ក្រុងបាងកកៈ ទោះបីជាមានការគ្រប់គ្រងដ៏តឹងរ៉ឹងរបស់ប្រទេសចិនលើលំហូរចេញមូលធនដែលដាក់កម្រិតបុគ្គលជនជាតិចិនមិនឲ្យនាំចេញប្រាក់ស្មើនឹង ៥០ ០០០ ដុល្លារក្នុង ១ ឆ្នាំក្តីក៏អ្នកទិញមកពីប្រទេសចិនដីគោកនៅពេលនេះបានក្លាយជាប្រភពឈានមុខគេនៃតម្រូវការបរទេសសម្រាប់ខុនដូនៅទីក្រុងបាងកក។ នេះបើយោងតាមកាសែតបាងកក ប៉ុស្តិ៍។
កាសែតបាងកកប៉ុស្តិ៍បានរាយការណ៍ថា ដោយផ្អែកតាមការលក់ខុនដូដែលសម្រេចបាន និងការសាកសួរដែលបានទទួលដោយក្រុមហ៊ុនសេវាអចលនទ្រព្យ JLL រហូតដល់ឆ្នាំនេះប្រហែល ៥០ ភាគរយនៃអ្នកទិញខុនដូជាជនបរទេសនៅក្នុងទីក្រុងបាងកកគឺជាជនជាតិចិន។
យោងតាមក្រុមហ៊ុន JLL អ្នកទិញខុនដូជាជនជាតិចិនជាច្រើននៅទីក្រុងបាងកកគឺជាជនបរទេសដែលធ្វើការងារនៅក្នុងទីក្រុងនេះ។ ការទិញនេះល្អ ដែលស្របជាមួយនឹងរបាយការណ៍ China12: China''s Cities Go Global នៅពេលថ្មីៗរបស់ក្រុមហ៊ុននេះដែលបានបង្ហាញថា ទីក្រុងបាងកកគឺជាទិសដៅដ៏ពេញនិយមបំផុតទី ១០ នៅលើពិភពលោកសម្រាប់ក្រុមហ៊ុនចិនដីគោកដែលពង្រីកអាជីវកម្មនៅបរទេស និងជាប់លំដាប់ទី ៣ ទាក់ទងនឹងទំហំសកម្មភាពជួលសាជីវកម្មរបស់ប្រទេសចិនក្នុងរយៈពេល ៣ ឆ្នាំចុងក្រោយ។
កាសែតបាងកកប៉ុស្តិ៍បានរាយការណ៍ដោយដកស្រង់សំដីលោក Nonraphat Pornsinkunanon ប្រធានផ្នែកលក់ និងជួលលំនៅឋាននៅក្រុមហ៊ុន JLL ខណៈលោកបានថ្លែងថា៖ «ខុនដូដែលកំពុងលក់ដាច់បំផុតទៅឲ្យជនបរទេសជាជនជាតិចិនគឺខុនដូប្រភេទស្ទូឌីយោ និងខុនដូបន្ទប់គេងមួយនៅក្នុងតំបន់ Ratchadaphisek និងតំបន់ Rama 9 ដែលមានតម្លៃចន្លោះពី ១,៥ លាន ទៅ ៣ លានបាត (ជាង ៩ ម៉ឺនដុល្លារ)»។
ជាទូទៅអ្នកទិញជាជនជាតិចិនមិនជួបនូវបញ្ហាដោយសារវិធានការគ្រប់គ្រងមូលធនរបស់ប្រទេសចិននោះទេ។ ក្រៅពីនេះធនាគារអន្តរជាតិ និងគ្រឹះស្ថានហិរញ្ញវត្ថុក្នុងស្រុកមួយចំនួននៅក្នុងប្រទេសថៃផ្ដល់កម្ចីលំនៅឋានដល់ជនបរទេសដែលឆ្លើយតបតាមការវិនិច្ឆ័យលក្ខណសម្បត្តិរបស់ពួកគេ ដូចជា សុពលភាពរយៈពេលនៃការកាន់កាប់ប័ណ្ណការងារ និងរយៈពេលកិច្ចព្រមព្រៀងការងារនៅក្នុងប្រទេសថៃ។ ការវិនិច្ឆ័យលក្ខណសម្បត្តិទាំងនេះខុសប្លែកគ្នាពីធនាគារមួយទៅធនាគារមួយ។
មានអ្នកទិញជាជនជាតិចិនដីគោកជាច្រើនដែលបានទិញខុនដូនៅទីក្រុងរបស់ប្រទេសថៃជាការវិនិយោគ ឬលំនៅឋានលម្ហែកាយ។
និន្នាការនេះត្រូវបានគាំទ្រយ៉ាងខ្លាំងដោយទីតាំងដ៏រឹងមាំរបស់ទីក្រុងបាងកក ដែលជាទិសដៅមួយក្នុងចំណោមទិសដៅទេសចរណ៍ដ៏ពេញនិយមបំផុតសម្រាប់ភ្ញៀវទេសចរមកពីប្រទេសចិន ហើយរបាយការណ៍របស់ក្រុមហ៊ុន JLL បានចុះបញ្ជីទីក្រុងបាងកកថាជាទីក្រុងមួយក្នុងចំណោមទីក្រុង ១០ ធំជាងគេរបស់ពិភពលោកដែលមានទំនាក់ទំនងខ្លាំងជាមួយប្រទេសចិនទាក់ទងនឹងទីក្រុង សាជីវកម្ម ប្រជាជន ហេដ្ឋារចនាសម្ព័ន្ធ និងពាណិជ្ជកម្ម។
កាសែតបាងកកប៉ុស្តិ៍បានរាយការណ៍បន្តថា ខណៈដែលអ្នកទិញភាគច្រើនមកពីប្រទេសចិនដីគោកបានទិញខុនដូដែលមានតម្លៃប្រហែល ៦ លានបាតនៅតំបន់ Sukhumvit មានកំណើនចំនួនបុគ្គលដែលមានប្រាក់ច្រើនជាជនជាតិចិនដែលបានទិញខុនដូប្រណីត និងខុនដូប្រណីតបំផុតនៅតំបន់មជ្ឈមណ្ឌលពាណិជ្ជកម្ម និងមាត់ទន្លេរបស់ទីក្រុងនេះ៕ LA