The Phnom Penh Post Search

Search form




Logo of Phnom Penh Post newspaper Phnom Penh Post - គោល​នយោបាយ​លំនៅឋាន​សាធារណៈ​ ត្រូវ​បាន​គេ​ព្យាករ​ថា ​នឹង​នាំ​មក​កំណើន​វិជ្ជមាន​សម្រាប់​វិស័យ​សំណង់

គោល​នយោបាយ​លំនៅឋាន​សាធារណៈ​ ត្រូវ​បាន​គេ​ព្យាករ​ថា ​នឹង​នាំ​មក​កំណើន​វិជ្ជមាន​សម្រាប់​វិស័យ​សំណង់

Content image - Phnom Penh Post
សំណង់​អគារ​លំនៅឋាន​សាធារណៈ (ប៊ូឌិញ) បន្សល់​ទុក​ពី​សម័យ​សង្គម​រាស្ត្រ​និយម។

គោល​នយោបាយ​លំនៅឋាន​សាធារណៈ​ ត្រូវ​បាន​គេ​ព្យាករ​ថា ​នឹង​នាំ​មក​កំណើន​វិជ្ជមាន​សម្រាប់​វិស័យ​សំណង់

គោល​នយោបាយ​លំនៅឋាន​សាធារណៈ​ដែល​ផ្តោត​លើ​ការ​ផ្តល់​លំនៅឋាន​ក្នុង​តម្លៃ​សមស្រប​មួយ​ដល់​ប្រជា​ពលរដ្ឋ​ដែល​មាន​ប្រាក់​ចំណូល​ថ្នាក់​កណ្តាល និង​ប្រជាជន​ក្រីក្រ ត្រូវ​បាន​គេ​សង្ឃឹម​ថា​នឹង​ធ្វើ​ឲ្យ​មាន​ការ​រីក​ចម្រើន​ដល់​វិស័យ​សំណង់​នៅ​ប្រទេស​កម្ពុជា។ នេះ​បើ​តាម​ការ​ឲ្យ​ដឹង​ពី​អ្នក​ជំនាញ​នៅ​ក្នុង​វិស័យ​នេះ។

ពង្រាង​គោល​នយោបាយ​ជាតិ​ស្តីពី​លំនៅឋាន​សាធារណៈ​បាន​បង្ហាញ​ថា កំណើន​ចំនួន​ប្រជាជន​កម្ពុជា និង​ការ​កើន​ឡើង​ចំនួន​អ្នក​ធ្វើ​ចំណាក​ស្រុក​ពី​ជន​បទ​ទៅ​ទីក្រុង ឬ​ទីប្រជុំជន​នឹង​ធ្វើ​ឲ្យ​មាន​តម្រូវ​ការ​លំនៅឋាន​បន្ថែម​ទៀត​រហូត​ដល់​ទៅ​ជាង​មួយ​លាន​ខ្នង នៅ​ត្រឹម​ឆ្នាំ​២០០៣។

លោក សេង ឡូត អ្នក​នាំ​ពាក្យ​ក្រសួង​រៀបចំ​ដែនដី នគរូប​នីយកម្ម និង​សំណង់ បាន​ថ្លែង​ថា​តាម​រយៈ​គោល​នយោបាយ​នេះ រដ្ឋាភិបាល​នឹង​ធ្វើ​ការ​ជា​មួយ​នឹង​អ្នក​អភិវឌ្ឍ​ឯកជន អ្នក​វិនិយោគ និង​ធនាគារ ជា​ប្រភព​ទុន ក្នុង​ការ​អនុវត្ត​គោល​នយោបាយ​ដើម្បី​ផ្គត់ផ្គង់​លំនៅឋាន​ក្នុង​តម្លៃ​សម​ស្រប​ដល់​ប្រជា​ពលរដ្ឋ​ដែល​មាន​ប្រាក់​ចំណូល​ថ្នាក់​កណ្តាល ចំណូល​ទាប និង​ប្រជាជន​ក្រីក្រ។

