The Phnom Penh Post Search

Search form

ខណៈ​ពេល​តម្លៃ​ដី​បន្ត​កើន​ឡើង ទីផ្សារ​ជួល​កាន់​តែ​រឹងមាំ

Content image - Phnom Penh Post
ទិដ្ឋភាពនៃទីក្រុងភ្នំពេញ។ ហុង មិនា

ខណៈ​ពេល​តម្លៃ​ដី​បន្ត​កើន​ឡើង ទីផ្សារ​ជួល​កាន់​តែ​រឹងមាំ

ស្រប​ពេល​ដែល​ឆ្នាំ​២០១៦ ឈាន​ទៅ​បញ្ចប់​ការ​កើន​ឡើង​​នៃ​តម្លៃ​ដី​ត្រូវបាន​គេ​សង្កេត​ឃើញ​ថា មិន​ថមថយ​បន្តិច​ឡើយ។

ចរន្ត​នេះ​គឺ​ពុំមែន​ត្រឹមតែ​បន្តិច​ម្តងៗ ឬ​យ៉ាង​​​ឆាប់​រហ័ស​នោះ​ទេ តម្លៃ​ដីធ្លី​នៅ​ទូទាំង​ប្រទេស​នៅតែ​​កើនឡើង​ទៅ​ជា​លំដាប់​ដោយ​មាន​អត្រា​វិនិយោគ​វិស័យ​អចលនទ្រព្យ និង​សំណង់ ក៏​កើន​ឡើង​ក្នុង​​ល្បឿន​ឆាប់​រហ័ស​ដែរ​។​

​ទោះជា​យ៉ាង​ណា​ទិដ្ឋភាព​វិជ្ជមាន​មួយ​គឺ​នៅ​ពេល​ដែល​មាន​ការ​កញ្ជ្រោល​ឡើង​នៃ​តម្លៃ​ដី ទីផ្សារ​ជួល​លំនៅដ្ឋាន​នៅ​រាជធានី​ភ្នំពេញ ត្រូវ​បាន​អ្នក​ជំនាញ​ទីផ្សារ​អចលនទ្រព្យ​និយាយ​ថា នៅ​តែ​មាន​ស្ថិរភាព​។

កាល​ពី​ខែ​មុន​ក្រុមហ៊ុន CBRE Thailand បាន​កំណត់​រាជធានី​ភ្នំពេញ ថា​ជា​ទីផ្សារ​អាស៊ាន​មួយ​ដែល​មាន​សក្តានុពល ជា​មួយ​នឹង​អចលនទ្រព្យ ដែល​មាន​ភាព​ទាក់ទាញ​បំផុត​ដោយ​សារ​មាន​តម្រូវ​ការ​ខ្លាំង និង​ផលិតផល​ផ្គត់ផ្គង់​ហាក់បី​ដូចជា​​មាន​កំណត់ ប៉ុន្តែ​កំពុង​តែ​កើន​ឡើង​បើ​ធៀប​​ទៅ​នឹង​ប្រទេស​ផ្សេងៗ​ក្នុង​តំបន់​នេះ។​

អ្នក​ស្រី Aliwassa Pathnadabutr នាយក​គ្រប់គ្រង​របស់​ក្រុមហ៊ុន CBRE Thailand បាន​ប្រាប់​កាសែត​បាងកក​ប៉ុស្តិ៍​កាល​ពី​ពេល​ថ្មីៗ​នេះ​ថា ដោយ​ទទួល​បាន​ទិន្នផល​កំណើន​ចំនួន​ប្រាំបី​ភាគរយ​ ក្នុង​មួយ​ឆ្នាំ​អចលនទ្រព្យ​សម្រាប់​ជួល​នៅ​ក្នុង​រាជធានី​ភ្នំពេញ មាន​សភាព​រឹងមាំ​បំផុត​នៅ​ក្នុង​ចំណោម​វិស័យ​ដែល​ទាក់​ទង​នឹង​វិស័យ​អចលនទ្រព្យ​ដទៃ​ទៀត​ទាំងអស់។

អ្នក​ស្រី Pathnadabutr បាន​ឱ្យ​ដឹង​ថា វិស័យ​អាផាតមិន​នៅ​ក្នុង​រាជធានី​របស់​កម្ពុជា មាន​អត្រា​ថ្លៃ​ជួល​ពី​៨០ ទៅ​៩០​ភាគរយ​ដែល​អត្រា​ជួល​ក្នុង​មួយ​ម៉ែត្រ​ការ៉េ​ត្រូវ​បាន​កំណត់​នៅ​រវាង​ ២​០ ​និង ​២៨ ​ដុល្លារ​។

