The Phnom Penh Post Search

Search form

Logo of Phnom Penh Post newspaper Phnom Penh Post - តម្រូវការ និង​តម្លៃ​វីឡា​ជួល​នៅ​ភ្នំពេញ​កើន​ឡើង​តិច​តួច




តម្រូវការ និង​តម្លៃ​វីឡា​ជួល​នៅ​ភ្នំពេញ​កើន​ឡើង​តិច​តួច

វីឡា​ថ្មីៗ បាន​លេច​រូប​រាង​យ៉ាង​ច្រើន​នៅ​តាម​បុរី​នានា ខណៈ​វីឡា​ចាស់ៗ​នៅ​កណ្តាល​ក្រុង ត្រូវ​គេ​វាយ​ចោល​ដើម្បី​សាង​សង់​សំណង់​ធំៗ ឬ​ត្រូវ​បំប្លែង​ទៅ​ជា​ហាង​លក់​ទំនិញ ភោជនីយដ្ឋាន ឬ​សណ្ឋាគារ។
វីឡា​ថ្មីៗ បាន​លេច​រូប​រាង​យ៉ាង​ច្រើន​នៅ​តាម​បុរី​នានា ខណៈ​វីឡា​ចាស់ៗ​នៅ​កណ្តាល​ក្រុង ត្រូវ​គេ​វាយ​ចោល​ដើម្បី​សាង​សង់​សំណង់​ធំៗ ឬ​ត្រូវ​បំប្លែង​ទៅ​ជា​ហាង​លក់​ទំនិញ ភោជនីយដ្ឋាន ឬ​សណ្ឋាគារ។ ហុង មិនា

តម្រូវការ និង​តម្លៃ​វីឡា​ជួល​នៅ​ភ្នំពេញ​កើន​ឡើង​តិច​តួច

ភ្នំពេញ: តម្រូវ​ការ​វីឡា​ជួល​នៅ​រាជធានី​ភ្នំពេញ​មាន​ការ​ប្រែ​ប្រួល​តិច​តួច នា​ដើម ឆ្នាំ​២០១៥។ នេះ​បើ​យោង​តាម​ក្រុម​អ្នក​ជំនាញ​អចលន​ទ្រព្យ​ក្នុង​ស្រុក​មួយ​ចំនួន​កាល​ពី​ពេល​ថ្មីៗ​នេះ។

លោក ប៉ូ អ៊ាវគង់ ប្រធាន​គ្រប់គ្រង​ទូទៅ​ក្រុមហ៊ុន អេស៊ា រៀល​អេស្ទេត បាន​និយាយ​ថា តម្លៃ​វីឡា​ជួល​នៅ​កណ្តាល​រាជធានី​ភ្នំពេញ បាន​កើន​ឡើង​តិច​តួច​នា​ដើម​ឆ្នាំ​នេះ។ វីឡា​ភាគ​ច្រើន​ត្រូវ​បាន​គេ​យក​ទៅ​ប្រើ​ប្រាស់​ជា​លំនៅឋាន ការិយាល័យ ភោជនីយដ្ឋាន និង​សាលារៀន​ជាដើម។

លោក​បាន​បន្ត​ទៀត​ថា វីឡា​ជួល​ទាំង​នោះ​ភាគ​ច្រើន​មាន​នៅ​ក្នុង ខណ្ឌ​ដូនពេញ ខណ្ឌ​ចំការមន និង​ខណ្ឌ​ទួលគោក។ វីឡា​ជួល​ក្នុង ខណ្ឌ​ចំការមន និង ដូនពេញ មាន​តម្លៃ​ថ្លៃ​ជាង​គេ​នៅ​ក្នុង​រាជធានី​ភ្នំពេញ។

លោក​បាន​ប្រាប់​ទៀត​ថា បច្ចុប្បន្ន​វីឡា​ជួល​ដែល​មាន​ដី​ទំហំ ២០x៣០ ម៉ែត្រ ផ្ទះ​ទំហំ ១៤x១៦ កម្ពស់ ២ ជាន់ ព្រម​ទាំង​មាន​បន្ទប់​ចន្លោះ​ពី ៤-៦ នៅ​កណ្តាល​ក្រុង​អាច​មាន​តម្លៃ​ចន្លោះ​ពី ២០០០-​៥០០០ ដុល្លារ​ក្នុង​មួយ​ខែ។ លោក​បន្ត​ទៀត​ថា តម្រូវ​ការ​វីឡា​ជួល​នៅ​ជាយ​ក្រុង​មាន​ដូចជា​ក្នុង ខណ្ឌ​សែន​សុខ ឫស្សីកែវ ច្បារអំពៅ និង​មានជ័យ មាន​បរិមាណ​តិច​តួច​នៅ​ឡើយ ដោយ​តម្លៃ​របស់​វា​ស្ថិត​នៅ​ចន្លោះ​ពី ១០០០​-២០០០ ដុល្លារ។

