ភ្នំពេញៈ គម្រោងអភិវឌ្ឍន៍លំនៅឋានប្រណីត រចនាប័ទ្មចម្រុះបែបអ៊ីតាលី និងបារាំង លើកដំបូងដែលវិនិយោគ ៧,៥ លានដុល្លារនឹងចាប់ផ្តើមសាងសង់នៅដើមខែមិថុនា គឺជាគម្រោងធ្វើឡើងជាពិសេសសម្រាប់អ្នកមានប្រាក់ច្រើន។ នេះបើតាមការអះអាងរបស់អ្នកនៅក្នុងវិស័យនេះ។
គម្រោងវីឡាប្រណីតដែលមានផ្ទះ ១៧ ខ្នងសាងសង់លើផ្ទៃដីជាង ៧០០០ ម៉ែត្រការ៉េជាការវិនិយោគរួមគ្នារវាងវិនិយោគិនក្នុងស្រុកជាមួយវិនិយោគិនបារាំង និងអ៊ីតាលីដោយមានទីតាំងជាប់មាត់ទន្លេតាមបណ្តោយផ្លូវជាតិលេខ ១ និងចម្ងាយប្រមាណ ៥ គីឡូម៉ែត្រពីស្ពានព្រះមុនីវង្ស។
លោក Seraj Sutton នាយកផ្នែកប្រតិបត្តិការក្រុមហ៊ុន Century 21 Cambodia ដែលទទួលបានសិទ្ធិលក់ផ្តាច់មុខសម្រាប់គម្រោង Mekong Harmony បាននិយាយថានេះជាគម្រោងលំនៅឋានដ៏ល្អអស្ចារ្យដែលនឹងត្រូវសាងសង់ឡើងប្រកបដោយប្រណីតភាព។
លោកបានថ្លែងថា៖ «នេះជាគម្រោងពិសេសសម្រាប់អ្នកមានប្រាក់ចំណូលខ្ពស់។ លក្ខណពិសេសរបស់ Mekong Harmony គឺផ្ទះនីមួយៗសុទ្ធតែមានអាងហែលទឹក និងមានបំពាក់សម្ភារដែលមានគុណភាពខ្ពស់នាំចូលពីប្រទេសអ៊ីតាលីព្រមទាំងនៅលើដំបូលផ្ទះនីមួយៗនឹងមានការរចនាយ៉ាងពិសេសសម្រាប់ការជួបជុំ និងរៀបចំពិធីជប់លៀងផ្សេងៗ»។
លោកបន្តថាទីតាំងគម្រោងនេះអាចឲ្យគេមើលឃើញទិដ្ឋភាពនៃទីក្រុងកោះពេជ្រ និងរាជធានីភ្នំពេញផងដែរ។
Mekong Harmony គឺជាគម្រោងអភិវឌ្ឍន៍លំនៅឋានប្រណីតទី ២ នៅជាប់មាត់ទន្លេតាមបណ្តោយផ្លូវជាតិលេខ ១ បន្ទាប់ពីគម្រោងអភិវឌ្ឍន៍ The Palm របស់ក្រុមហ៊ុន Oxley Worldbridge ដែលមានផ្ទះចំនួន ២០០ ខ្នងត្រូវបានចាប់ផ្តើមការសង់កាលពីដើមខែឧសភានេះ។
បើតាមផែនការគម្រោងនេះនឹងចាប់ផ្តើមសាងសង់ឡើងនៅដើមខែមិថុនាដែលនឹងត្រូវចំណាយពេល ១២ ខែ។
គម្រោង Mekong Harmony ដែលមានវីឡាប្រណីតច្រើនប្រភេទនេះមានតម្លៃចាប់ពីជាង ២០ ម៉ឺនដុល្លារទៅដល់ជាង ៩៩ ម៉ឺនដុល្លារ។ គិតមកត្រឹមចុងសប្តាហ៍មុន ផ្ទះចំនួន ៦ ក្នុងគម្រោងនេះត្រូវបានអតិថិជនកក់រួចហើយ។ នេះបើតាមក្រុមហ៊ុន Century 21 Cambodia។
អគ្គនាយកក្រុមហ៊ុន ឃី រៀលអ៊ីស្ទេត លោក សន សៀប បាននិយាយថា តំបន់មាត់ទន្លេតាមបណ្តោយផ្លូវជាតិលេខ ១ កំពុងមានសក្តានុពលខ្លាំងសម្រាប់គម្រោងអភិវឌ្ឍន៍លំនៅឋាន៕LA