បើ​យោង​តាម​លោក James Padden នាយក​គ្រប់គ្រង​នៃ​សេវាកម្ម​ការិយាល័យ​របស់​ក្រុម​ហ៊ុន CBRE Cambodia បាន​បញ្ជាក់​ជាមួយ​ភ្នំពេញ​ប៉ុស្តិ៍​អចលនទ្រព្យ​ថា អត្រា​នៃ​ចំនួន​អ្នក​ស្នាក់​នៅ​នា​ពេល​បច្ចុប្បន្ន​សម្រាប់​សេវាកម្ម​អាផាតមិន​មាន​រហូត​ដល់​ជិត​៨៧​ភាគរយ​។

លោក Padden បាន​ថ្លែង​ថា​ ៖ «​នេះ​គឺជា​ការ​កើន​ឡើង​ ១,២០​ ភាគរយ​ពី​មួយ​ត្រី​មាស​ទៅ​មួយ​ត្រី​មាស ហើយ​ការ​កើន​ឡើង​នេះ​មាន​លក្ខណៈ​ល្អ​ខ្លាំង​ណាស់​»។

លោក​បាន​បន្តថា អាផាតមិន​កម្រិត A នៅ​រាជធានី​ភ្នំពេញ នាពេល​បច្ចុប្បន្ន​ត្រួវបាន​គេ​ជួ​លពី​១៩​ទៅ​២២​ដុល្លារ​ក្នុង​មួយ​ម៉ែត្រ​ការ៉េ ចំណែក​អាផាតមិន​កម្រិត B មាន​តម្លៃ​ចាប់ពី​១៥​ទៅ​ជុំវិញ​១៨​ដុល្លារ​ក្នុង​មួយ​ម៉ែត្រ​ការ៉េ​។

ពី​មួយ​ត្រីមាស​ទៅ​មួយ​ត្រីមាស​ចំនួន​អាផាតមិន​កម្រិត B បាន​កើន​ឡើង ២,២០​ភាគរយ​។ អាផាតមិន​កម្រិត A បាន​​រក្សា​ស្ថិរភាព​។

តួ​លេខ​ទាំង​នេះ​ចង្អុល​ទៅ​កាន់​ទីផ្សារ​ដែល​​ទើបតែ​ងើប​រួច​ផុតពី​ការ​កើន​ឡើង​នៃ​តម្លៃ​ដី​ទូទាំង​វិស័យ​នេះ​។

បើ​ប្រៀប​ធៀប​ទៅ​នឹង​សេវាកម្ម​អាផាតមិន​កម្រិត A នៅ​ក្នុង​ទីក្រុង​បាងកក ដែល​ជា​ធម្មតា​នឹង​ជួល​នូវ​តម្លៃ​ប្រហាក់​ប្រហែល​៣០​ដុល្លារ​ក្នុង​មួយ​ម៉ែត្រ​ការ៉េ លោក Padden បាន​បញ្ជាក់​ថា​ ៖ «​ការ​ជួល​នៅ​តែ​មាន​តម្លៃថោក​ជាង​ទីក្រុង​ផ្សេងៗ​ទៀត នៅក្នុង​តំបន់​អាស៊ី​អាគ្នេយ៍ បើ​យើង​មើល​រាជធានី​ភ្នំពេញ ក្នុង​ទស្សនៈ​វិស័យ​តំបន់​»​។

​ទោះជា​យ៉ាង​ណា​ទីផ្សារ​ជួល​នេះ​មិន​ត្រូវបាន​រំពឹងថា នឹង​នៅតែ​រឹងមាំ​ក្នុង​រយៈពេល​យូរ​ជាង​នេះ​ទេ​។

«​ទីផ្សារ​នេះ​អាច​ស្ថិត​នៅ​ក្រោម​សម្ពាធ គឺ​នៅ​ពេល​ដែល​គម្រោង​ខុន​ដូ​សំខាន់ៗ ត្រូវ​បាន​សាងសង់​ហើយ​ពេញ​លេញ​ក្នុង​រយៈពេល​ពីរ​ឆ្នាំ​បន្ទាប់ ហើយ​ខុន​ដូ​ទាំង​នេះ​នឹង​បន្ថែម​ការ​ប្រកួត​ប្រជែង​ទៅ​លើ​សេវាកម្ម​ស្តុក​អាផាតមិន ដែល​មាន​ស្រាប់ ស្រប​ពេល​ដែល​វិនិយោគិន​ជួល​អចលនទ្រព្យ​ព្យាយាម​ស្វែងរក​អ្នក​ជួល​»។ នេះ​បើ​តាម​ការ​អះអាង​របស់​លោក Padden។ «​នោះ​គឺ​អាច​ដាក់​សម្ពាធ​លើ​ការ​ជួល​»​។

​ខណៈ​ពេល​យល់​ស្រប​ទៅ​នឹង​ការ​វិភាគ​របស់ Padden ដែល​និយាយ​ថា ទីផ្សារ​ជួល​នៅ​ថេរ ដោយ​មិន​គិត​ការ​ប៉ះពាល់​ពី​ការ​កើន​ឡើង​តម្លៃ​ដី លោក Sovannaroth Khan ជា​ប្រធាន​វាយ​តម្លៃ​នៅ​ក្នុង​សេវាកម្ម​អចល​ទ្រព្យ​ឯករាជ្យ ក៏បាន​គិត​ដោយ​រាប់​បញ្ចូល បញ្ហា​នៃ​ការ​ផ្គត់​ផ្គង់​លើស​តម្រូវ​ការ និង​ការ​ប៉ះពាល់​របស់​វា​នៅ​លើ​ទីផ្សារ​ជួល​។

