.jpg)
លោក ម៉ម សិរីបញ្ញា នាយកប្រតិបត្តិ Easy Property។ រូបថត ហ៊ឹន ពិសី
ភ្នំពេញៈ គម្រោងអាជីវកម្មពុះដីឡូត៍លក់ត្រូវបានគេមើលឃើញថានៅតែបន្តរីកយ៉ាងខ្លាំងនៅតំបន់ជាយក្រុងភ្នំពេញ ខណៈវាបាននិងកំពុងទាក់ទាញអតិថិជនជាពលករបម្រើការនៅក្រៅប្រទេស។ នេះបើតាមការអង្កេតរបស់អ្នកជំនាញផ្នែកអចលនទ្រព្យ។
លោក ម៉ម សិរីបញ្ញា នាយកប្រតិបត្តិក្រុមហ៊ុនអចលនទ្រព្យ Easy Property Investment បានប្រាប់ភ្នំពេញប៉ុស្តិ៍កាលពីថ្ងៃពុធថា អត្រានៃអ្នកធ្វើការនៅក្រៅប្រទេសដែលផ្ញើប្រាក់ដើម្បីទិញដីឡូត៍នៅឆ្នាំ ២០១៩ នេះមានការកើនឡើងបើធៀបនឹងឆ្នាំមុន។ លោកបន្តថា ភាគច្រើនជាពលករធ្វើការនៅកូរ៉េខាងត្បូង។
លោកថ្លែងថា៖ «ចាប់តាំងពីដើមឆ្នាំ ២០១៩ មកចំនួនពលករដែលទៅធ្វើការនៅបរទេស ផ្ញើលុយមកឲ្យបងប្អូនជួយទិញដីឡូត៍ទុកឲ្យខ្លួនពេលវិលត្រឡប់មកប្រទេសវិញបានកើនឡើងយ៉ាងច្រើន»។
តាមលោក ម៉ម សិរីបញ្ញា គម្រោងអាជីវកម្មនេះបង្ហាញពីការកើនឡើងផងដែរនៅឆ្នាំនេះពីចន្លោះ ១៥ ទៅ ៣០ ភាគរយ បើធៀបនឹងឆ្នាំ ២០១៨។
ខណៈមិនមានទិន្នន័យកត់ត្រាជាផ្លូវការលោក ម៉ម សិរីបញ្ញា បានឲ្យដឹងថា ចំនួនពលករដែលផ្ញើប្រាក់ដើម្បីទិញដីនៅក្នុងស្រុកកើនឡើងជាង ២០ ភាគរយ បើធៀបឆ្នាំទៅ។
របាយកាណ៍លទ្ធផលសន្និបាតបូកសរុបការងារឆ្នាំ ២០១៨ របស់ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា ពលករកម្ពុជាដែលទៅធ្វើការនៅក្រៅប្រទេសមានចំនួន ១,២៣ លាននាក់ ក្នុងនោះប្រទេសថៃមានចំនួន ១,១៤ លាននាក់ ប្រទេស កូរ៉េខាងត្បូង មាន ៤៩ ០៩៩ នាក់ជប៉ុន ៩ ១៩៤ នាក់ ម៉ាឡេស៊ី ៣០ ១១ នាក់ សិង្ហបុរី ៨៣១ នាក់ ហុងកុង ៥៤ នាក់ និងអារ៉ាប៊ី សាអ៊ូឌីត ១៦ នាក់។
បច្ចុប្បន្ននៅស្ទើរគ្រប់ទិសនៃជាយរាជធានីភ្នំពេញ គេឃើញមានសកម្មភាពនៃការពុះដីឡូត៍កើតឡើងជាបន្តបន្ទាប់ ខណៈភាគច្រើនស្ថិតនៅភាគខាងជើង និងខាងលិចរាជធានីភ្នំពេញ។
ដីដែលអ្នកអភិវឌ្ឍន៍ពុះជាឡូត៍ភាគច្រើនមានទំហំ ៥x២០ ម៉ែត្រ និងមានតម្លៃចន្លោះពី ៨០០០ ទៅដល់ ២៥- ០០០ ដុល្លារនៅតំបន់ជាយក្រុង។
លោក ម៉ម សិរីបញ្ញា បានឲ្យដឹងថា វាមិនមានបញ្ហាសម្រាប់អ្នកទៅធ្វើការនៅបរទេសប៉ុន្មានទេ ព្រោះការងារដែលពួកគេធ្វើនៅទីនោះក៏ទទួលបានប្រាក់ខែច្រើនគួរសមដែរ។
ខណៈមានការលើកឡើងថា កន្លងមកមានអ្នកទិញដីឡូត៍មួយចំនួនត្រូវចាញ់ការបោកបញ្ឆោតរបស់ម្ចាស់ដីឡូត៍នោះលោក សិរីបញ្ញា បានប្រាប់ថា ករណីបែបនេះស្ទើរតែមិនមានទៀតទេពេលនេះ។ លោកបានថ្លែងថា៖ «ដើម្បីឲ្យប្រាកដថា នឹងមិនមានបញ្ហាណាមួយកើនឡើងនោះ ការទិញលក់ទាំងអស់ ត្រូវតែធ្វើឡើងដោយឆ្លងកាត់តាមរយៈភ្នាក់ងារ ឬ ក្រុមហ៊ុនអចលនទ្រព្យដែលមានអាជ្ញាប័ណ្ណត្រឹមត្រូវ»។
បច្ចុប្បន្ននិន្នាការទីផ្សារដីឡូត៍ក៏កំពុងតែកើនមានច្រើនផងដែរនៅតាមបណ្តាខេត្តដែលមានសក្តានុពលសេដ្ឋកិច្ចដូចជា ខេត្តកណ្តាល ព្រះសីហនុ កំពត សៀមរាប កំពង់ស្ពឺ និងតំបន់នៅតាមព្រំដែនជាដើម៕LA
