The Phnom Penh Post Search

Search form

Logo of Phnom Penh Post newspaper Phnom Penh Post - ចំនួន​ខុនដូ​បាន​កើន​ឡើង​ប្រហែល ២០ ភាគរយ




ចំនួន​ខុនដូ​បាន​កើន​ឡើង​ប្រហែល ២០ ភាគរយ

Century 21 Cambodia ធ្វើ​សន្និសីទ​អំពី​របាយ​ការណ៍​ស្រាវជ្រាវ​ស្ថានភាព​ខុនដូ​នៅ​កម្ពុជា កាល​ពី​ថ្ងៃ​ព្រហស្បតិ៍។
Century 21 Cambodia ធ្វើ​សន្និសីទ​អំពី​របាយ​ការណ៍​ស្រាវជ្រាវ​ស្ថានភាព​ខុនដូ​នៅ​កម្ពុជា កាល​ពី​ថ្ងៃ​ព្រហស្បតិ៍។ រូបថត ហ៊ឹន ពិសី

ចំនួន​ខុនដូ​បាន​កើន​ឡើង​ប្រហែល ២០ ភាគរយ

ខុនដូ​នៅ​កម្ពុជា បាន​កើន​ឡើង​ជា​លំដាប់​ដោយ​គិត​ចាប់​ពី ឆ្នាំ​២០០៨ រហូត​មក​ដល់​ដំណាច់ ឆ្នាំ​២០១៤​ នេះ​ជា​មធ្យម​ក្នុង ១ ឆ្នាំ​ខុនដូ​មាន​កំណើន​ប្រហែល ២០ ភាគរយ។ នេះ​បើ​តាម​ការ​ស្រាវជ្រាវ​របស់​ក្រុម​ហ៊ុន Century 21 Cambodia។

តាម​របាយ​ការណ៍​ស្រាវជ្រាវ​របស់​ក្រុម​ហ៊ុន​អចលន​ទ្រព្យ Century 21 Cambodia ដែល​​ទើប​បាន​ចេញ​ផ្សាយ​កាល​ពី​ថ្ងៃ​ព្រហស្បតិ៍​ បាន​បង្ហាញ​ថា បច្ចុប្បន្ន​នៅ​កម្ពុជា មាន​គម្រោង​សាងសង់​ខុនដូ​ចំនួន ១៣ បាន​បញ្ចប់​ការ​សាង​សង់​រួច​រាល់ ដែល​ស្មើ​នឹង​បន្ទប់​ស្នាក់​នៅ​សរុប ៣០៩០ ​យូនីត ខណៈ​ខុនដូ​ចំនួន ១៧ ផ្សេង​ទៀត​កំពុង​ស្ថិត​ក្នុង​ដំណាក់​កាល​សាង​សង់។

Century 21 Cambodia ក៏​បាន​ព្យាករ​ថា ចាប់​ពី ឆ្នាំ​២០១៥ ដល់ ឆ្នាំ​២០១៨ ការ​ផ្គត់​ផ្គង់​ខុនដូ​នៅ​កម្ពុជា​នឹង​មាន​កំណើន ៤០ ភាគ​រយ​ជា​រៀង​រាល់​ឆ្នាំ ដោយ​ចំនួន​បន្ទប់​ស្នាក់​នៅ​នឹង​អាច​កើន​ឡើង​ដល់ ១០០០០ យូនីត។

