ក្រុងបាងកកៈ អតិថិជនបរទេសកាន់តែច្រើនបានចាប់អារម្មណ៍ទិញខុនដូក្នុងទីក្រុងបាងកក ដោយសារជាការវិនិយោគដែលផ្តល់ផលចំណេញច្រើន និងមានតម្លៃថោកជាងប្រទេសរបស់ពួកគេ។ នេះបើយោងតាមការរាយការណ៍របស់កាសែតបាងកកប៉ុស្តិ៍។
លោក Vittakarn Chandavimol ប្រធានក្រុមពាណិជ្ជកម្មទទួលបន្ទុកខុនដូរបស់ក្រុមហ៊ុនអភិវឌ្ឍន៍ AP Thailand Plc ដែលចុះបញ្ជីនៅផ្សារហ៊ុនថៃបានថ្លែងថា ប្រជាប្រិយភាពរបស់ខុនដូនៅទីក្រុងនេះក្នុងចំណោមអ្នកទិញនៅទីក្រុងហុងកុង ប្រទេសចិន កោះតៃវ៉ាន់ និងសិង្ហបុរី កំពុងកើនឡើងដែលជំរុញដោយកំណើនមូលធនវិនិយោគដ៏ទាក់ទាញ និងទិន្នផលខ្ពស់វិនិយោគខ្ពស់។
សម្រាប់ក្រុមហ៊ុន AP របស់លោកក្រុមហ៊ុនរំពឹងថានឹងមានកំណើនជាបន្តក្នុងការលក់ខុនដូពីការធ្វើទីផ្សារនៅបរទេស បន្ទាប់ពីកត់ត្រាការលក់ចំនួន ៤ ពាន់លានបាត (១២០ លានដុល្លារ) នៅឆ្នាំ ២០១៧ កើនឡើង ៥០០ ភាគរយធៀបនឹងរយៈពេលដូចគ្នាកាលពីឆ្នាំមុនដែលបាននាំមុខដោយអ្នកទិញមកពីទីក្រុងហុងកុង។
លោកបានថ្លែងក្នុងសន្និសីទព័ត៌មានមួយនៅសប្តាហ៍មុនក្នុងទីក្រុងហុងកុងថា៖ «ប្រទេសថៃមានសក្ដានុពលសម្រាប់ការវិនិយោគផ្នែកអចលនទ្រព្យ»។ លោកបន្តថា៖ «ទីផ្សារខុនដូនៅទីក្រុងបាងកកនឹងរក្សាភាពទាក់ទាញ ដោយសារតែរដ្ឋាភិបាលអភិវឌ្ឍគម្រោងខ្សែរថភ្លើងដឹកជញ្ជូនសាធារណៈថ្មី និងគម្រោងហេដ្ឋារចនាសម្ព័ន្ធថ្មីៗជាច្រើន»។
លោក Vittakarn បានថ្លែងប្រាប់កាសែតបាងកកប៉ុស្តិ៍ថា គម្រោងមួយក្នុងចំណោមគម្រោងហេដ្ឋារចនាសម្ព័ន្ធទាំងនោះនឹងជាគម្រោងស្ថានីយ Grand Bang Sue Central Station ដែលនឹងក្លាយជាស្ថានីយរថភ្លើងឈានមុខគេនៅតំបន់អាស៊ីអាគ្នេយ៍ និងជាមជ្ឈមណ្ឌលអចលនទ្រព្យទីក្រុងបាងកកមួយ។
លោក Vittakarn មានប្រសាសន៍ថា៖ «អចលនទ្រព្យរបស់ប្រទេសថៃបានមើលឃើញការកើនឡើង និងការធ្លាក់ចុះដូចក្នុងអំឡុងវិបត្តិហិរញ្ញវត្ថុឆ្នាំ ១៩៩៧ ការបើកដំណើរការរថភ្លើងអាកាស BTS នៅឆ្នាំ ១៩៩៩ រថភ្លើង MRT នៅឆ្នាំ ២០០៤ និងវិបត្តិ [ហិរញ្ញវត្ថុ] Hamburger នៅឆ្នាំ ២០០៨»។ លោកបន្តថា៖ «[វិស័យនេះ] នៅតែកំពុងកើនឡើង»។
ក្រុមហ៊ុន Bangkok Citismart Co (BC) ដែលជាក្រុមហ៊ុនទីភ្នាក់ងារអចលនទ្រព្យមួយដែលគ្រប់គ្រងដោយក្រុមហ៊ុន AP បានឲ្យដឹងថា តម្លៃខុនដូជាមធ្យមនៅទីក្រុងបាងកកកើនឡើងពី ៦ ទៅ ៨ ភាគរយប្រចាំឆ្នាំអាស្រ័យតាមទីតាំង។