លោក​មាន​ប្រសាសន៍​ថា៖ «តម្រូវ​ការ​វីឡា​ជួល​នៅ​ក្នុង​រាជធានី​ភ្នំពេញ​នា​ដើម ឆ្នាំ​២០១៥ នេះ​មិន​បាន​កើន​ឡើង​ច្រើន​នោះ​ទេ។ ការ​ធ្វើ​កិច្ច​សន្យា​ជួល​វីឡា​ភាគ​ច្រើន​មាន​រយៈ​ពេល​ចន្លោះ​ពី ២-៣ឆ្នាំ ហើយ​បន្ទាប់​ពី ២-៣​ឆ្នាំ តម្លៃ​វីឡា​ជួល​អាច​នឹង​កើន​ឡើង​ក្នុង​រង្វង់ ៥ ភាគរយ»។

លោក ច្រឹក សុខនីម អគ្គ​នាយក​ក្រុមហ៊ុន Century21 VTrust បាន​ប្រាប់​ថា ការ​ផ្គត់​ផ្គង់ និង​តម្រូវការ​វីឡា​ជួល​នៅ​កណ្តាល​រាជធានី​ភ្នំពេញ មិន​បាន​កើន​ឡើង​ច្រើន​ទេ​នា​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ។ តែ​ទោះ​បី​ជា​យ៉ាង​ណា​វីឡា​សង់​ថ្មីៗ​ដែល​មិន​នៅ​កណ្តាល​រាជធានី​ភ្នំពេញ កំពុង​កើន​ឡើង​ជា​លំដាប់។

លោក​បាន​ថ្លែង​ថា វីឡា​នៅ​កណ្តាល​ក្រុង​គេ​អាច​រក​ជួល​បាន​ក្នុង​តម្លៃ​ចាប់ពី ២០០០-​៦០០០ ដុល្លារ​ក្នុង​មួយ​ខែ ដោយ​តម្លៃ​របស់​វា​គឺ​ប្រែ​ប្រួល​អាស្រ័យ​លើ​ទីតាំង ទំហំ មាន​អាង​ទឹក និង​គ្រឿង​សម្ភារ​ប្រើ​ប្រាស់​ជាដើម។

លោក​បាន​បន្តថា បច្ចុប្បន្ន​វីឡា​ជួល​ក្នុង សង្កាត់​ទន្លេ​បាសាក់ អាច​មាន​តម្លៃ​ចាប់​ពី ៣០០០-​៤៥០០ ដុល្លារ​ក្នុង​មួយ​ខែ ក្នុង សង្កាត់​បឹង​កេងកង ១ បឹង​កេងកង ២ និង​បឹង​កេងកង ៣ អាច​មាន​តម្លៃ​ពី ៤០០០-​៦០០០ ដុល្លារ នៅ ខណ្ឌ​ទួលគោក មាន​តម្លៃ​ចាប់​ពី ៣០០០-​៥០០០ ដុល្លារ និង ខណ្ឌ​៧មករា អាច​មាន​តម្លៃ​ចន្លោះ​ពី ៤០០០ ទៅ ៧០០០ ដុល្លារ។

លោក​បាន​ថ្លែង​ថា៖ «វីឡា​ជួល​ភាគ​ច្រើន​ត្រូវ​បាន​ប្រើ​ប្រាស់​ជា​ការិយាល័យ ហាង​លក់​ទំនិញ ភោជនីយដ្ឋាន និង​កន្លែង​តាំង​លក់​ផលិតផល (Showroom) ជាដើម»។

លោក​បន្ត​ទៀត​ថា៖​«ការ​ធ្វើ​កុងត្រា​ជួល​ផ្ទះ​វីឡា​ដែល​ខ្ញុំ​ជួប​ប្រទះ​ភាគច្រើន​គឺមាន​រយៈ​ពេល​ពី ៥-៧​ឆ្នាំ។ ការ​ធ្វើ​កិច្ចសន្យា​រយៈ​ពេល​យូរ​អាច​មាន​ផល​ចំណេញ​បាន​ច្រើន ព្រោះ​អ្នក​ជួល​ត្រូវ​ការ​កែលម្អ​ផ្ទះ​ដើម្បី​ធ្វើ​ឲ្យ​ស្រប​ទៅ​តាម​ប្រភេទ​អាជីវកម្ម​របស់​គេ»។

លោក គីម ហ៊ាង នាយក​ក្រុមហ៊ុន ខ្មែរ រៀល​អេស្ទេត មាន​អះអាង​ថា តម្លៃ​វីឡា​ជួល​ក្នុង​តំបន់​ទួលគោក ទួល​ទំពូង បឹង​កេងកង ២ និង​បឹង​កេងកង ៣ ហាក់​ដូច​ជា​មាន​សន្ទុះ​ច្រើន​នៅ​ដើម ឆ្នាំ​២០១៥ នេះ ខណៈ​តំបន់​បឹង​កេងកង ១ មិន​សូវ​មាន​សកម្មភាព​ប៉ុន្មាន​ទេ ដោយ​សារ​តម្លៃ​ជួល​នៅ​ទីនោះ​ខ្ពស់​ពេក និង​មិន​សូវ​មាន​កន្លែង​ទំនេរ​សម្រាប់​ជួល​ផង​ដែរ។

