់ថ្មី និងគ្រប់គ្រងសន្ទនីយភាពហិរញ្ញវត្ថុ ដោយសារវិធានផ្តល់កម្ចីថ្មីនេះ និងការកើនឡើងនៃអត្រាការប្រាក់ នឹងប៉ះពាល់ដល់តម្រូវការនាឆ្នាំក្រោយ។
កាសែត បាងកក ប៉ុស្តិ៍ បានដកស្រង់សម្ដីលោក Therdsak Thaveeteeratham អនុប្រធានប្រតិបត្តិទទួលបន្ទុកស្រាវជ្រាវនៅក្រុមហ៊ុន Asia Plus Securities ខណៈលោកថ្លែងថា វិធានផ្តល់កម្ចីតឹងរ៉ឹងជាងមុនដែលចូលជាធរមាននៅថ្ងៃទី ១ ខែមេសា ឆ្នាំក្រោយនឹងក្លាយជាក្តីបារម្ភសម្រាប់វិស័យអចលនទ្រព្យនាឆ្នាំក្រោយ។
លោកថ្លែងថា៖ «វិធានផ្តល់កម្ចីថ្មីនេះនឹងធ្វើឲ្យថមថយតម្រូវការឆ្នាំក្រោយ»។ «យើងមិនបានមើលឃើញយុទ្ធសាស្រ្ត ឬវិធានការណាមួយពីក្រុមហ៊ុនអភិវឌ្ឍន៍ដើម្បីដោះស្រាយជាមួយនឹងវិធានថ្មីនេះទេចាប់តាំងពីវិធាននេះត្រូវបានប្រកាសកាលពីដើមខែមុន»។
លោក Therdsak បានថ្លែងប្រាប់កាសែត បាងកក ប៉ុស្តិ៍ ថា រយៈពេលមុនវិធាននេះចូលជាធរមាននឹងមើលឃើញលំហូរនៃការផ្គត់ផ្គង់លំនៅឋាន។ បន្ទាប់ពីនោះមក ទីផ្សារនឹងមើលឃើញការធ្លាក់ចុះ ដែលរងផលប៉ះពាល់ទាំងលក្ខខណ្ឌតម្រូវថ្មីសម្រាប់កម្ចី និងអត្រាការប្រាក់ខ្ពស់ជាងមុន។
លោកបានមានប្រសាសន៍ថា តម្រូវការខុនដូ នឹងត្រូវបានជំរុញមួយផ្នែកដោយអ្នកទិញបែបកេងចំណេញថ្លៃ និងអ្នកទិញសម្រាប់ការវិនិយោគ ខណៈផលចំណេញពីការវិនិយោគខុនដូមានលក្ខណៈទាក់ទាញខ្លាំងជាងអត្រាការប្រាក់នៃការដាក់ប្រាក់ក្នុងធនាគារ។ ទោះយ៉ាងណាក្តី តម្រូវការនេះនឹងធ្លាក់ចុះ ខណៈផលចំណេញពីខុនដូធ្លាក់ចុះ ហើយនិន្នាការអត្រាការប្រាក់កើនឡើង។
លោកបន្តថា៖ «ក្រុមហ៊ុនអភិវឌ្ឍន៍គួរមានការប្រុងប្រយ័ត្នជាងមុនក្នុងការធ្វើផែនការដាក់ចេញគម្រោងនៅឆ្នាំក្រោយ ខណៈតម្រូវការនឹងចុះខ្សោយជាងមុន ហើយការផ្គត់ផ្គង់ផ្ទះមានទំហំធំខ្លាំង»។
គិតត្រឹមដំណាច់ខែកញ្ញា ឆ្នាំ ២០១៨ ស្តុកលំនៅឋានរបស់ក្រុមហ៊ុនអភិវឌ្ឍន៍ធំៗចំនួន ១២ ដែលបានចុះបញ្ជីសរុបមានទឹកប្រាក់ ៥០២ ពាន់ពាន់លានបាត កើនពី ៤៩៦ ពាន់ពាន់លានបាតនៅក្នុងត្រីមាសទី ២ ឆ្នាំ ២០១៨ និង ៤៨០ ពាន់ពាន់លានបាតនៅក្នុងត្រីមាសទី ៣ ឆ្នាំមុន៕ PS
