ភ្នំពេញ: ទឹកជំនន់ដែលបង្កដោយសារភ្លៀងធ្លាក់ជាប់ៗគ្នាជាច្រើនថ្ងៃកន្លងមកនេះបានជន់លិចខណ្ឌដង្កោរាជធានីភ្នំពេញយ៉ាងដំណំ ដែលបណ្តាលឱ្យមានការជន់លិច ផ្ទះ បុរី ឃ្លាំង និងរោងចក្រជាច្រើនដែលនេះគឺជាសញ្ញាអវិជ្ជមានដល់វិស័យសំណង់ និងជាមេរៀនថ្មីមួយដល់បណ្តាអ្នកអភិវឌ្ឍន៍ និងអតិថិជនក្នុងការពិចារណា និងធ្វើការសម្រេចចិត្តមុននឹងធ្វើការវិនិយោគ និងទិញគឺត្រូវគិតអំពីទីតាំងភូមិសាស្ត្រ។
កាលពីព្រឹកថ្ងៃពុធ សប្តាហ៍មុននៅរាជធានីភ្នំពេញក្រោយពីបាក់ទំនប់សណ្ដស្ទឹងព្រែកត្នោត បណ្តាលឱ្យលំនៅឋានពលរដ្ឋជាច្រើនពាន់ខ្នង និងកំណាត់ផ្លូវជាច្រើនកន្លែងក្នុងខណ្ឌដង្កោភាគខាងត្បូងរាជធានីភ្នំពេញបានរងការជន់លិច និងហូរកាត់យ៉ាងធ្ងន់ធ្ងរដែលមិនអាចធ្វើចរាចរណ៍ឆ្លងកាត់បាន។ ក្នុងស្ថានភាពដ៏អាក្រក់នេះ លោក ឃួង ស្រេង អភិបាលរាជធានីភ្នំពេញក៏បានសម្រេចបិទផ្លូវលេខ ២១៧ ពីចម្ការដូងទៅរង្វង់មូលកួរស្រូវ និងកំណាត់ផ្លូវលំមួយចំនួនទៀតនៅក្នុងខណ្ឌនេះជាបណ្តោះអាសន្ន។
លោក ស៊ឹម តុលា នាយករដ្ឋបាលខណ្ឌដង្កោ ប្រាប់ ភ្នំពេញ ប៉ុស្តិ៍ កាលពីពេលថ្មីៗនេះថា សង្កាត់ចំនួន ១១ លើ ១២ សង្កាត់នៃខណ្ឌដង្កោបានរងការជន់លិចដោយជំនន់ទឹកភ្លៀង និងទឹកជំនន់ស្ទឹងព្រែកត្នោត។
លោក ង៉ែត ជូ អ្នកពិគ្រោះ និងផ្តល់យោបល់ជាន់ខ្ពស់ផ្នែកទីផ្សារហៅកាត់ថា EMC បានថ្លែងប្រាប់ភ្នំពេញប៉ុស្តិ៍កាលពីថ្ងៃពុធម្សិលមិញថា តាមពិតតំបន់ប៉ែកខាងត្បូងនៃរាជធានីភ្នំពេញគឺចំមុខទឹកចំពីស្ទឹងព្រែកត្នោតហូរចាក់ពីខ្ពង់រាបខេត្តកំពង់ស្ពឺមក ដូច្នេះពេលដែលមានភ្លៀងច្រើននៅតំបន់ទាំងនោះវាតែងតែបង្កឱ្យមានទឹកជំនន់ ហើយប្រសិនមានភ្លៀងជាប់ជាប្រចាំដូចមួយរយៈពេលកន្លងមកនេះវាបានបង្កជាបញ្ហាគ្រោះមហន្តរាយធំជាទឹកជំនន់ដោយសារវិសាលភាពនៃទឹកគឺធំមែនទែន។
លោកបន្តថា៖ «បើយើងពិនិត្យមើលនូវស្ថានភាពខណ្ឌដង្កោនេះ ឈានទៅដល់តំបន់កួរស្រូវ និងចូលដល់កណ្តាលស្ទឹងនោះគឺថាតំបន់ទាំងនោះវាទំនាបស្រាប់ ទីពីរវាជាមុខទឹក ដូច្នេះហើយវាងាយរងគ្រោះ។ ជាធម្មតាយើងអាចសង្កេតមើលប្រហែលជា ៤ ទៅ ៥ ឆ្នាំគឺតែងតែរងគ្រោះទឹកជន់លិចម្តង ដូច្នេះប្រសិនបើ ជារៀងរាល់ ៤ ឬ ៥ ឆ្នាំតែងតែមានការរងគ្រោះដោយសារទឹកជំនន់ម្តងអ៊ីចឹង ការសាងសង់បុរី រោងចក្រ និងឃ្លាំងនានាក៏អាចនឹងរងគ្រោះទៅតាមនោះផងដែរ»។