លោក​បាន​មាន​ប្រសាសន៍​ថា៖ «រហូត​មក​ដល់​ពេល​នេះ បន្ទាប់​ពី​ប្រកាស​គោល​នយោបាយ យើង​កំពុង​ផ្សព្វផ្សាយ និង​ផ្តល់​ការ​បណ្តុះ​បណ្តាល​ដល់​មន្ត្រី​ចាប់​ពី​ថ្នាក់​ជាតិ និង​ថ្នាក់​ក្រោម​ជាតិ​ពី​គោល​នយោបាយ​នេះ ដើម្បី​ឲ្យ​ពួក​គេ​ដឹង​ពី​ការ​ទទួល​ខុស​ត្រូវ​របស់​ពួក​គេ។ ក្រុម​មន្ត្រី​របស់​យើង​ក៏​កំពុង​តែ​ធ្វើ​ការ​លើ​ឯកសារ​គាំទ្រ​ជា​ច្រើន​ទៀត ជា​មួយ​នឹង​ដៃ​គូ​អន្តរជាតិ ដើម្បី​ទទួល​គាំទ្រ និង​ធានា​បាន​ការ​អនុវត្ត​គោល​នយោបាយ​នេះ ហើយ​មន្ត្រី​របស់​យើង​នា​ពេល​នេះ ក៏​និង​បាន​កំពុង​តែ​សិក្សា​ជាមួយ​នឹង​វិស័យ​ឯកជន​អ្នក​អភិវឌ្ឍ និង​ធនាគារ​លើ​ការ​សហការ​គ្នា​ដើម្បី​អនុវត្ត​គោល​នយោបាយ​នេះ»។

លោក ឡូត បាន​បន្ត​ថា៖ «ការ​សហការ​គ្នា​រវាង​រដ្ឋាភិបាល និង​វិស័យ​ឯកជន​លើ​ការ​អនុវត្ត​គោល​នយោបាយ​នេះ នឹង​កើត​មាន​ច្រើន​រូប​ភាព​អាស្រ័យ​ទៅ​លើ​តម្រូវ​ការ​របស់​ប្រជា​ពលរដ្ឋ និង​ទីតាំង។ អគារ​លំនៅឋាន​អាច​នឹង​ត្រូវ​សាងសង់​លើ​ដី​រដ្ឋ​ដោយ​អ្នក​អភិវឌ្ឍ ឯកជន​ហើយ​នឹង​លក់​ក្នុង​តម្លៃ​មួយ​ដែល​សម្រប​សម្រួល​ដោយ រដ្ឋ»។

ទោះ​ជា​យ៉ាង​ណា​ក៏​ដោយ​លោក ឡូត ពុំ​បាន​បញ្ជាក់​ឲ្យ​បាន​ច្បាស់​លាស់​ពី​ពេលវេលា​ចាប់​ផ្តើម​ធ្វើ​ការ​សាងសង់​ឬ​ទីតាំង​របស់​លំនៅឋាន​ទាំង​នោះ​ទេ ប៉ុន្តែ​លោក​បាន​ថ្លែង​ថា គម្រោង​នេះ​នឹង​ចាប់​ផ្តើម​ក្រោយ​ពេល​ដែល​ការ​ប្រមែ​ប្រមូល​ទិន្នន័យ និង​ស្ថិតិ​ត្រូវ​បាន​បញ្ចប់។

លោក​បាន​បញ្ជាក់​ថា៖ «គម្រោង នេះ​នឹង​ចាប់​ផ្តើម​ពេល​ដែល​ពួក​យើង​បាន​ប្រមូល​ទិន្នន័យ និង​ស្ថិតិ​ឲ្យ​បាន​គ្រប់​គ្រាន់។ ទីតាំង​នឹង​ត្រូវ​បាន​ជ្រើសរើស​ស្រប​តាម​តម្រូវ​ការ​ដោយ​ផ្អែក​លើ​ការ​ប្រើប្រាស់​ទិន្នន័យ​នោះ»។

នាយក​ដ្ឋាន​ផ្នែក​លំនៅឋាន​ត្រូវ​បាន​បង្កើត​ឡើង​ក្រោម​ការ​ចាត់​ចែង​របស់​ក្រសួង​រៀបចំ​ដែនដី នគរូប​នីយកម្ម និង​សំណង់ ក្នុង​គោល​បំណង​ប្រមែ​ប្រមូល​ទិន្នន័យ និង​ត្រួត​ពិនិត្យ​គម្រោង​លំនៅឋាន​ក្រោយ​ពី​ការ​ប្រកាស​គោល​នយោបាយ​នេះ។

លោក​បាន​បន្ត​ថា៖ «គោល​នយោបាយ​នេះ នឹង​មិន​បង្កើត​ជា​ការ​ប្រកួត​ប្រជែង​ដល់​អ្នក​អភិវឌ្ឍ​ឯកជន​ទេ។ ពួក​យើង​ស្វាគមន៍​ពួក​គេ​ក្នុង​ការ​មក​សហការ​ជាមួយ​នឹង​រដ្ឋាភិបាល​ក្នុង​គម្រោង​នេះ ហើយ​ប្រសិន​បើ​ពួក​គេ​ចង់​បន្ត​ធ្វើ​គម្រោង​របស់​ពួក​គេ​ពួក​គេ​នៅ​តែ​អាច​បន្ត​ធ្វើ​វា​បាន»។

