.jpg)
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)។ រូបថត សហការី
ភ្នំពេញៈ បន្ទាប់ពីជាប់គាំងមួយរយៈនាអំឡុងពាក់កណ្តាលឆ្នាំ ២០០៨ និងឆ្នាំ ២០០៩ ដោយសារពិភពលោកជួបនឹងវិបត្តិហិរញ្ញវត្ថុសកល វិស័យអចលនទ្រព្យកម្ពុជាបានបង្ហាញសញ្ញាវិជ្ជមានជាបន្តបន្ទាប់រហូតមកដល់ពេលបច្ចុប្បន្ននេះ។
ក្នុងនាមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) ដែលទើបចូលកាន់តំណែងកាលពីថ្ងៃទី ១ ខែមករា ឆ្នាំ ២០១៩ លោក ច្រឹក សុខនីម កាលពីម្សិលមិញ បានផ្តល់បទសម្ភាសឲ្យលោក ហ៊ឹន ពិសី អ្នកយកព័ត៌មានកាសែតភ្នំពេញ ប៉ុស្តិ៍ អំពីស្ថានភាពទូទៅ និងតម្លៃអចលនទ្រព្យនៅកម្ពុជាក្នុងរយៈពេល ៣-៤ ឆ្នាំកន្លងមក និងក្តីរំពឹងសម្រាប់ឆ្នាំ ២០១៩ ព្រមទាំងលក្ខណៈទូទៅរបស់សមាគម CVEA។
តើវិស័យអចលនទ្រព្យនៅកម្ពុជាមានការវិវឌ្ឍបែបណា ក្នុងរយៈពេលប៉ុន្មានឆ្នាំចុងក្រោយនេះ?
ស្ថិរភាពនយោបាយ កំណើនសេដ្ឋកិច្ច និងកំណើនការវិនិយោគផ្ទាល់ពីបរទេស ព្រមទាំងការគាំទ្រពីវិស័យធនាគារ បានជំរុញឲ្យវិស័យអចលនទ្រព្យនៅកម្ពុជាមានភាពល្អប្រសើររៀងរាល់ឆ្នាំ ដោយនៅក្នុងរយៈពេល ៣-៤ ឆ្នាំចុងក្រោយនេះ តម្លៃអចលនទ្រព្យមានកំណើនប្រហែល ១៥ ភាគរយជារៀងរាល់ឆ្នាំ។
សម្រាប់តម្លៃអចលនទ្រព្យកាលពីឆ្នាំ ២០១៨ ធៀបនឹងឆ្នាំ ២០១៧ គឺកើនឡើងក្នុងចន្លោះពី ១០ ទៅ ១៥ ភាគរយ ក្នុងនោះតម្លៃដីកើនឡើងក្នុងរង្វង់ ២០ ភាគរយ ខណៈតម្លៃលំនៅឋាន និងអគារពាណិជ្ជកម្ម កើនឡើងក្នុងរង្វង់ ១០ ភាគរយ។
បច្ចុប្បន្នតើកន្លែងណាដែលអចលនទ្រព្យ មានតម្លៃខ្ពស់ជាងគេ?
សង្កាត់បឹងកេងកង ១ ក្នុងរាជធានីភ្នំពេញ នៅតែជាកន្លែងដែលអចលនទ្រព្យមានតម្លៃខ្ពស់ជាងគេ ដោយបច្ចុប្បន្នដីនៅទីនោះមានតម្លៃចាប់ពី ៤ ៥០០ ដុល្លារឡើងទៅក្នុង ១ ម៉ែត្រការ៉េ។ ក្រៅពីរាជធានីភ្នំពេញ អចលនទ្រព្យដែលមានតម្លៃខ្ពស់បន្ទាប់ គឺក្នុងខេត្តព្រះសីហនុ ខេត្តសៀមរាប និងខេត្តកំពតជាដើម។
តើទីណាដែលតម្លៃអចលនទ្រព្យ ស្ទុះងើបលឿនជាងគេ? ហេតុអ្វី?
ខេត្តព្រះសីហនុ ជាកន្លែងដែលតម្លៃអចលនទ្រព្យមានកំណើនខ្ពស់ជាងគេនៅកម្ពុជាក្នុងរយៈពេល ១ ទៅ ២ឆ្នាំចុងក្រោយនេះ ដោយកន្លែងខ្លះតម្លៃបានកើនឡើងលើសទ្វេដងនៅក្នុងរយៈពេល ១ ឆ្នាំ។
ការស្ទុះឡើងនៃតម្លៃដីធ្លីនាពេលនេះ ដោយសារហេតុផលមួយចំនួនដូចជា ការពង្រីកកំពង់ផែសមុទ្រទឹកជ្រៅ កំណើនក្រុមហ៊ុនវិនិយោគក្នុងតំបន់សេដ្ឋកិច្ចពិសេសខេត្តព្រះសីហនុ និងការមកដល់យ៉ាងច្រើននៃចំនួនភ្ញៀវទេសចរ និងវិនិយោគិនជនជាតិចិន ដែលធ្វើឲ្យមានតម្រូវការដីសម្រាប់សាងសង់សំណង់ជាច្រើនមានដូចជា សណ្ឋាគារ កាស៊ីណូ ភោជនីយដ្ឋានលំនៅឋាន និងកន្លែងកម្សាន្តជាដើម។
តំបន់ដែលតម្លៃអចលនទ្រព្យមានកំណើនលឿនបន្ទាប់ពីខេត្តព្រះសីហនុ គឺខេត្តកំពត និងក្រុងប៉ោយប៉ែត របស់ខេត្តបន្ទាយមានជ័យ។
តើលោកគិតថាវិស័យអចលនទ្រព្យក្នុងឆ្នាំ ២០១៩ នេះ នឹងមានដំណើរការទៅបែបណា?