លោក Kayon Tantichatiwat នាយកគ្រប់គ្រងក្រុមហ៊ុន BC បានថ្លែងថា កំណើន ១០ ភាគរយនៃតម្លៃខុនដូអាចកើតឡើងតាមទីតាំងនានា ជាទីដែលខ្សែរថភ្លើងថ្មី ឬការពង្រីកខ្សែរថភ្លើងបន្ថែមស្ថិតក្នុងការសាងសង់ ដូចជាខ្សែរថភ្លើងនៅតាមបណ្ដោយផ្លូវ Phahon Yothin ចាប់ពីផ្លូវប្រសព្វ Lat Phrao ទៅទីផ្សារ Saphan Mai ជាដើម។
លោកលើកឡើងថា៖ «រថភ្លើង BTS និង MRT ជាចំណុចយោងដ៏ល្អ [សម្រាប់បង្ហាញទៅកាន់អតិថិជន] នៅទីក្រុងហុងកុង និងសិង្ហបុរីដោយសារអ្នកទិញភាគច្រើនដែលជាអ្នកធ្វើដំណើរញឹកញាប់នៅទីក្រុងបាងកកយល់ដឹងច្បាស់ពីខ្សែរថភ្លើងទាំងនេះ»។
ក្រុមហ៊ុន AP បានចាប់ផ្ដើមលក់គម្រោងខុនដូថ្មីនៅបរទេសកាលពីឆ្នាំ ២០១៥។
ក្រុមហ៊ុន AP បានតែងតាំងក្រុមហ៊ុន BC ឲ្យបង្ហាញគម្រោងខុនដូរបស់ខ្លួននៅប្រទេសសិង្ហបុរី ទីក្រុងហុងកុង និងទីក្រុងតូក្យូ។
កាលពីឆ្នាំមុនការលក់តាមបណ្ដាប្រទេសទាំងនោះ និងប្រទេសចិនដោយក្រុមហ៊ុន BC និងទីភ្នាក់ងារក្នុងប្រទេសថៃបានកើនឡើងដល់ ៤ ពាន់លានបាតពីគម្រោងខុនដូថ្មីចំនួន ៣ ដែលស្មើនឹង ៣០ ភាគរយនៃតម្លៃលក់រួមគ្នា។
លោក Kayon បញ្ជាក់ថាចំនួននេះបានតំណាងឲ្យ ៤០ ភាគរយនៃការលក់សរុប (៩,៧ ពាន់លានបាត) និងបានរួមបញ្ចូលទាំងអ្នកទិញជនបរទេសដែលចូលមកទិញដោយខ្លួនឯងក្នុងទីក្រុងបាងកកផងដែរ។
អ្នកទិញនៅទីក្រុងហុងកុងមានចំនួន ៤០ ភាគរយនៃការលក់ដែលពាក់ព័ន្ធកាលពីឆ្នាំមុន បន្ទាប់មកចិន ៣០ ភាគរយជប៉ុន ១៥ ភាគរយ និងសិង្ហបុរី ១០ ភាគរយ។
លោក Kayon បានថ្លែងថាអ្នកទិញនៅទីក្រុងហុងកុងភាគច្រើនជាប្រជាជនមានប្រាក់ចំណូលថ្នាក់កណ្ដាលដែលចង់វិនិយោគលើអចលនទ្រព្យ ប៉ុន្តែមិនអាចមានលទ្ធភាពវិនិយោគនៅប្រទេសរបស់ខ្លួនបាន។ អ្នកទិញទាំងនោះជាមធ្យមកំពុងស្វែងរកខុនដូនៅទីក្រុងបាងកកដែលមានតម្លៃក្រោម ៥ លានបាត (១៥០ ពាន់ដុល្លារ)។
ក្រុមហ៊ុន AP មានបំណងរកប្រាក់ឲ្យបានចំនួន ៤,៥ ពាន់លានបាត (១៣៥ លានដុល្លារ) ពីការលក់ខុនដូនៅបរទេសត្រឹមចុងឆ្នាំ។
តម្លៃភាគហ៊ុនក្រុមហ៊ុន AP បានបិទការជួញដូរលើផ្សារហ៊ុនថៃក្នុងតម្លៃ ៩,០៥ បាតក្នុងមួយហ៊ុនដោយកើនឡើង ២០ សាតាំងដែលមានតម្លៃជួញដូរចំនួន ៦៤,៥ លានបាត៕ LA