.jpg)
ឃ្លាំងជួលប្រើប្រាស់ជាកន្លែងដាក់តាំងលក់រថយន្តបានកើនឡើងជាបន្តបន្ទាប់ក្នុងរាជធានីភ្នំពេញ។ ហ៊ាន រង្សី
ភ្នំពេញៈ តម្រូវការ និងតម្លៃឃ្លាំងជួលដើមឆ្នាំ ២០២១ នេះបានរក្សាភាពប្រហាក់ប្រហែល ឆ្នាំ ២០២០ ខណៈយុទ្ធនាការចាក់វ៉ាក់សាំងកូវីដ ១៩ របស់ប្រទេសជាច្រើនលើពិភពលោករួមទាំងកម្ពុជាកំពុងផ្តល់ពន្លឺជាវិជ្ជមានសម្រាប់ទីផ្សារនេះ។ នេះបើតាមអ្នកជំនាញវិស័យអចលនទ្រព្យនៅកម្ពុជា។
លោកស្រី តាំង ហួរ នាយិកាប្រតិបត្តិក្រុមហ៊ុនអចលនទ្រព្យ Amatak Property Service បានប្រាប់ ភ្នំពេញ ប៉ុស្តិ៍ កាលពីថ្ងៃពុធថា តម្រូវការឃ្លាំងជួលនាដើមឆ្នាំនេះគឺនៅមានភាពល្អប្រសើរ ទាំងការជួលឃ្លាំងធ្វើជាកន្លែងស្តុកទំនិញ បើកភោជនីយដ្ឋាន និងធ្វើជាកន្លែងលក់យានយន្តជាដើម។ លោកស្រីបន្តថាជាមួយគ្នានេះតម្លៃរបស់វាក៏មិនមានការប្រែប្រួលទេនាពេលនេះបើធៀបទៅនឹងដើមឆ្នាំ ២០២០។
លោកស្រីថ្លែងថា៖ «ទោះជាទីផ្សារនេះនៅតែរក្សាបាននូវដំណើរការល្អប្រសើរ ក៏ប៉ុន្តែក៏មានម្ចាស់ឃ្លាំងមួយចំនួនបានធ្វើការបញ្ចុះតម្លៃលើការជួលខ្លះៗដែរ»។
បើយោងតាមលោកស្រី តាំង ហួរ មូលហេតុដែលទីផ្សារនេះមិនសូវទទួលរងផលប៉ះពាល់ខ្លាំងដូចទីផ្សារខុនដូ និងអាផាតមិន ព្រោះវាមិនពឹងផ្អែកខ្លាំងលើចំនួនភ្ញៀវបរទេសធ្វើដំណើរមកកម្ពុជាទេ។
បច្ចុប្បន្ននៅរាជធានីភ្នំពេញ ឃ្លាំងជួលមានតម្លៃជាមធ្យមពី ២ ទៅ ៥ ដុល្លារ ក្នុង ១ ម៉ែត្រការ៉េ សម្រាប់រយៈពេល ១ ខែ ដោយអាស្រ័យទៅលើទីតាំង ផ្លូវ និងស្ថានភាពឃ្លាំងនីមួយៗ។ ការធ្វើកិច្ចសន្យាជួលអាចមានរយៈពេលជាមធ្យម ៥ ឆ្នាំ។ នេះបើតាមលោកស្រី តាំង ហួរ។
លោកស្រី ហ្គ្រេស រចនីហ្វុង អគ្គនាយិការក្រុមហ៊ុនអចលនទ្រព្យ Century 21 Cambodia និយាយថា ទីផ្សារឃ្លាំងជួលនៅភ្នំពេញនាពេលនេះគឺល្អប្រសើរជាធម្មតា ប៉ុន្តែអាចមានការធ្លាក់តម្លៃខ្លះនៅតាមបណ្តាខេត្ត។ លោកស្រីបន្តថា ស្ថានភាពនេះធៀបនឹងដើមឆ្នាំ ២០២០ គឺមិនមានអ្វីប្រែប្រួលទេ ប៉ុន្តែវានឹងមានសម្ទុះឡើងវិញនៅចុងឆ្នាំ ២០២១ នេះ។ លោកស្រីបន្តថា ជាទូទៅឃ្លាំងដែលមានតម្រូវការខ្ពស់គឺត្រូវមានទំហំចាប់ពី ១ ០០០ ម៉ែត្រការ៉េឡើងទៅ។
លោកស្រីនិយាយថា៖ «ខ្ញុំគិតថា ទីផ្សារនេះនឹងមានភាពមមាញឹកចាប់ពីត្រីមាសទី ៤ ឆ្នាំ ២០២១ នេះ ព្រោះការចាក់វ៉ាក់សាំងកូវីដ១៩ នឹងធ្វើឱ្យចំនួនវិនិយោគិនពីប្រទេសនីមួយៗកើនឡើង។ នៅពេលមានកំណើនវិនិយោគ តម្រូវការឃ្លាំងនឹងកើនឡើង»។
អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) លោក ហុង វណ្ណៈ ធ្លាប់បានប្រាប់ភ្នំពេញប៉ុស្តិ៍នាពេលថ្មីៗនេះថា ការចាប់ផ្តើមចាក់វ៉ាក់សាំងកូវីដ ១៩ របស់ប្រទេសជាច្រើនលើពិភពលោករួមទាំងកម្ពុជា កំណើននៃការអនុម័តគម្រោងវិនិយោគរបស់ក្រុមប្រឹក្សាអភិវឌ្ឍន៍កម្ពុជា ការចុះកិច្ចព្រមព្រៀងពាណិជ្ជកម្មសេរីទ្វេភាគីជាមួយនឹងប្រទេសដៃគូ និងការស្ថាបនាហេដ្ឋារចនាសម្ព័ន្ធថ្មីៗ រួមទាំងកំពង់ផែទឹកជ្រៅ (ខេត្តព្រះសីហនុ) នឹងធ្វើឱ្យកម្ពុជាមានតម្រូវការកន្លែងស្តុកទំនិញកាន់តែច្រើន ពិសេសចាប់ពីពាក់កណ្តាលឆ្នាំ ២០២១។
លោកនិយាយថា៖ «គ្រប់គម្រោងវិនិយោគសុទ្ធតែត្រូវការកន្លែងស្តុកទំនិញ ហេតុនេះទីផ្សារនេះនឹងមានកំណើនតម្រូវការច្រើន ពិសេសពេលស្ថានភាពកូវីដ ១៩ ត្រូវបានគ្រប់គ្រងទាំងស្រុង»៕ LA