លោកថា៖ «អ៊ីចឹងលុះត្រាតែរដ្ឋាភិបាលមានវិធីសាស្ត្រដើម្បីទប់ស្កាត់តែខ្ញុំគិតថា ការទប់ស្កាត់ក៏ពិបាកដែរ គឺយើងត្រូវការអាងស្តុកធំ មានប្រព័ន្ធធារាសាស្ត្រធំ និងរឹងមាំជាដើម ដូច្នេះគឺរដ្ឋត្រូវវិនិយោគច្រើនមែនទែន។ ដើម្បីបញ្ចៀសបញ្ហានេះ មិនថា អ្នកសាងសង់បុរី ឃ្លាំង និងរោងចក្រនានាត្រូវពិនិត្យ មើលឡើងវិញនូវស្ថានភាពភូមិសាស្ត្រ ថាតើតំបន់ទាំងនោះវាងាយរងគ្រោះដោយសារទឹកជំនន់ដែរឬអត់? ដូច្នេះហើយវាអាចផ្លាស់ប្តូរការគិតរបស់អ្នកអភិវឌ្ឍន៍ទាំងនោះ ងាកទៅរកតំបន់ដែលភូមិសាស្ត្រមានសុវត្ថិភាព។ ម្យ៉ាងវិញទៀតទោះបីជាអ្នកអភិវឌ្ឍន៍មិនគិតដល់ចំណុចនេះ ក៏អ្នកទិញ ឬអតិថិជនជាមេរៀនមួយក្នុងការថ្លឹងថ្លែង ត្រិះរិះពិចារណាពិនិត្យមើលតំបន់ដែលងាយរងគ្រោះដោយសារទឹកជំនន់ ដូច្នេះចង់មិនចង់អ្នកអភិវឌ្ឍន៍គឺគាត់ប្រាកដណាស់នឹងរត់តាមទីផ្សារ»។
លោកឧកញ៉ា ចេង ខេង ស្ថាបនិក និងជាអគ្គនាយកក្រុមហ៊ុនអចលនទ្រព្យ CPL បានស្នើដល់ម្ចាស់អភិវឌ្ឍគម្រោងនានា អ្នកទិញ និងអជ្ញាធរនៃខណ្ឌ និងខេត្តគួរជួបពិភាក្សាគ្នាឱ្យបានល្អិតល្អន់មុននឺងសម្រេចធ្វើការវិនិយោគ។
លោកថា៖ «ធម្មតា នៅក្នុងខណ្ឌនិងខេត្តនីមួយៗតែងតែកៀរគរអ្នកវិនិយោគដើម្បីទៅវិនិយោគតាមខណ្ឌរបស់ពួកគាត់ អ៊ីចឹងទាល់តែអភិបាលខេត្ត អភិបាល ខណ្ឌ និងអ្នកអភិវឌ្ឍន៍ទាំងអស់គឺត្រូវរួមគ្នាគិតធ្វើដូចម្តេចដើម្បីបញ្ចៀសគ្រោះហានិភ័យដែលបានកើតឡើងនេះ ដូច្នេះគ្រោះទឹកជំនន់ទឹកភ្លៀងនេះគឺជាមេរៀនមួយដ៏ល្អសម្រាប់យើងទាំងអស់គ្នា ទាំងអ្នកទិញ អ្នកធ្វើបុរីពិចារណាល្អិតល្អន់។ ខ្ញុំគិតថាទាំងអ្នកអភិវឌ្ឍន៍ និងអ្នកទិញគឺគាត់មានភាពវៃឆ្លាតក្រោយពីបានជួបគ្រោះធម្មជាតិថ្មីៗនេះ ហើយបើមិនមានដំណោះស្រាយល្អនោះទេក្នុងខេត្ត ឬក៏ខណ្ឌនោះប្រាកដជាពួកគាត់មិនចង់វិនិយោគ និងប្រឈមនឹងហានិភ័យបែបនេះទៀតទេ»។
យោងតាមក្រសួងការងារមានរោងចក្រចំនួន ៧៩ រងផលប៉ះពាល់ក្នុងនោះរោងចក្រប្រមាណ ៤០ បានផ្អាកចង្វាក់ផលិតកម្ម និងប៉ះពាល់ដល់កម្មករនិយោជិតប្រមាណជាង ៤ ម៉ឺននាក់៕
វីដេអូ៖