ភ្នំពេញៈ ការបន្តឆ្លងរាលដាលជំងឺកូវីដ ១៩ កំពុងធ្វើឱ្យការកំណត់កាលបរិច្ឆេទនៃការសាងសង់ស្ពានពីភ្នំពេញទៅតំបន់អរិយក្សត្រត្រូវអូសបន្លាយ ដោយមកដល់ពេលនេះក្រុមការងារជំនាញប្រទេសទាំង ២ នៅមិនទាន់បានជួបគ្នាទេ ទោះបីកម្ពុជាបានបង្កើតក្រុមការងាររបស់ខ្លួនរួចហើយក៏ដោយ។
ប្រធានាធិបតីសាធារណរដ្ឋកូរ៉េ លោក មូន ជេអ៊ីន កាលពីអំឡុងខែវិច្ឆិកា ឆ្នាំ ២០២០ បានប្រកាសថា ប្រទេសកូរ៉េនឹងជួយសាងសង់ស្ពានមិត្តភាពកម្ពុជា-កូរ៉េ ឆ្លងកាត់ទន្លេមេគង្គ។
លោក វ៉ាស៊ឹម សូរិយា អ្នកនាំពាក្យក្រសួងសាធារណការ និងដឹកជញ្ជូនប្រាប់ ភ្នំពេញ ប៉ុស្តិ៍ កាលពីថ្ងៃទី ២០ ខែមករាថា បន្ទាប់ពីទទួលបានការសន្យាពីប្រទេសកូរ៉េខាងត្បូង ពីការផ្តល់អំណោយស្ពានឆ្លងទន្លេភ្ជាប់ពីភ្នំពេញទៅតំបន់អរិយក្សត្រ កម្ពុជាក៏បានរៀបចំក្រុមការងារជំនាញរបស់ខ្លួនដើម្បីត្រៀមធ្វើការជាមួយភាគីកូរ៉េ។
លោកបន្តថា ប៉ុន្តែដោយសារការឆ្លងកូវីដ ១៩ នៅលើពិភពលោកមិនទាន់អាចគ្រប់គ្រងបានទាំងស្រុង ដូច្នេះមកដល់ពេលនេះក្រុមការងារប្រទេសទាំង ២ នៅមិនទាន់បានជួបប្រជុំគ្នាទេ។
លោកបន្ថែមថា ដោយសារក្រុមការងារជំនាញប្រទេសទាំង ២ មិនទាន់ជួបគ្នា ហេតុនេះគេមិនទាន់អាចកំណត់ពីការសាងសង់ស្ពាននេះនឹងត្រូវធ្វើកន្លែងណា ពេលណា និងមានតម្លៃប៉ុន្មាននៅឡើយទេ។
លោកនិយាយថា៖ «កម្ពុជាបានបង្កើតក្រុមការងារសម្រាប់គម្រោងសាងសង់ស្ពានតភ្ជាប់ពីភ្នំពេញទៅតំបន់អរិយក្សត្ររួចហើយ ដោយយើងនៅរង់ចាំតែការមកដល់របស់ភាគីកូរ៉េប៉ុណ្ណោះ»។ លោកបន្ថែមថា៖ «សម្រាប់ពេលវេលាសាងសង់គឺមិនទាន់អាចនិយាយថានឹងចាប់ផ្តើមនៅពេលណាបានទេ ព្រោះគេត្រូវការពេលវេលាសិក្សាបច្ចេកទេសសាងសង់ និងថវិកាបន្ថែមទៀត»។
ប្រធានសមាគមអចលនទ្រព្យសកលលោក សំ សុខនឿន បានប្រាប់ថា ព័ត៌មានពីការផ្តល់ជំនួយរបស់កូរ៉េសម្រាប់សាងសង់ស្ពានទៅតំបន់អរិយក្សត្រ មិនបានធ្វើឱ្យតម្លៃអចលនទ្រព្យកើនតម្លៃទេ ដោយគ្រាន់តែសកម្មភាពនៃការទិញលក់មានច្រើនជាងមុន។ អរិយក្សត្រ គឺជាទីតាំងល្អដែលអ្នកវិនិយោគមិនគួរមើលរំលង ព្រោះនៅពេលមានស្ពានតភ្ជាប់មកចំណុចកណ្តាលភ្នំពេញទីនោះនឹងមានការអភិវឌ្ឍលឿន។
លោកប្រាប់ថា៖ «ដោយសារព័ត៌មានគម្រោងស្ពាននេះបានប្រកាសក្នុងអំឡុងពេលការឆ្លងរាលដាលជំងឺកូវីដ ១៩ ហេតុនេះតម្លៃដីនៅអរិយក្សត្រ មិនបានហក់ឡើងខ្ពស់ទេ បើធៀបនឹងដើមឆ្នាំ ២០២០ គ្រាន់តែចលនានៃការទិញលក់ គឺមានភាពមមាញឹកជាងមុន»។
លោកបន្តថា បច្ចុប្បន្នដីនៅអរិយក្សត្រតំបន់ល្អបំផុត (ជាប់មាត់ទន្លេ) មានតម្លៃជាមធ្យមក្នុងរង្វង់ ១ ០០០ ដុល្លារ ក្នុង ១ ម៉ែត្រការ៉េ ដីឡូត៍លំនៅឋានមានតម្លៃក្នុងរង្វង់ ៣០០ ដុល្លារ និងដីសម្រាប់អភិវឌ្ឍន៍ធំៗ មានតម្លៃជាមធ្យមចន្លោះពី ១៨០-២៥០ ដុល្លារ។
ជាមួយគ្នានេះលោកអះអាងថា៖ «តម្លៃដីនៅអរិយក្សត្រនឹងស្ទុះឡើងខ្ពស់ពេលស្ពានចាប់ផ្តើមសាងសង់ ដែលវានឹងស្ទុះឡើងខ្ពស់ដូចនៅតំបន់ជ្រោយចង្វារនាពេលបច្ចុប្បន្ន»។
កន្លងមកកម្ពុជាធ្លាប់លើកយកតំបន់កំពង់ចម្លងស្វាយជ្រុំអរិយក្សត្រធ្វើជាកន្លែងមានលក្ខណៈអំណោយផលសម្រាប់ការកសាងស្ពាន ប៉ុន្តែសម្រាប់ការងារជាក់ស្តែងគឺគេនៅមិនទាន់កំណត់យកកន្លែងណាជាផ្លូវការទេ ដោយត្រូវរង់ចាំអ្នកជំនាញភាគីទាំង ២ សិក្សារួមគ្នាសិន។ នេះបើយោងតាមលោក វាស៊ឹម សូរិយា៕