អ្នក​អភិវឌ្ឍ​ឯកជន​រំពឹង​ទុក​ថា នឹង​មាន​ការ​កើន​ឡើង​ក្នុង​ការ​លក់​ក្រោយ​ពេល​ដែល​គោល​នយោបាយ​នេះ​ត្រូវ​បាន​អនុវត្ត។

លោក គុយ វ៉ាត នាយក និង​នាយក​ប្រតិបត្តិ​របស់​ក្រុមហ៊ុន Vtrust Group បាន​ប្រាប់​កាសែត ភ្នំពេញ ប៉ុស្តិ៍ កាល​ពី​ម្សិលមិញ​ថា គោល​នយោបាយ​នេះ គឺ​មាន​ប្រយោជន៍​សម្រាប់​វិស័យ​អចលនទ្រព្យ ព្រោះ​វា​នឹង​ធ្វើ​ឲ្យ​មាន​កើន​ឡើង​ក្នុង​សកម្មភាព​ទិញ​លក់ នៅ​ពេល​ដែល​ប្រជាជន​កាន់​តែ​ច្រើន​អាច​មាន​លទ្ធភាព​ទិញ​ផ្ទះ​បាន។

លោក​បាន​បន្ត​ថា៖ «គោល​នយោបាយ​នេះ​នឹង​ជួយ​ធ្វើ​ការ​លក់​ឲ្យ​កើន​ឡើង ព្រោះ​ពេល​ដែល​លំនៅឋាន​ដែល​មាន​តម្លៃ​ថោក​ត្រូវ​បាន​សាងសង់ ធនាគារ​ក៏​អាច​ផ្តល់​អត្រា​ការ​ប្រាក់​ទាប​ជាង​មុន​ដែរ។ គ្រួសារ​នីមួយៗ​អាច​នឹង​ទិញ​ផ្ទះ​ជា​ជាង​ការ​ជួល»។

អ្នក​នាង ឆាយ ស៊ីណា អ្នក​គ្រប់​គ្រង​ផ្នែក​លក់ និង​ទីផ្សារ​របស់​បុរី​វិមាន​ភ្នំពេញ បាន​ថ្លែង​ថា ទោះ​ជា​លំនៅឋាន​នោះ​ត្រូវ​បាន​សាងសង់​សម្រាប់​ក្រុម​ប្រជាពលរដ្ឋ​គោល​ដៅ​ដូច​គ្នា​ក៏​ដោយ តែ​អ្នក​អភិវឌ្ឍ​គម្រោង​លំនៅឋាន​នឹង​នៅ​តែ​អាច​រក្សា​ទុក​ចំណែក​របស់​ពួក​គេ​នៅ​ក្នុង​ទីផ្សារ​បើ​ប្រៀបធៀប​នឹង​គម្រោង​លំនៅឋាន ដែល​ត្រូវ​បាន​រៀបចំ​ដោយ​រដ្ឋាភិបាល។

អ្នក​នាង​បាន​ថ្លែង​ថា៖ «ខ្ញុំ​ជឿ​ជាក់​ថា ដោយ​សារ​តែ​គម្រោង​លំនៅឋាន​សាធារណៈ​គឺ​ត្រូវ​បាន​សាងសង់​សម្រាប់​គ្រួសារ​ដែល​មាន​ប្រាក់​ចំណូល​ថ្នាក់​ទាប គម្រោង​នោះ​នឹង​ផ្តល់​ឲ្យ​ត្រឹម​តែ​ឧបករណ៍​លំនៅឋាន​ចាំបាច់​តែ​ប៉ុណ្ណោះ ដោយ​ឡែក​គម្រោង​របស់​អ្នក​អភិវឌ្ឍ​ឯកជន​ជា​ធម្មតា គឺ​មាន​បំពាក់​ដោយ​ហេដ្ឋា​រចនា​សម្ព័ន្ធ និង​គ្រឿង​ឧបករណ៍​ល្អៗ ដូចជា ភ្លើង​អគ្គីសនី ទឹក​ស្អាត សាលារៀន និង​ភាគ​ច្រើន​ជា​ទី​តាំង​ដែល​អាច​ប្រកប​របរ​រក​ស៊ី​បាន»។

