.jpg)
ទិដ្ឋភាពនៃចំណុចគល់ស្ពានព្រះមុនីវង្សនៃខណ្ឌច្បារអំពៅ។ ហេង ជីវ័ន
ស្ថិតនៅត្រើយម្ខាងនៃទន្លេបាសាក់ និងមានចម្ងាយមិនឆ្ងាយពីចំណុចកណ្តាលរាជធានីភ្នំពេញច្បារអំពៅដែលមានទីតាំងភូមិសាស្ត្រប្រហាក់ប្រហែលនឹងតំបន់ជ្រោយចង្វារកំពុងក្លាយជាខណ្ឌ ១ ក្នុងចំណោមខណ្ឌទាំង ១២ របស់រាជធានីភ្នំពេញដែលមានសក្តានុពលខ្លាំងសម្រាប់គម្រោងអភិវឌ្ឍន៍លំនៅឋាន។
មានទីតាំងនៅតាមបណ្តោយផ្លូវជាតិលេខ ១ ខណ្ឌច្បារអំពៅដែលមានមនុស្សរស់នៅប្រមាណ ១៤០០០០ នាក់ត្រូវបានចែកចេញជា ៨ សង្កាត់គឺសង្កាត់ច្បារអំពៅទី ១ ច្បារអំពៅទី ២ និរោធ ព្រែកប្រា ក្បាលកោះ ព្រែកឯង ព្រែកថ្មី និងវាលស្បូវ។ ជាមួយនឹងការកើនឡើងតម្រូវការលំនៅឋាននៅក្នុងរាជធានីភ្នំពេញ អ្នកអភិវឌ្ឍន៍បានសម្លឹងឃើញឱកាសវិនិយោគគម្រោងលំនៅឋាននៅក្នុងតំបន់នេះ។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានប្រសាសន៍ថា៖ «បច្ចុប្បន្ននេះខណ្ឌច្បារអំពៅកំពុងទាក់ទាញគម្រោងលំនៅឋានជាច្រើនដោយសារតែវាជាតំបន់សម្រាប់ការកម្សាន្ត និងស្នាក់នៅ ដែលមានគុណសម្បត្តិពីធម្មជាតិដូចជាទន្លេចំនួន ២ នៅសងខាងពោលគឺទន្លេបាសាក់ និងទន្លេមេគង្គក្រោម និងដើមឈើជាច្រើនដែលធ្វើឱ្យមានអារម្មណ៍ស្រស់ថ្លា និងចង់រស់នៅទីនោះ»។
លោក គីម ហ៊ាង បានបន្ថែមទៀតថាកាលពី ១០ ឆ្នាំមុនខណ្ឌច្បារអំពៅមិនមានអ្វីអភិវឌ្ឍច្រើននោះទេតែ បន្ទាប់ពីគម្រោង បុរី ប៉េងហួត បានទៅទីនោះ គេមើលឃើញមានគម្រោងលំនៅឋានជាច្រើនផ្សេងទៀតក៏ទៅវិនិយោគនៅទីនោះដែរ។
លោក យឹម សុជាតិ អគ្គនាយកក្រុមហ៊ុន CDN Property បាននិយាយថា បច្ចុប្បន្នគេឃើញមានបុរីជាច្រើនដូចជា បុរី ហេងមានជ័យ បុរីសម្បត្តិមានហេង និងបុរីហាយតិចជាដើមដែលបានអភិវឌ្ឍនៅច្បារអំពៅ ហើយការលក់ក៏ទទួលបានជោគជ័យផងដែរ។ ជាទូទៅច្បារអំពៅមានគម្រោងលំនៅឋានច្រើនជាងគម្រោងពាណិជ្ជកម្ម និងឧស្សាហកម្ម។
ទោះបីជាច្បារអំពៅកំពុងទាក់ទាញគម្រោងលំនៅឋានជាច្រើនក្ដី តម្លៃដីធ្លីក្នុងតំបន់នេះហាក់មិនសូវមានការកើនឡើងគួរឱ្យកត់សម្គាល់នោះទេ បើប្រៀបធៀបទៅនឹងខណ្ឌដទៃទៀតនៅក្នុងរាជធានីភ្នំពេញ។
លោក យឹម សុជាតិ បានមានប្រសាសន៍ថា៖ «តម្លៃដីនៅច្បារអំពៅមិនមានការកើនឡើងច្រើនទេនាពេលបច្ចុប្បន្នបើធៀបនឹងខណ្ឌដទៃទៀតដូចជាខណ្ឌដង្កោ ព្រែកព្នៅ សែនសុខ និងពោធិ៍សែនជ័យ ដោយសារច្បារអំពៅមិនមានក្រុមហ៊ុនអន្តរជាតិធំៗ និងសាលារៀនអន្តរជាតិច្រើនទៅទីនោះ។ លើសពីនេះទៅទៀតច្បារអំពៅមិនមានផ្លូវធំៗខ្វាត់ខ្វែងច្រើនទេ លើកលែងតែផ្លូវជាតិលេខ ១។ ដូច្នេះតម្លៃដីធ្លីនៅទីនោះពិបាកនឹងកើនឡើងថែមទៀតណាស់»។
