ភ្នំពេញៈ ការដាក់បញ្ចូលក្នុងទីផ្សាររបស់គម្រោង Star City បានធ្វើឲ្យចំនួនបន្ទប់ខុនដូដែលមានវត្តមានលើទីផ្សារក្នុងរាជធានីភ្នំពេញនៅដំណាច់ត្រីមាសទី ៣ ឆ្នាំ ២០១៩ កើនឡើងជាង ៥ ភាគរយ បើធៀបនឹងត្រីមាសទី ២។ នេះបើយោងតាមរបាយការណ៍ចេញផ្សាយដោយក្រុមហ៊ុនអចលនទ្រព្យ CBRE Cambodia។
របាយការណ៍ស្រាវជ្រាវបានឲ្យដឹងថា គម្រោងខុនដូ Star Clty ដែលស្ថិតនៅទល់មុខនឹងស្ពានអាកាសផ្សារដីហុយ និងមានចំនួនបន្ទប់ស្នាក់នៅសរុប ៨៥០ យូនីតបានជំរុញឲ្យចំនួនបន្ទប់ខុនដូដែលបញ្ចប់ការសាងសង់ក្នុងក្រុងភ្នំពេញកើនឡើង ៥,១ ភាគរយ ដល់ ១៧ ៥០០ យូនីត ពីចំនួន ១៦ ៦៥០ យូនីត កាលពីត្រីមាសទី ២ ឆ្នាំ ២០១៩។ ចំនួននេះបើធៀបទៅនឹងត្រីមាសទី ៣ ឆ្នាំ ២០១៨ គឺមានកំណើន ៤៥,៣ ភាគរយ។
ការស្រាវជ្រាវរបស់ក្រុមហ៊ុន CBRE Cambodia បានរកឃើញថា ក្នុងចំណោមខុនដូ ១៧ ៥០០ យូនីតនេះ មានខុនដូប្រភេទតម្លៃសមរម្យចំនួន ២២ ភាគរយ តម្លៃមធ្យម ៥៤ ភាគរយ និងប្រភេទប្រណីត ២៤ ភាគរយ។
សម្រាប់តម្លៃវិញមានការប្រែប្រួលពី ១-២ ភាគរយប៉ុណ្ណោះ រវាងត្រីមាសទី ២ និងត្រីមាសទី ៣ ដោយខុនដូប្រភេទតម្លៃសមរម្យមានតម្លៃជាមធ្យម ១ ៥៣១ ដុល្លារ ក្នុង ១ ម៉ែត្រការ៉េ ខណៈខុនដូប្រភេទតម្លៃមធ្យមមានតម្លៃ ២ ៦០០ ដុល្លារ និងប្រភេទប្រណីតមានតម្លៃ ៣ ១៩០ ដុល្លារ។
ជាមួយគ្នានេះដែរក្នុងត្រីមាសទី ៣ ឆ្នាំ ២០១៩ មានគម្រោងអភិវឌ្ឍន៍ខុនដូថ្មីដែលប្រកាសចាប់ផ្តើមចំនួន ៩ ដែលស្មើនឹងបន្ទប់ស្នាក់នៅសរុប ៥ ១៣០ យូនីត ដោយភាគច្រើនជាខុនដូលំដាប់មធ្យម និងមានទីតាំងក្នុងខណ្ឌចំការមន និងជ្រោយចង្វារ។
ចំនួននេះបានធ្វើឲ្យខុនដូដែលបានប្រកាសចាប់ផ្តើមសាងសង់ក្នុងរយៈពេល ៩ ខែ ឆ្នាំ ២០១៩ កើនឡើងដល់ ២២ គម្រោង ស្មើនឹង ១២ ០៣០ យូនីត។ ចំណែកគម្រោងខុនដូដែលបានបញ្ចប់ការសាងសង់ក្នុងរយៈពេលដូចគ្នានេះមានចំនួន ៩ គម្រោងស្មើនឹង ៣ ៣៣០ យូនីត។
លោក សំ សុខនឿន នាយកប្រតិបត្តិក្រុមហ៊ុនអចលនទ្រព្យ KW Sen Sok បានប្រាប់កាសែតភ្នំពេញប៉ុស្តិ៍កាលពីថ្ងៃម្សិលមិញថា ទីផ្សារខុនដូនៅក្នុងក្រុងភ្នំពេញបានបន្តភាពល្អប្រសើររបស់ខ្លួនជាធម្មតា ពិសេសប្រភេទខុនដូដែលមានតម្លៃសមរម្យ ដែលរំពឹងថានឹងអាចទាក់ទាញបានចំណាប់អារម្មណ៍ប្រជាជនខ្មែរឲ្យទៅទិញយ៉ាងច្រើនក្នុងរយៈពេល ៥ ឆ្នាំខាងមុខ។
លោកបានបន្តថា ស្ថានភាពតម្លៃដីកាន់តែខ្ពស់ និងចរាចរណ៍ដែលកាន់តែចង្អៀតនឹងធ្វើឲ្យមនុស្សស្វែងរកកន្លែងរស់នៅជិតកន្លែងធ្វើការ។
លោកបានមានប្រសាសន៍ថា៖ «កំណើនប្រជាជន និងការកកស្ទះចរាចរណ៍ក្នុងទីក្រុងកំពុងជំរុញឲ្យប្រជាជនខ្មែរនាំគ្នាមកទិញខុនដូរស់នៅកណ្តាលក្រុងកាន់តែច្រើន»។
ខណៈខណ្ឌចំការមនកំពុងគ្របដណ្តប់ទៅដោយខុនដូតម្លៃខ្ពស់នោះលោក សុខនឿន អះអាងថាតំបន់ភ្នំពេញថ្មីដែលមានដីធំៗច្រើន និងមានតម្លៃសមរម្យនោះនឹងក្លាយជាកន្លែងដែលប្រមូលផ្តុំទៅដោយខុនដូប្រភេទសមរម្យ និងតម្លៃមធ្យមច្រើនក្នុងរយៈពេល ៥ ឆ្នាំខាងមុខ។
ទោះយ៉ាងណាលោក សុខនឿន បញ្ជាក់ថាបើទោះជាទីផ្សារខុនដូនៅពេលនេះអាចមានតម្រូវការច្រើនគួរសមក្តីក៏ការប្រកួតប្រជែងលើទីផ្សារមានកម្រិតខ្លាំងផងដែរ។
ទិន្នន័យពីក្រសួងរៀបចំដែនដី នគរូបនីយកម្ម និងសំណង់បានបង្ហាញថា ក្នុងរយៈពេល ៩ ខែ ឆ្នាំ ២០១៩ ទុនវិនិយោគវិស័យសំណង់នៅកម្ពុជាមានតម្លៃប្រមាណ ៦,៤៩ ពាន់លានដុល្លារ កើនឡើង ៣៤,៧៣ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨ ដែលមានតម្លៃប្រមាណ ៤,៨២ ពាន់លានដុល្លារ។ ចំនួនអគារដែលមានកម្ពស់ចាប់ពី ៥ ជាន់ឡើងទៅ មានចំនួន ៣២៩ អគារ៕ LA