អ្នក​នាង​បាន​បញ្ជាក់​ផង​ដែរ​ថា៖ «លំនៅឋាន​ដែល​នឹង​ត្រូវ​សាងសង់​តាម​គោល​នយោបាយ​នេះ គឺ​ផ្តោត​សំខាន់​ទៅ​លើ​ក្រុម​គ្រួសារ ដែល​មាន​ប្រាក់​ចំណូល​ថ្នាក់​កណ្តាល និង​ថ្នាក់​ទាប ដូច្នេះ​វា​នឹង​ស្ថិត​នៅ​ក្នុង​ស្តង់ដារ​ដែល​អាច​នឹង​ទាក់ទាញ​អ្នក​ដែល​មាន​ថវិកា​គ្រប់គ្រាន់​ដូច​គម្រោង​ដែល​ពួក​យើង​កំពុង​តែ​ធ្វើ​នេះ​ទេ»។

ជាមួយ​គ្នា​នេះ​ដែរ លោក​ស្រី ចន្ធី អ្នក​វិភាគ​សេដ្ឋកិច្ច​ឯករាជ្យ បាន​ឆ្លើយ​តប​តាម​រយៈ​អ៊ីមែល​ថា គោល​នយោបាយ​នេះ​នឹង​ផ្តល់​ផល​ប្រយោជន៍​ដល់​គ្រួសារ​ដែល​មាន​ប្រាក់​ចំណូល​ទាប រួម​ទាំង​អ្នក​បម្រើ​ការ​រដ្ឋាភិបាល ដែល​ត្រូវ​ការ​លំនៅឋាន ដែល​បាន​ឧបត្ថម្ភ​ដែល​ជា​សិទ្ធិមនុស្ស​ជា​មូលដ្ឋាន​មួយ ប៉ុន្តែ​លោក​ក៏​បាន​បញ្ជាក់​ថា ករណី​ពុករលួយ​ក៏​នឹង​អាច​កើត​ឡើង​ក្នុង​ពេល​អនុវត្ត​គោល​នយោបាយ​នេះ​ដែរ។

លោក​បាន​សរសេរ​ក្នុង​អ៊ីមែល​នោះ​ថា៖ «ក្តី​បារម្ភ​ចម្បង​របស់​ខ្ញុំ ទាក់​ទង​នឹង​ការ​អនុវត្ត​គោល​នយោបាយ​នេះ គឺ​ករណី​អំពើ​ពុករលួយ​ដោយ​មន្ត្រី​អនុវត្ត ដែល​មិន​មាន​ក្រម​សីលធម៌។ ប្រសិន​បើ​រដ្ឋាភិបាល​ធ្វើ​ការ​ក្នុង​រូបភាព​ដៃគូ​សហការ​ការ​រៀបចំ​រវាង​ភាគី​ឯកជន និង​សាធារណៈ (PPP) យើង​អាច​សន្និដ្ឋាន​ថា ការ​អនុវត្ត​គោល​នយោបាយ​នេះ​នឹង​ធ្វើ​ឡើង​ដោយ​មាន​តម្លាភាព​គ្មាន​ភាព​លម្អៀង។ រដ្ឋាភិបាល​ក៏​អាច​មើល​គំរូ​លំនៅឋាន​សាធារណៈ​របស់​ប្រទេស​សិង្ហ​បុរី ផង​ដែរ»។

លោក​បន្ថែម​ថា៖ «ប្រសិន​បើ​គោល​នយោបាយ​នេះ គឺ​ផ្តោត​ទៅ​លើ​ក្រុម​គ្រួសារ​បម្រើ​ការងារ​សាធារណៈ​ដែល​មាន​ជីវភាព​ក្រីក្រ ឬ​ទទួល​បាន​ប្រាក់​ចំណូល​ទាប ខ្ញុំ​គិត​ថា វា​នឹង​មិន​អាច​ក្លាយ​ទៅ​ជា​ការ​ប្រកួត​ប្រជែង​ខ្លាំងក្លា​នៅ​ក្នុង​វិស័យ​ឯកជន​ទេ ព្រោះ​វិស័យ​ឯកជន​មិន​អាច​ផ្តល់​សេវាកម្ម​ទាំង​នោះ​ឲ្យ​ទៅ​ក្រុម​ប្រជា​ពលរដ្ឋ​នេះ​បាន​ឡើយ»។