​លោក Khan និយាយ​ថា​៖ «​តម្រូវការ​សេវា​ជួល​នេះ គឺ​បាន​មក​ភាគ​ច្រើន​ពី​ជន​បរទេស និង​ជន​បរទេស​ស្នាក់​នៅ​រយៈពេល​ខ្លី និង​ភ្ញៀវទេសចរ​។ មិន​យូរ​ប៉ុន្មាន [​នៅ​ក្នុង​រយៈពេល​ពីរ​ឆ្នាំក្រោយ​] ការ​ផ្គត់​ផ្គង់​លើស​តម្រូវ​ការ​ខុន​ដូ​នឹង​មាន​ឥទ្ធិពល​មួយ​ចំនួន​ដែល​វា​នឹង​ជំរុញ​ឲ្យ​ចំនួន​នៃ​ការ​ជួល​ធ្លាក់​ចុះ​ដោយ​សារ​ការ​ធ្លាក់​ចុះ​នៃ​តម្លៃ​ខុន​ដូ​»​។

​លោក​បាន​បន្ថែម​ទៀត​ថា នេះ​ទំនងជា​អាច​​ជំរុញ​ឱ្យ​ជនបរទេស ឬ​អង្គភាព​ណា​មួយ​ទិញ​ជាជាង​ជួល​។

លោក​បន្តថា​ ៖ «​ទីផ្សារ​ជួល​បន្ទាប់មក​នឹង​ត្រូវ​រង​ផល​ប៉ះពាល់​ជា​អវិជ្ជមាន​»​។

​អត្រា​ជួល​សម្រាប់​ពេល​ឥឡូវនេះ​ស្ថិត​នៅ​ក្នុងតម្លៃ​សមរម្យ អាផាតមិន​ធម្មតាៗ នៅ​បឺ​ង​កេងកង​៣ អាច​ចាប់ផ្តើម​ពី​តម្លៃ​ទាបៗ​ដូច​ជា​៣០០​ដុល្លារ​ក្នុង​មួយ​យូនីត​ក្នុង​មួយ​ខែ ហើយក៏​អាច​មាន​តម្លៃ​រហូត​ដល់​ ៧០០ ​ដុល្លារ​ដែរ​។ សម​ភាគី​របស់​ខ្លួន អាផាតមិន​ថ្មីៗ​នៅ​ទួល​ទំពូង (​ផ្សារ​រុស្ស៊ី) មាន​ចាប់​ពី ២០០​ទៅ​ដល់ ៦០០​ដុល្លារ​ក្នុង​មួយ​ខែ​។

​នៅ​ពេល​ដែល​គម្រោង​ខុន​ដូ​ធំៗ​ទាំង​អស់​កំពុង​ប្តូរ​វេន​គ្នា ដើម្បី​ឈាន​ដល់​ការ​បញ្ចប់​ក្នុង​រយៈ​ពេល​ពីរ​ឆ្នាំ​ខាង​មុខ លោក Padden បាន​បន្ថែម​ថា​៖ «​នៅ​ដំណាក់​កាល​នោះគេ​នឹង​អាច​ឃើញ​មាន​ភាពខុស​គ្នា ដោយ​អចលនទ្រព្យ​ដែល​ត្រូវ​បាន​សាង​សង់​ឡើង​ក្នុង​ស្ដង់ដារ​ខ្ពស់​ហើយ​គ្រប់គ្រង​បានល្អ រួមទាំង​ស្ថិតនៅ​ទីតាំង​ល្អ​ទៀត​នោះ វា​អាច​ឲ្យ​ម្ចាស់​អចលនទ្រព្យ​នោះ ធ្វើ​ឲ្យ​ថ្លៃ​ជួល និង​ចំនួន​នៃ​អ្នក​ជួល​​មាន​ស្ថិរភាព ឬអាច​នឹង​កើន​ឡើង​ផង​ដែរ​»។

វា​មាន​ន័យ​ថា​សម្រាប់​អា​ផាត​មិន​ដទៃ​ទៀត «​ការ​គ្រប់គ្រង​មិន​បាន​ល្អ អគារ​គុណភាព​ទាប នឹង​ទទួលរង​នូវ​កង្វះ​អ្នក​ជួល ហើយ​នេះ​នឹង​ជំរុញ​ឲ្យ​មានការ​កាត់​បន្ថយ​ថ្លៃ​ជួល​ដើម្បី​ទាក់ទាញ​ភ្ញៀវ​» នេះ​បើ​តាម​ការ​សន្និដ្ឋាន​របស់​លោក​៕

អត្ថបទគួរចាប់អារម្មណ៍