ទីក្រុងហុងកុងៈ ទីផ្សារអចលនទ្រព្យថ្លៃបំផុតនៅលើពិភពលោក បាននិងកំពុងបាត់បង់នូវប្រភពវិនិយោគក្នុងស្រុកដ៏សំខាន់បំផុតរបស់ខ្លួន។ នេះបើតាមការចុះផ្សាយរបស់កាសែតសិង្ហបុរី Straitestimes ដែលដកស្រង់បន្តពីសារព័ត៌មាន BLOOMBERG។
ក្រុមអ្នកទិញអចលនទ្រព្យជនជាតិចិនដីគោកកំពុងចាកចេញពីអចលនទ្រព្យនៅទីក្រុងហុងកុង ខណៈការរីករាលដាលវីរុសកូរ៉ូណាបានជះឥទ្ធិពលលើចក្ខុវិស័យសេដ្ឋកិច្ច និងកំពុងរារាំងក្រុមវិនិយោគិនមិនឲ្យធ្វើដំណើរទៅកាន់ទីក្រុងនេះ។
យោងតាមក្រុមហ៊ុន CBRE Group Inc គ្មានប្រតិបត្តិការជួញដូរអចលនទ្រព្យពាណិជ្ជកម្មដែលជាប់ពាក់ព័ន្ធនឹងអ្នកទិញមកពីចិនដីគោកទេ នៅត្រីមាសទី ១ កន្លងមក។ នេះជាលើកដំបូងហើយចាប់តាំងពីឆ្នាំ ២០០៩ មក ខណៈក្នុងរយៈពេល ២-៣ ឆ្នាំកន្លងមកមានក្រុមវិនិយោគិនជនជាតិចិនជាច្រើនបាននាំគ្នាសម្រុកទៅទិញការិយាល័យដ៏គួរឲ្យភ្ញាក់ផ្អើល។
លោក Reeves Yan ប្រធានទីផ្សារមូលធននៅក្រុមហ៊ុនសេវាអចលនទ្រព្យ CBRE Group Inc បានថ្លែងថា៖ «អ្នកទិញជនជាតិចិនដីគោកជាច្រើនកំពុងដកខ្លួនថយមួយជំហាន ដោយសារតែចក្ខុវិស័យសេដ្ឋកិច្ច និងជម្លោះ (ការតវ៉ាប្រឆាំងពីក្រុមអ្នកគាំទ្រលទ្ធិប្រជាធិបតេយ្យ) ដែលបានធ្វើឲ្យពួកគេមានអារម្មណ៍ថាមិនស្វាគមន៍»។
លោក Yan បន្តថា ការគ្រប់គ្រងមូលធនដែលបានដាក់ដោយទីក្រុងប៉េកាំងលើប្រាក់ហូរចេញពីប្រទេសចិន ក៏កំពុងរងផលប៉ះពាល់ដល់អចលនទ្រព្យនៅទីក្រុងហុងកុងដែរ។
ទិន្នន័យថ្មីបំផុតពីនាយកដ្ឋានផ្ដល់ចំណាត់ថ្នាក់ និងវាយតម្លៃរបស់ទីក្រុងហុងកុងបង្ហាញថា តម្លៃការិយាល័យនៅទីក្រុងហុងកុងបានធ្លាក់ចុះ ៨,៥ ភាគរយក្នុងខែកុម្ភៈធៀបដើមឆ្នាំមុន។
ទីផ្សារលំនៅឋានប្រណីតរបស់ទីក្រុងនេះកំពុងទទួលរងផលប៉ះពាល់។ កូវីដ១៩បានរារាំងប្រជាជនក្នុងការធ្វើដំណើរទៅទីក្រុងហុងកុង។
យោងតាមក្រុមហ៊ុន Savills Plc តម្លៃអចលនទ្រព្យប្រណីតទូទាំងទីក្រុងហុងកុងបានធ្លាក់ចុះជាមធ្យម ៤,៥ ភាគរយនៅត្រីមាសទី ១ ធៀបឆ្នាំ ២០១៨។ តំបន់ជុំវិញស្ថានីយ West Kowloon ដែលបានគាំទ្រជាពិសេសដោយជនជាតិចិនដីគោកធ្លាក់ចុះជិត ៧ ភាគរយ។
លោក Raymond Lee អគ្គនាយកក្រុមហ៊ុន Savills របស់ទីក្រុងហុងកុង និងក្រុមហ៊ុន Greater China បានឲ្យដឹងនៅក្នុងសន្និសីទព័ត៌មានខ្លីមួយកាលពីខែមុនថា៖ «អ្នកទិញភាគច្រើនគឺជាប្រជាជនរស់នៅក្នុងតំបន់»។
ទោះយ៉ាងណាអ្វីដែលតម្រូវការក្នុងស្រុកមាននៅតែរឹងមាំ។ ទីក្រុងហុងកុង បានកត់ត្រាចុងសប្ដាហ៍ល្អបំផុតរបស់ខ្លួនសម្រាប់ការលក់អាផាតមិនបន្ទាប់បន្សំក្នុងរយៈពេល ៧ ឆ្នាំកាលពីចុងសប្ដាហ៍មុន។
លោក Louis Chan នាយកទទួលបន្ទុកផ្នែកលំនៅឋានរបស់ក្រុមហ៊ុន Centaline Property បានថ្លែងថា៖ «ប្រជាជនទីក្រុងហុងកុងរំពឹងថា ជំងឺកូវីដ១៩ នឹងស្ថិតក្រោមការគ្រប់គ្រងជាបណ្ដើរៗ ហើយកត្តានេះបានធ្វើឲ្យប្រសើរឡើងដល់ទំនុកចិត្តទីផ្សារដែលមានភាពមិនច្បាស់លាស់»៕LA