ភ្នំពេញៈ ការរីករាលដាលជំងឺកូវីដ ១៩ បានធ្វើឲ្យតម្រូវការឃ្លាំងជួលស្តុកទំនិញធ្លាក់ចុះ ខណៈតម្លៃហាក់នៅមិនទាន់មានការប្រែប្រួលគួរឲ្យកត់សម្គាល់ទេមកដល់ពេលនេះ។ នេះបើយោងតាមអ្នកជំនាញវិស័យអចលនទ្រព្យកម្ពុជា។
រហូតមកដល់ពេលនេះមិនមានស្ថាប័នណាមួយបានសិក្សាពីបរិមាណផ្ទៃឃ្លាំងជួលនៅកម្ពុជាទេ។
លោក សំ សុខនឿន អគ្គនាយកក្រុមហ៊ុនអចលនទ្រព្យ KW សែនសុខ បានប្រាប់ភ្នំពេញប៉ុស្តិ៍កាលពីថ្ងៃពុធថា តម្រូវការឃ្លាំងជួលបានធ្លាក់ចុះចាប់តាំងពីដើមឆ្នាំ ២០២០ មកដោយសារតែរដ្ឋាភិបាលសម្រេចបិទអាជីវកម្មល្បែងភ្នាល់តាមអនឡាញ ប៉ុន្តែអ្វីដែលធ្ងន់ធ្ងរនោះគឺការរីករាលដាលជំងឺកូវីដ ១៩ ដែលប្រទេសនីមួយៗបានសម្រេចបិទការធ្វើដំណើរ និងដឹកជញ្ជូនទំនិញ ហេតុនេះតម្រូវការឃ្លាំងស្តុកក៏បានធ្លាក់ចុះទៅតាមនោះដែរ។
លោកបន្តថា តម្រូវការឃ្លាំងជួលមានបរិមាណច្រើនកាលពីឆ្នាំមុន ដោយភាគច្រើនជួលពីសំណាក់វិនិយោគិនបរទេស (ជនជាតិចិន) និងប្រជាជនក្នុងស្រុកតិចតួច។
លោកថ្លែងថា៖ «ជំងឺកូវីដ ១៩ បានធ្វើឲ្យបង្អាក់ដល់ភាពល្អប្រសើររបស់ទីផ្សារនេះយ៉ាងច្រើន។ ការធ្លាក់ចុះពេលនេះគឺជាប់ទាក់ទងនឹងតម្រូវការតែប៉ុណ្ណោះ ខណៈតម្លៃមិនទាន់មានការប្រែប្រួលទេ»។
ឃ្លាំងជួលត្រូវចែកចេញជា ២ ប្រភេទគឺការជួលដីយកទៅសាងសង់ឃ្លាំងដោយខ្លួនឯង និងឃ្លាំងជួលដែលម្ចាស់ទីតាំងបានរៀបចំឃ្លាំងរួចរាល់។ នេះបើយោងតាមលោក សុខនឿន។
សម្រាប់ភ្នំពេញ និងបណ្តាខេត្តនៅជាប់ភ្នំពេញ ដីជួលសម្រាប់សង់ឃ្លាំង អាចមានតម្លៃចន្លោះ ០,៥ ដុល្លារ ដល់ ២,៥ ដុល្លារក្នុង ១ ម៉ែត្រការ៉េ ហើយការជួលភាគច្រើនមានកិច្ចសន្យារយៈពេល ៥-១០ ឆ្នាំ។
លោកបន្តថា ភាពល្អប្រសើរនៃទំនាក់ទំនងអន្តរជាតិ និងពាណិជ្ជកម្មជាមួយប្រទេសជាច្រើនលើពិភពលោក ពិសេសប្រទេសចិននឹងធ្វើឲ្យកម្ពុជាទទួលបានវិនិយោគិនជាច្រើនចូលមកបណ្តាក់ទុន បន្ទាប់ពីកូវីដ១៩ ត្រូវបញ្ចប់។ លោកថ្លែងថា៖ «ខ្ញុំសង្ឃឹមថា ពិភពលោកនឹងអាចគ្រប់គ្រងជំងឺនេះបានក្នុងពេលឆាប់ៗ ហើយនៅពេលនោះនិន្នាការតម្រូវការឃ្លាំងជួលនឹងមានសម្ទុះឡើងវិញខ្លាំងជាមិនខាន»។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបាននិយាយថា តម្រូវការឃ្លាំងជួលពិតជាមានការរអាក់រអួលខ្លះក្នុងអំឡុងការរីករាលដាលជំងឺកូវីដ១៩ ប៉ុន្តែវាស្ថិតក្នុងកម្រិតតិចតួចប៉ុណ្ណោះ។ លោកបន្តថា វិស័យសេវាកម្មធ្លាក់ចុះមែន តែតម្រូវការកន្លែងស្តុកទុកទំនិញគឺនៅតែមាន។ លោកបន្តថា៖ «វាមិនធ្លាក់ច្រើនទេ ព្រោះការជួលឃ្លាំងគេតែងធ្វើកិច្ចសន្យារយៈពេលយូរឆ្នាំ»។
លោកប្រាប់ទៀតថា តម្លៃឃ្លាំងជួលពេលនេះក៏មិនបានប្រែប្រួលដែរបើធៀបនឹងមានការផ្ទុះឡើងនៃជំងឺកូវីដ១៩។
តាមលោក សុខនីម ឃ្លាំងជួលដែលស្ថិតក្នុងទីតាំងល្អ និងសម្បូររោងចក្រ (ផ្លូវវេងស្រង) មានតម្លៃចន្លោះ ៨-១៣ ដុល្លារក្នុង ១ ម៉ែត្រការ៉េសម្រាប់ ១ ខែ ចំណែកតំបន់ក្នុងក្រុងមានតម្លៃលើសពី ១០ ដុល្លារ។
លោក លឹម ហេង អនុប្រធានសភាពាណិជ្ជកម្មកម្ពុជាកាលពីសប្តាហ៍មុនបាននិយាយថា ស្ថិរភាពនយោបាយ ច្បាប់វិនិយោគ ភាពសម្បូរបែបនៃកម្លាំងពលកម្មប្រព័ន្ធហេដ្ឋារចនាសម្ព័ន្ធល្អប្រសើរ និងជម្លោះពាណិជ្ជកម្មរវាងមហាអំណាចចិន និងអាមេរិកនឹងធ្វើឲ្យកម្ពុជាទទួលបានវិនិយោគិនបរទេសកាន់តែច្រើន បន្ទាប់ពីជំងឺកូវីដ ១៩ អាចគ្រប់គ្រងបាន។
លោកបន្តថា តម្រូវការធនធានមនុស្ស និងឃ្លាំងស្តុកនឹងមានច្រើននៅពេលខាងមុខ។ លោកថ្លែងថា៖ «ខ្ញុំមានជំនឿថា ការវិនិយោគ និងការនាំចេញរបស់កម្ពុជាលើគ្រប់វិស័យនឹងមានកំណើនជាបន្តបន្ទាប់នៅពេលអនាគត»៕ LA