លោក Kevin Goos អគ្គ​នាយក​ក្រុមហ៊ុន Century 21 Cambodia បាន​និយាយ​ថា ទីផ្សារ​ខុនដូ​នៅ​កម្ពុជា​បាន​ចាប់​ផ្តើម​មាន​ភាព​ល្អ​ជា​លំដាប់ បើ​ទោះ​បី​ជា​ការ​ផ្គត់​ផ្គង់​ខុនដូ​នៅ​ពេល​នេះ​កំពុង​មាន​កំណើន​លើស​តម្រូវ​ការ​ក៏​ដោយ ប៉ុន្តែ​អ្វីៗ​នឹង​ល្អ​ប្រសើរ​ឡើង​វិញ​នៅ​ពេល​អនាគត។ លោក​បាន​បន្ត​ថា បច្ចុប្បន្ន​គេ​បាន​សង្កេត​ឃើញ​ថា បន្ទប់​ស្នាក់​នៅ​របស់​ខុនដូ​នៅ​កម្ពុជា​ប្រហែល ៨០ ភាគរយ​ត្រូវ​បាន​ទិញ​ដោយ​ជន​បរទេស ខណៈ​អតិថិជន​ក្នុង​ស្រុក​មាន​ប្រហែល ២០ ភាគរយ​ប៉ុណ្ណោះ​។ ប៉ុន្តែ​នៅ​រយៈ​ពេល ៥​ឆ្នាំ ខាង​មុខ​និន្នាការ​នេះ​នឹង​ត្រូវ​ផ្លាស់​ប្តូរ ដោយ​នឹង​មាន​ជនជាតិ​ខ្មែរ​ប្រហែល ៨០ ភាគរយ​នឹង​ក្លាយ​ជា​ម្ចាស់​លើ​ខុនដូ។

ទិដ្ឋភាព​ដ៏​ស្រស់​ស្អាត​របស់​ខុនដូ De Castle Royal ។
ទិដ្ឋភាព​ដ៏​ស្រស់​ស្អាត​របស់​ខុនដូ De Castle Royal ។​ ភ្នំពេញ ប៉ុស្តិ៍

លោក Goos បាន​ថ្លែង​ថា៖ «អ្វី​ដែល​យើង​កំពុង​មើល​ឃើញ​អំពី​ទីផ្សារ​ខុនដូ​នៅ​កម្ពុជា​នា​ពេល​នេះ គឺ​មិន​ខុស​ពី​អ្វី​ដែល​បាន​កើត​ឡើង​នៅ​ប្រទេស​ថៃ កាល​ពី ២០ ឆ្នាំ​មុន​នោះ​ទេ។ ពី​មុន​អ្នក​អភិវឌ្ឍន៍​បាន​រំពឹង​ថា ទីផ្សារ​ខុនដូ នឹង​ទាក់​ទាញ​ចំណាប់​អារម្មណ៍​ជន​បរទេស​ដែល​មក​ធ្វើ​ការ​នៅ ប្រទេស​ថៃ ប៉ុន្តែ​ក្រោយ​មក​និន្នាការ​ទាំង​នោះ​បាន​ប្រែ​ប្រួល​យ៉ាង​ខ្លាំង»។

កាល​ពី ឆ្នាំ​២០០៨ ទីផ្សារ​ខុនដូ ត្រូវ​បាន​លេច​ឡើង​នៅ​កម្ពុជា​ជា​លើក​ដំបូង​តាម​រយៈ​គម្រោង De Castle ដែល​ស្ថិត​នៅ​ក្នុង ខណ្ឌ​ទួល​គោក ខណៈ​នា​ពេល​បន្ទាប់​មក​មាន​គម្រោង​សាងសង់​ខុនដូ​ជា​ច្រើន​ត្រូវ​បាន​ប្រកាស​ដូច​ជា ខុនដូ​ក្នុង​គម្រោង ខេមកូ ស៊ីធី, ខុនដូ​សែនសុខ Gold Tower 42, វិមាន​កែវ​ចរណៃ, Galaxy Residence, Olympic City, Bali Scenery, D.I Riviera, Diamond One, The Bridge និង​ Casa Meridian ជាដើម។

ការ​ស្រាវ​ជ្រាវ​របស់ Century 21 Cambodia បាន​បង្ហាញ​ថា បច្ចុប្បន្ន​តម្លៃ​បន្ទប់​ខុនដូ (យូនីត) ដាក់​លក់​ក្នុង​រាជធានី​ភ្នំពេញ​ជា​មធ្យម​គឺ ១៩០០ ដុល្លារ​ក្នុង ១ ម៉ែត្រ​ការ៉េ ដែល​តម្លៃ​នេះ​បាន​កើន​ឡើង​ប្រហែល ៦ ភាគ​រយ​បើ​ប្រៀប​ធៀប​ទៅ​នឹង ឆ្នាំ​២០១៣។

