.jpg)
ទិដ្ឋភាពនៅទីតាំងដែលគ្រោងសាងសង់គម្រោង Thai Boon Roong Twin Tower កាលពីម្សិលមិញ។ ហ៊ឹន ពីសី
ភ្នំពេញៈ គម្រោងសាងសង់អគារភ្លោះថៃប៊ុនរ៉ុង Thai Boon Roong Twin Tower ដែលមានតម្លៃជាង ៣ ពាន់លានដុល្លារ និងកម្ពស់ជាង ៥០០ម៉ែត្រ នៅមិនទាន់ដឹងពីពេលវេលាជាក់លាក់នៅឡើយទេរហូតមកដល់ពេលនេះ។ នេះបើយោងតាមអ្នកគ្រប់គ្រងគម្រោង។
មជ្ឈមណ្ឌលពាណិជ្ជកម្ម Thai Boon Roong Twin Tower ដែលមានទីតាំងនៅទល់មុខកាស៊ីណូ Naga World នឹងមានអគារខ្ពស់ៗចំនួន ៦ ក្នុងនោះអគារភ្លោះនៅចំកណ្តាលមានកម្ពស់ ១៣៣ ជាន់នឹងត្រូវសាងសង់លើផ្ទៃដីជិត ៥ ហិកតា។
លោក ទូស សាភឿន ប្រធានក្រុមស្ថាបត្យករនៃក្រុមហ៊ុន Thai Boon Roong Group ដែលជាម្ចាស់គម្រោង បានប្រាប់ ភ្នំពេញប៉ុស្តិ៍ ថា រយៈពេលជាង ១ ខែហើយ ដែលក្រុមហ៊ុនបានដាក់កម្មករ និងគ្រឿងចក្រមួយចំនួនធ្វើជញ្ជាំងទប់ដីដើម្បីបង្ការកុំឲ្យមានការបាក់ដីនៅពេលសាងសង់ មុននឹងឈានទៅសាងសង់អគារធំៗទាំង ៦។ ទោះយ៉ាងណាលោកប្រាប់ថា ការសាងសង់អគារនេះនៅមិនទាន់ដឹងថានឹងចាប់ផ្តើមនៅពេលណានោះទេ។
លោកថ្លែងថា៖ «រហូតមកដល់ពេលនេះយើងមិនទាន់បានកំណត់ពេលវេលា ដើម្បីបើកការដ្ឋានសាងសង់គម្រោង Thai Boon Roong Twin Tower នៅឡើយទេ ដោយពេលនេះយើងគ្រាន់តែយើងធ្វើជញ្ជាំងទប់ដីជាមុនសិន»។
គម្រោងអគារពាណិជ្ជកម្មខ្ពស់ជាងគេដំបូងនៅចំកណ្តាលទីក្រុងភ្នំពេញនេះត្រូវបានប្រកាសសាងសង់លើកដំបូងនៅក្នុងអំឡុងឆ្នាំ ២០១៦ តែត្រូវបានពន្យារពេលសាងសង់ជាបន្តបន្ទាប់រហូតមកដល់ពេលនេះ ដោយថ្នាក់ដឹកនាំក្រុមហ៊ុនតែងអះអាងថា ប្លង់អគារត្រូវការកែលម្អឡើងវិញ។ លោក សាភឿន បញ្ជាក់ថា៖ «ការកែសម្រួលប្លង់នៅពេលនេះរួចរាល់ ១០០ ភាគរយហើយ»។
តាមគម្រោង Thai Boon Roong Twin Tower នឹងត្រូវប្រើប្រាស់ជាសណ្ឋាគារកម្រិតផ្កាយ៥ អាផាតមិន ខុនដូ អគារការិយាល័យ ហាងលក់ទំនិញ និងផ្សារទំនើបជាដើម។
លោក ង៉ែត ជូ ទីប្រឹក្សាជាន់ខ្ពស់នៅក្រុមហ៊ុន Emerging Markets Consulting(EMC) បាននិយាយថា Thai Boon Roong Twin Tower ជាគម្រោងដែលត្រូវការពេលវេលាសិក្សាយូរ ហេតុនេះការមិនទាន់កំណត់ពេលវេលាសាងសង់គឺជារឿងធម្មតា និងមិនមានផលប៉ះពាល់ដល់ទីផ្សារវិស័យអចលនទ្រព្យនៅកម្ពុជាទេ។ លោកលើកឡើងថា កន្លងមកក៏មានគម្រោងធំៗជាច្រើននៅកម្ពុជាបានពន្យារពេលសាងសង់ផងដែរ។
លោកថ្លែងថា៖ «ខ្ញុំគិតថា វាមិនជាបញ្ហាសម្រាប់ទីផ្សារវិស័យអចលនទ្រព្យនៅកម្ពុជាទេសម្រាប់គម្រោង ១-២ នោះ ខណៈមានគម្រោងជាច្រើនទៀតនៅដំណើរការជាធម្មតា»។
របាយការណ៍ពីក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ក្នុងរយៈពេល ២ ខែ ដើមឆ្នាំ ២០១៩ ការវិនិយោគវិស័យសំណង់នៅកម្ពុជាមានតម្លៃជាង ១ ៣៨៤ លានដុល្លារ កើនឡើងជាង ២ ដងបើធៀបនឹងរយៈពេលដូចគ្នាក្នុងឆ្នាំ ២០១៨៕LA