ទីផ្សារអចលនទ្រព្យក្នុងឆ្នាំ ២០១៩ នេះនឹងបន្តភាពរឹងមាំរបស់ខ្លួនជាបន្តទៀត ពិសេសតំបន់នៅជាយរាជធានីភ្នំពេញ និងបណ្តាខេត្តនៅជាប់តំបន់មាត់សមុទ្រ និងព្រំដែន។ តម្លៃអចលនទ្រព្យជាមធ្យមក្នុងឆ្នាំ ២០១៩ នឹងកើនឡើងក្នុងរង្វង់ ១៥ ភាគរយជាបន្តទៀត។
សម្រាប់ខេត្តព្រះសីហនុ ដោយសារកាលពីឆ្នាំមុន តម្លៃអចលន ទ្រព្យបានកើនឡើងក្នុងអត្រាដ៏ខ្ពស់លើសពីព្យាករណ៍នោះ ខ្ញុំគិតថា អត្រាកំណើននៅក្នុងឆ្នាំ ២០១៩ នេះនឹងមិនខ្ពស់ទៀតទេ ដោយនិន្នាការនេះអាចវិវឌ្ឍទៅខេត្តជិតខាងវិញម្តង។
តើលោកមានទស្សនវិស័យបែបណាចំពោះទីផ្សារអចលនទ្រព្យនៅកម្ពុជា រយៈពេល ៥ ឆ្នាំខាងមុខ?
ខ្ញុំគិតថា ចាប់ពីពេលនេះរហូតដល់ឆ្នាំ ២០២៣ វិស័យអចលនទ្រព្យនៅកម្ពុជា នឹងរក្សាបាននូវភាពល្អប្រសើររបស់ខ្លួន ព្រោះបើយើងពិនិត្យមើលទៅលើស្ថានភាពនយោបាយកម្ពុជា និងកំណើនសេដ្ឋកិច្ច គឺមានភាពរឹងមាំល្អណាស់។ ម៉្យាងវិញទៀត តាមការស្រាវជ្រាវវដ្តនៃវិស័យអចលនទ្រព្យជាធម្មតារីកចម្រើនក្នុងរយៈពេល ៣០ ឆ្នាំ ទើបអាចមានការប្រែប្រួលម្តង។ បើគិតចាប់ពីមានវិបត្តិនាឆ្នាំ ២០០៨ រហូតមកដល់ពេលនេះគឺទើបតែមានរយៈពេល ១១ឆ្នាំប៉ុណ្ណោះ ដូច្នេះវិស័យនេះនឹងមិនងាយមានបញ្ហាអ្វីទេ។
បន្ទាប់ពីឆ្នាំ ២០២៣ ខ្ញុំនៅតែមានសុទិដ្ឋិនិយមដដែលចំពោះទីផ្សារនេះនៅកម្ពុជា។
តើការប្រើប្រាស់សេវាកម្មក្រុមហ៊ុន និងអ្នកជំនាញដែលមានអាជ្ញាប័ណ្ណសម្រាប់សកម្មភាពទិញ លក់ ឬជួលអចលនទ្រព្យ មានលក្ខណៈបែបណាដែរនាពេលនេះ?
ខ្ញុំសង្កេតឃើញថា ការប្រើប្រាស់សេវាកម្មរបស់ក្រុមហ៊ុនអចលនទ្រព្យ ឬអ្នកជំនាញដែលមានអាជ្ញាប័ណ្ណនៅកម្ពុជាពេលនេះនៅមានកម្រិតនៅឡើយ ខណៈក្រុមហ៊ុន ឬអ្នកជំនាញភាគច្រើនមាននៅតែតំបន់ប្រជុំជន និងនៅកន្លែងដែលមានសកម្មភាពទិញលក់ច្រើនតែប៉ុណ្ណោះ។
យើងចង់ឲ្យមនុស្សគ្រប់គ្នាយល់ពីសារៈប្រយោជន៍នៃការធ្វើប្រតិបត្តិការតាមរយៈក្រុមហ៊ុន ឬអ្នកជំនាញដែលមានអាជ្ញាប័ណ្ណត្រឹមត្រូវ។ ការធ្វើប្រតិបត្តិការទិញ លក់ ឬជួលដែលមិនឆ្លងកាត់ក្រុមហ៊ុនឬអ្នកជំនាញ តែងជួបបញ្ហាជាច្រើន។
ក្នុងនាមជាប្រធាន CVEA តើលោកមានយុទ្ធសាស្រ្តបែបណាខ្លះក្នុងការជួយធ្វើឲ្យទីផ្សារវិស័យអចលនទ្រព្យនៅកម្ពុជាកាន់តែមានភាពរឹងមាំ?
សមាគម CVEA បច្ចុប្បន្នមានក្រុមហ៊ុនចំនួន ៩០ ជាសមាជិក។ ខ្ញុំមានផែនការជាច្រើនដែលត្រូវធ្វើដើម្បីចូលរួមជាមួយរាជរដ្ឋាភិបាលក្នុងការលើកមុខមាត់វិស័យអចលនទ្រព្យនៅកម្ពុជា ដែលមានដូចជា ១) ការចូលរួមផ្តល់យោបល់ និងជួយដោះស្រាយបញ្ហារបស់សមាជិក ២) ធ្វើទំនាក់ទំនងជាមួយក្រុមអ្នកជំនាញរបស់សមាគម និង ៣) បើកវគ្គបណ្តុះបណ្តាលជំនាញទាក់ទងនឹងវិស័យអចលនទ្រព្យឲ្យបានកាន់តែច្រើន៕