លោក​បន្ត​ថា៖ «វា​នឹង​បង្កើត​ជា​ការងារ​ច្រើន​ជាង​នេះ​ក្នុង​វិស័យ​សំណង់ និង​ការ​ថែទាំ​សំណង់​អគារ ក៏​ដូច​ជា​វិស័យ​សេវាកម្ម​ផ្សេងៗ​ដែល​ពាក់ព័ន្ធ។ វា​ប្រាកដ​ជា​នឹង​ជំរុញ​ឲ្យ​មាន​ការ​រីក​ចម្រើន​នៅ​ក្នុង​សេដ្ឋកិច្ច»៕

អត្ថបទគួរចាប់អារម្មណ៍

  • អាមេរិក​ផ្តល់​ជំនួយ ​៤២ ​ម៉ឺន​ដុល្លារ​ទៀត ​ដើម្បី​ស្រាវជ្រាវ​សំណល់​គ្រាប់​បែក​ចង្កោម

    ភ្នំពេញៈ រដ្ឋាភិបាល​អាមេរិក​បាន​សម្រេច​ផ្ដល់​ជំនួយ​ជាង​ ៤២​ ម៉ឺន​ដុល្លារ​បន្ថែម​ទៀត ដល់​មជ្ឈមណ្ឌល​កំចាត់​មីន​កម្ពុជា ហៅ​កាត់​ថា CMAC ដើម្បី​ស្រាវជ្រាវ​​សំណល់​គ្រាប់​បែក​ចង្កោម​ដែល​

  • ប្រាក់ចំណេញ​សុទ្ធ Qantas ធ្លាក់ ៦,៥ ​ភាគរយ

    ក្រុងស៊ីដនីៈ ក្រុមហ៊ុន​អាកាសចរណ៍ Qantas Airways កាលពី​ថ្ងៃ​ព្រហស្បតិ៍​បាន​ចេញ​ផ្សាយ​ការធ្លាក់ចុះ​ប្រាក់​ចំណេញ​សុទ្ធ​ប្រចាំ​ឆ្នាំ ៦,៥ ភាគរយ ដោយសារ​ការធ្លាក់ចុះ​ប្រាក់​ចំណេញ​ក្នុង​គ្រា​ដែល​ប្រេង​ឆៅ​មាន​តម្លៃ​កាន់តែ​ខ្ពស់ និង​ការធ្លាក់​ថ្លៃ​ប្រាក់​ដុល្លារ​អូស្ត្រាលី​កាន់តែ​ខ្លាំង​។

  • តោខៀវ​ឲ្យ Roma ខ្ចី​ជើង​ខ្សែការពារ Zappacosta

    ក្រុងមីឡានៈ ក្លិប Roma បានប្រកាស​កាលពី​ថ្ងៃ​ពុធ​ថា ខ្សែការពារ Davide Zappacosta នៅ​ក្លិប Chelsea បាន​ចូលរួម​ក្លិប Roma ក្នុង​លក្ខខណ្ឌ​ខ្ចី​ជើង ៦ ​ខែ ប៉ុន្តែ​អាច​បន្ត​រហូតដល់​ចុងរដូវកាល​នេះ​ក៏បាន​ដែរ​។ ​

  • កូរ៉េ​ខាងជើង​មិន​ចរចា​ពី​បញ្ហា​នុយក្លេអ៊ែរ​ទេ បើសិន​ US ​នៅតែ​បន្ត​វិធានការ​យោធា​បង្ក​អារិភាព​នោះ

    ក្រុងសេអ៊ូលៈ កូរ៉េ​ខាងជើង​បាន​ថ្លែង​កាលពី​ថ្ងៃ​ព្រហស្បតិ៍​ថា​ខ្លួន​ «​មិន​ចាប់អារម្មណ៍​» ​នៅក្នុង​ការចរចា​នោះទេ លុះណា​តែ​ក្រុង​វ៉ាស៊ីនតោន​ឈប់​ «​វិធានការ​យោធា​បង្ក​អរិភាព​កាន់តែ​ខ្លាំង​ឡើង​ជាមួយ​ខ្លួន​នោះ​» ខណៈ​ប្រេសិត​ពិសេស​ជាន់ខ្ពស់​អាមេរិក​ម្នាក់​បាន​ទស្សនកិច្ច​ទៅកាន់​ក្រុង​សេអ៊ូល​ដោយ​ផ្តោត​ទៅ​លើ​ការធ្វើឲ្យ​កិច្ចចរចា​ពី​បញ្ហា​នុយក្លេអ៊ែរ​ជាមួយ​ក្រុង​ព្យុងយ៉ាង ដំណើរការ​ឡើងវិញ​។