វីឡាប្រណីតៗរបស់គម្រោង ប៉េង ហួត បឹងស្នោរ។មឿន ញាណ
ដីលំនៅឋានមានតម្លៃជាមធ្យមពី ១០០ ទៅ ៣០០ ដុល្លារក្នុង ១ ម៉ែត្រការ៉េ ចំណែកដីពាណិជ្ជកម្មតាមបណ្ដោយផ្លូវជាតិលេខ ១ ពីបុរីប៉េងហួតទៅស្ពានច្បារអំពៅមានតម្លៃចាប់ពី ១៥០០-២៥០០ ដុល្លារ។ ពីបុរីប៉េងហួតទៅបុរីសម្បត្តិមាស តម្លៃដីស្ថិតនៅត្រឹមក្រោម ១៥០០ ដុល្លារក្នុង ១ ម៉ែត្រការ៉េ។ នេះបើយោងតាមលោក សុជាតិ។
អ្នកស្រី តុប ស្រីម៉េង ដែលជាគណនេយ្យករម្នាក់បម្រើការឱ្យក្រុមហ៊ុនឯកជនមួយនៅក្នុងរាជធានីភ្នំពេញទើបបានទិញផ្ទះនៅបុរីប៉េងហួតនាខណ្ឌច្បារអំពៅ បាននិយាយថាគាត់ និងស្វាមីបានសម្រេចចិត្តជ្រើសរើសយកទីតាំងនោះ ពីព្រោះវាមានខ្យល់អាកាសបរិសុទ្ធជាមួយនឹងទន្លេ ២ នៅសងខាងដែលធ្វើឱ្យគ្រួសារគាត់មានអារម្មណ៍ស្រស់ស្រាយហើយលើសពីនេះច្បារអំពៅមិនមានរោងចក្រឧស្សាហកម្មច្រើនដែលបំពុលបរិយាកាស និងប៉ះពាល់សុខភាពនោះទេ។
ដើម្បីទាក់ទាញអ្នកអភិវឌ្ឍន៍មកវិនិយោគនៅខណ្ឌច្បារអំពៅ អាជ្ញាធរមូលដ្ឋានកំពុងធ្វើកិច្ចការដើម្បីកែលម្អហេដ្ឋារចនាសម្ព័ន្ធបន្ថែមទៀតតាមរយៈការជួសជុលផ្លូវថ្នល់ និងប្រព័ន្ធលូជាដើម។
លោក ហួត ហ៊ុយ នាយករដ្ឋបាលសាលាខណ្ឌច្បារអំពៅមានប្រសាសន៍ថា ទាក់ទងនឹងការអភិវឌ្ឍហេដ្ឋារចនាសម្ព័ន្ធគឺអាជ្ញាធរមានផែនការច្បាស់លាស់ក្នុងការជួសជុលផ្លូវថ្នល់ ហើយគម្រោងហេដ្ឋារចនាសម្ព័ន្ធគឺស្របតាមសៀវភៅផែនការ ៣ ឆ្នាំរបស់រាជរដ្ឋាភិបាល។ យើងអនុវត្តកម្មវិធីអភិវឌ្ឍន៍រយៈពេល ៣ ឆ្នាំដែលត្រូវចំណាយថវិកាប្រហែល ៥ ពាន់លានរៀលក្នុង ១ ឆ្នាំពីសាលារាជធានីភ្នំពេញ។ ថវិកានេះត្រូវបានចំណាយទៅលើប្រាក់ខែ ប្រាក់ឧបត្ថម្ភសម្រាប់មន្ត្រីរដ្ឋាភិបាល សមាជិកក្រុមប្រឹក្សា និងកម្មវិធីវិនិយោគដែលគ្របដណ្តប់លើបញ្ហានានា ដូចជាការស្ថាបនា ជួសជុល និងការស្តារឡើងវិញ ការជួសជុលលូ និងទឹកស្អុយ។ នេះបើយោងតាមលោក ហ៊ុយ។
ទាក់ទងនឹងតម្លៃអចលនទ្រព្យនៅខណ្ឌច្បារអំពៅលោក ហួត ហ៊ុយ មានប្រសាសន៍ថា៖ «អចលនទ្រព្យនៅសង្កាត់ច្បារអំពៅទី ១ និងសង្កាត់ច្បារអំពៅទី ២ មានតម្លៃខ្ពស់ជាងគេ ដោយផ្អែកលើពន្ធអចលនទ្រព្យប្រចាំឆ្នាំទៅលើសង្កាត់ទាំង ២ នេះ។ សង្កាត់ច្បារអំពៅទី ១ និងសង្កាត់ច្បារអំពៅទី ២ មានតម្លៃថ្លៃជាងសង្កាត់ផ្សេងទៀតព្រោះវានៅជិតទីក្រុងជាងគេ»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រាប់ថា អាជ្ញាធររាជធានីតែងតែខិតខំប្រឹងប្រែងដើម្បីអភិវឌ្ឍទីក្រុងបន្ថែមទៀត ពិសេសផ្តោតលើហេដ្ឋារចនាសម្ព័ន្ធដូចជាការកសាងស្ពាន ផ្លូវថ្នល់ និងប្រព័ន្ធលូជាដើម៕
