ក្រុងបាងកកៈ ទីក្រុងបាងកកកំពុងប្រឈមនឹងការខ្វះការផ្គត់ផ្គង់ខុនដូប្រភេទភេនហៅស៍ (penthouses) សម្រាប់ជួល ខណៈតម្រូវការបន្តមាន ហើយការផ្គត់ផ្គង់នៅមានកម្រិត។ នេះបើយោងទៅតាមកាសែតបាងកកប៉ុស្តិ៍។
យោងតាមក្រុមហ៊ុនប្រឹក្សាយោបល់ផ្នែកអចលនទ្រព្យ JLL បាងកកប៉ុស្តិ៍ បានរាយការណ៍ថា តម្លៃជួលកាន់តែទាបបានបំបាក់ទឹកចិត្តវិនិយោគិនពីការទិញខុនដូប្រភេទ penthouses សម្រាប់ជួល។
លោកស្រី Suphin Mechuchep នាយិកាគ្រប់គ្រងក្រុមហ៊ុន JLL បានថ្លែងថា៖ «ខុនដូ penthouses មានតែមួយផ្នែកតូចប៉ុណ្ណោះនៃទីផ្សារខុនដូក្នុងទីក្រុងបាងកក។ ការកើនឡើងនៃការផ្គត់ផ្គង់ក្នុងផ្នែកនេះត្រូវបានកំណត់ដោយនិយមន័យរបស់ penthouse ខ្លួនឯងផ្ទាល់ ដែលជាទូទៅខុនដូនេះមានស្ថិតនៅលើដំបូលអគារ និងមានផ្ទៃដែលអាចប្រើប្រាស់ធំជាងខុនដូធម្មតាដែលស្ថិតនៅក្នុងការអភិវឌ្ឍដូចគ្នា»។
យោងតាមមជ្ឈមណ្ឌលព័ត៌មានអចលនទ្រព្យប្រទេស ថៃ របស់ក្រុមហ៊ុន JLL បានឲ្យដឹងថា ការផ្គត់ផ្គង់ penthouse ក្នុងទីក្រុងបាងកកមានការកើនឡើងចាប់តាំងពីឆ្នាំ ២០១៣ ដោយជាមធ្យមមានជាង ៨០ យូនីតចូលទៅក្នុងទីផ្សារក្នុងមួយឆ្នាំៗចន្លោះពីឆ្នាំ ២០១៣ និងឆ្នាំ ២០១៨ មានន័យថាមានកំណើនប្រចាំឆ្នាំចំនួន ៧ ភាគរយ។
បើទោះបីជាមានកំណើនលឿនជាងមុនក្តី ក៏ការផ្គត់ផ្គង់ penthouse សរុបក្នុងទីក្រុងនេះនឹងកើនឡើងដល់ត្រឹមតែ ១៥៩០ យូនីតគិតត្រឹមដំណាច់ឆ្នាំ ២០១៨ ដែលមានចំណែកតិចជាង ០,៣ ភាគរយនៃចំនួនខុនដូសរុបនៅទីក្រុងបាងកក។
ក្នុងចំណោម penthouse សរុប ៤៤០ យូនីតគឺជាការអភិវឌ្ឍបែបទំនើប និងទំនើបខ្លាំង ដែលមានចំនួនតិចជាង ០,១% នៃស្តុកខុនដូក្នុងទីផ្សារ។
ខណៈការផ្គត់ផ្គង់មានកម្រិត មានតម្រូវការជាបន្តសម្រាប់គ្រួសារបរទេសដែលត្រូវការ penthouse សម្រាប់ជួល។
ខុនដូបែបនេះនៅក្នុងទីក្រុងបាងកក ជាទូទៅផ្តល់ជូនទីធ្លាដែលអាចប្រើប្រាស់បាន ៣០០ ម៉ែត្រការ៉េ ដោយមាន ៤ ទៅ ៥ បន្ទប់ ហើយតម្លៃជួលគឺចាប់ពី ២៥០ ០០០ ទៅ ៣៥០ ០០០ បាតក្នុងមួយខែ។ ខុនដូទាំងនេះកំពុងមានទីផ្សារជួល ហើយត្រូវបានគេកក់មុនតាំងពីអ្នកជួលចាស់មិនទាន់ចេញម្ល៉េះ។
លោកស្រី Suphin បានថ្លែងថា៖ «ភាគច្រើនបំផុតនៃខុនដូ penthouse សម្រាប់ជួលគឺស្ថិតក្នុងការអភិវឌ្ឍខុនដូចាស់ដែលអ្នកវិនិយោគបានទិញយូនីតទាំងនោះជាច្រើនឆ្នាំមកហើយក្នុងតម្លៃទាបខ្លាំងជាងពេលឥឡូវនេះ ហើយហេតុដូច្នេះទទួលបានផលពីការជួល ៣ ភាគរយជាមធ្យម»។
លោកស្រីបន្តថា៖ «បច្ចុប្បន្នវិនិយោគិនដែលទិញ penthouse មុនគេដើម្បីជួលអាចរំពឹងថាទទួលបានផលជួលជាមធ្យមតិចជាង ១ ភាគរយ។ ផលទាបបែបនេះបានកាត់បន្ថយចំណង់របស់វិនិយោគិនក្នុងការទិញ penthouse សម្រាប់ការជួលយកចំណូល»៕ PS