ភ្នំពេញៈ ខុនដូ Urban Village 2 កម្ពស់ ៥១ ជាន់ ដែលមានទុនវិនិយោគ ២០០ លានដុល្លារ ជាការវិនិយោគរបស់ក្រុមហ៊ុន GOLDFAME Group មានមូលដ្ឋានក្នុងទីក្រុងហុងកុងបានប្រកាសពីការចាប់ផ្តើមសាងសង់ជាផ្លូវការកាលពីថ្ងៃពុធដោយគ្រោងនឹងបញ្ចប់ការសាងសង់នៅចុងឆ្នាំ ២០២២។
Urban Village 2 ជាបណ្តុំនៃអគារធំៗចំនួន ៤ ដែលជាផ្នែកមួយនៅក្នុងគម្រោង Urban Village សាងសង់លើផ្ទៃដីសរុបជាង ៧០ ០០០ ម៉ែត្រការ៉េ លើទីតាំង Factory Phnom Penh ស្ថិតនៅតាមចន្លោះផ្លូវជាតិលេខ ២ ក្នុងខណ្ឌមានជ័យ ។ គម្រោងខុនដូនេះ ១ ៧០០ យូនីត មានចំណតរថយន្តដ៏ធំទូលាយ និងមានសួនច្បារ និងកន្លែងសម្រាកលម្ហែជាច្រើនទៀត។
លោក Ben Li ប្រធានក្រុមហ៊ុន GOLDFAME Group និយាយថា បន្ទាប់ពីការសាងសង់ Urban Village 1 កម្ពស់ ២៣ ជាន់ បានបញ្ចប់ការសាងសង់គ្រោងអគារ និងលក់អស់ ១០០ ភាគរយ ក្រុមហ៊ុនបានចាប់ផ្តើមប្រកាសពីការចាប់ផ្តើមសាងសង់គម្រោងថ្មីជាបន្តទៀត។
លោកបានបន្តថា ដោយសារការរចនាប្លង់ Urban Village 2 ផ្តោតជាចម្បងសម្រាប់អ្នកដែលចង់បាននូវកន្លែងរស់នៅល្អប្រណីតនោះ ដូច្នេះគម្រោងថ្មីនេះអាចនិយាយនឹងអាចទាក់ទាញអតិថិជនបានច្រើន ខណៈតម្លៃរបស់វាក៏មានលក្ខណៈសមរម្យផងដែរ។
លោក Ben Li បានថ្លែងថា៖ «ជាមួយនឹងកម្ពស់ដ៏ខ្ពស់ និងគុណភាពកម្រិតស្តង់ដាអន្តរជាតិនោះ គម្រោងនេះនឹងក្លាយជាផ្នែកមួយដ៏សំខាន់នៅក្នុងរាជធានីភ្នំពេញ»។
លោកប្រាប់ទៀតថាជាមួយនឹងបទពិសោធនៃការរស់នៅក្នុងទីក្រុងហុងកុងដែលមានអគារខ្ពស់ៗជាច្រើននោះ លោកពិតជាមានបំណងផ្តល់ឲ្យប្រជាជនខ្មែរនូវកន្លែងរស់នៅមួយប្រកបដោយប្រណីតភាពដូចនៅទីក្រុងហុងកុងផងដែរ។
គម្រោង Urban Village 2 មានតម្លៃចាប់ពី ១ ៦០០ ដុល្លារ ក្នុង ១ ម៉ែត្រការ៉េឡើងទៅ ឬចាប់ពីជាង ៧ ម៉ឺនដុល្លារ ឡើងទៅក្នុងមួយយូនីត។
លោក គីមហ៊ាង ប្រធានក្រុមហ៊ុនអចលនទ្រព្យ KW Cambodia បានប្រាប់ថា Urban Village 2 ជាគម្រោងធំដែលមានការចាប់អារម្មណ៍ច្រើន ព្រោះស្ថិតក្នុងតំបន់ដែលនៅថ្ងៃអនាគតនឹងមានបណ្តុះអគារខ្ពស់ៗជាច្រើន។ Urban Village 2 គឺគ្រាន់តែជាផ្នែកមួយគម្រោងដែលនៅពេលខាងមុខនឹងមានអគារចម្រុះជាច្រើន។
លោកបន្តថា ចំណុចខ្លាំងបំផុតរបស់ Urban Village 2 គឺការរចនា និងតម្លៃ។ ម្យ៉ាងទៀតវាក៏ជាកន្លែងដែលស្ថិតនៅក្បែរចំណុចកណ្តាលរាជធានីភ្នំពេញផងដែរ។ លោកថ្លែងថា៖ «ខ្ញុំគិតថា គម្រោងនេះនឹងងាយទទួលបានជោគជ័យ ព្រោះតាមរយៈព័ត៌មានពីការលក់គម្រោងទី ១ គឺការលក់មានភាពឆាប់រហ័សបំផុត»។
លោកប្រាប់ទៀតថា ភាពខ្លាំងមួយទៀតរបស់ Urban Village 2 គឺមិនបានប្រកាសលក់មុនពេលសាងសង់ដូចគម្រោងមួយចំនួនដែលម្ចាស់ប្រកាសលក់មុន ដើម្បីប្រមូលលុយពីអតិថិជនមកសាងសង់នោះទេ។
របាយការណ៍ស្រាវជ្រាវរបស់ក្រុមហ៊ុនអចលនទ្រព្យ CBRE Cambodia បានឲ្យដឹងថា គិតត្រឹមដំណាច់ឆមាសទី ១ ឆ្នាំ ២០១៩ បន្ទប់ខុនដូក្នុងរាជធានីភ្នំពេញដែលសាងសង់រួចរាល់ និងដាក់លើទីផ្សារមាន ១៦ ៦៥៧ យូនីត ហើយនៅដំណាច់ឆ្នាំនេះរំពឹងថានឹងកើនដល់ ៣១ ០០០ យូនីត៕LA