តម្លៃ​ខុនដូ​ក្នុង​រាជធានី​ភ្នំពេញ​ដែល​ទាប​បំផុត​មាន​ប្រហែល ១១០០ ដុល្លារ​ក្នុង ១ ម៉ែត្រ​ការ៉េ និង​ខ្ពស់​បំផុត​ឡើង​ដល់ ៣៣០០ ដុល្លារ​ក្នុង ១ ម៉ែត្រ​ការ៉េ (The Bridge)។

តម្រូវការ​ខុនដូ​ត្រូវ​គេ​រំពឹង​ថា នឹង​មាន​កំណើន​ច្រើន​នៅ​ភ្នំពេញ ​ពិសេស​នៅ​ពេល​ប្រទេស​កម្ពុជា ធ្វើ​សមាហរណកម្ម​សេដ្ឋកិច្ច​ទៅ​ក្នុង​តំបន់​អាស៊ាន​នា​ចុង ឆ្នាំ​២០១៥ ខាង​មុខ ដោយ​នៅ​ពេល​នោះ​នឹង​មាន​អ្នក​វិនិយោគ និង​ជន​បរទេស​ជា​ច្រើន​ផ្លាស់​ទី​មក​ធ្វើ​ការ​នៅ​កម្ពុជា។ ម៉្យាង​ទៀត​បញ្ហា​កក​ស្ទះ​ចរាចរណ៍​នា​ពេល​បច្ចុប្បន្ន ក៏​កំពុង​តែ​ធ្វើ​ឲ្យ​និន្នាការ​ចង់​រស់​នៅ​ខុនដូ​របស់​ប្រជាជន​ខ្មែរ​ផ្លាស់​ប្តូរ​ផង​ដែរ។

មាន​របាយ​ការណ៍​មួយ​បាន​ឲ្យ​ដឹង​ថា អត្រា​នៃ​ការ​លក់​បន្ទប់​ស្នាក់​នៅ​ខុនដូ (ទាំង​ការ​លក់​មុន និង​ក្រោយ​ពេល​សាង​សង់​រួច) ជា​មធ្យម​មាន​ប្រហែល ៧០ ភាគរយ។ បើ​ទោះ​បី​មាន​អត្រា​លក់​ចេញ​បាន​រហូត​ដល់ ៧០ ភាគរយ​ក៏​ដោយ​ក៏​គេ​បាន​សង្កេត​ឃើញ​ថា អត្រា​អ្នក​មក​ស្នាក់​នៅ​ហាក់​មាន​កម្រិត​ទាប​នៅ​ឡើយ។ អត្រា​នៃ​ការ​មក​ស្នាក់​នៅ​មាន​កម្រិត​ទាប​បែប​នេះ​អាច​បណ្តាល​មក​ពី​កត្តា​សំខាន់ៗ​ចំនួន ២ គឺ ទី១ អ្នក​ទិញ​ខុនដូ​ភាគ​ច្រើន​ជា​ជន​បរទេស ដែល​ទិញ​ខុនដូ​សម្រាប់​វិនិយោគ​ ឬ​លក់​យក​ប្រាក់​ចំណេញ ចំណែក ទី២ ការ​ផ្លាស់​ប្តូរ​ផ្នត់​គំនិត​មក​រស់​នៅ​ខុនដូ​របស់​ប្រជាជន​កម្ពុជា​នៅ​មាន​ភាព​យឺត​យ៉ាវ។

គិត​ត្រឹម​ត្រីមាស ទី៤ ក្នុង ឆ្នាំ​២០១៤ នេះ មាន ៦៥ ភាគ​រយ​ក្នុង​ចំណោម​គម្រោង​ខុនដូ​សរុប​ទាំង​អស់​កំពុង​ស្ថិត​ក្នុង​ដំណាក់​កាល​សាង​សង់​នៅ​ឡើយ ដោយ​រំពឹង​ថា នឹង​ត្រូវ​បញ្ចប់​នៅ​ចន្លោះ ឆ្នាំ​២០១៥-២០១៨៕

អត្ថបទគួរចាប់អារម្មណ៍