លោក​បាន​បន្ត​ថា បច្ចុប្បន្ន​តម្រូវ​ការ និង​ការ​ផ្គត់​ផ្គង់​វីឡា​ជួល​នៅ​ក្នុង​រាជធានី​ភ្នំពេញ​មិន​ទាន់​មាន​អ្វី​ចោទ​ជា​បញ្ហា​នោះ​ទេ។

ខណៈ​ការ​ធ្វើ​សមាហរណ​កម្ម​សេដ្ឋកិច្ច​អាស៊ាន​ជិត​ចូល​មក​នោះ លោក គីម ហ៊ាង បាន​បញ្ជាក់​ថា៖ «ខ្ញុំ​មិន​រំពឹង​ថា តម្រូវការ​វីឡា​ជួល​នឹង​កើន​ឡើង​ច្រើន​នោះ​ទេ ខណៈ​បច្ចុប្បន្ន​បើ​គេ​ត្រូវ​ការ​កន្លែង​ស្នាក់នៅ គេ​អាច​ទៅ​រក​ខុនដូ ឬ​អាផាតមិន បាន​តែ​បើ​គេ​ត្រូវការ​ការិយាល័យ​ជួល គេ​អាច​ទៅ​រក​អគារ​ការិយាល័យ​ជួល ព្រោះ​វា​មាន​ភាព​ងាយ​ស្រួល​ជាង។ កាល​ពី​មុន​ដោយ​សារ​មិន​សូវ​មាន​អាផាតមិន​និង​ខុនដូ ហើយ​អគារ​ការិយាល័យ​ជួល​មាន​តិច ដូច្នេះ​ធ្វើ​ឲ្យ​តម្រូវ​ការ​វីឡា​ជួល​កាល​ពី​មុន​មាន​ច្រើន»៕

អត្ថបទគួរចាប់អារម្មណ៍

  • ភ្នំពេញៈ ក្រុមហ៊ុន Longfruiter Anlong Veng Oddor Meanchey Agriculture Park Co., Ltd បាន​បញ្ចេញ​ប្រាក់​វិនិយោគ ៥១ ​លាន​ដុល្លារ​ទៅលើ​ការដាំ​ដំណាំ​ចេក និង​ដំណាំ​ហូប​ផ្លែ​មួយចំនួន​នៅក្នុង​ស្រុក​អន្លង់វែង ខេត្ត​ឧត្តរមានជ័យ ដើម្បី​ជំរុញ​ការនាំចេញ ពិសេស​ទៅ​ទីផ្សារ​ប្រទេស​ចិន​។

  • ភ្នំពេញៈ មូលនិធិ​កម្ពុជា​ប្រឆាំង​កូវីដ​ ១៩ បន្ត​អំពាវនាវ​ដល់​សប្បុរជន​ឱ្យ​ចូលរួម​បរិច្ចាគ​ធនធាន ដើម្បី​រួមចំណែក​ក្នុងការ​ឧបត្ថម្ភ​ទ្រទ្រង់​ដល់​ពលរដ្ឋ​ដែល​កំពុង​ជួប​ការលំបាក និង​ក្រុមគ្រូពេទ្យ​អាវស អំឡុងពេល​ប្រយុទ្ធប្រឆាំង​ជំងឺ​កូវីដ ខណៈ​មូលនិធិ​នេះ​បាន​ជួយ​ដល់​ពលរដ្ឋ​ជាង ១ ​ម៉ឺន​គ្រួសារ តាមរយៈ​ការផ្តល់​ជា​គ្រឿង​បរិភោគ និង​កញ្ចប់​ថ្នាំ​ជាដើម​។

  • ភ្នំពេញៈ ​ជន​ជាប់ឃុំ​នៅតាម​ពន្ធនាគារ និង​មណ្ឌល​អប់រំ​កែប្រែ​រាជធានី​-​ខេត្ដ​ជាង ២ ​ពាន់​នាក់​បាន​ចាក់​វ៉ាក់សាំង​បង្ការ​ជំងឺ​កូវីដ​ ១៩ ​ដូស​ទី​ ៣ និង​កំពុង​បន្ត​ចាក់​ដូស​ជំរុញ​នេះ​បន្ថែមទៀត ខណៈ​ជន​ជាប់ឃុំ​សរុប​ប្រមាណ ៣៨ ០០០ ​នាក់​បាន​ចាក់​ ២​ ដូស​រួចហើយ​។

  • ភ្នំពេញៈ ​សាកលវិទ្យាល័យ និង​គ្រឹះស្ថាន​អប់រំ កម្រិត​ឧត្ដមសិក្សា​សាធារណៈ និង​ឯកជន​ប្រមាណ​ ២០ នៅ​ថ្ងៃទី​ ២៩ ខែមករា ខាងមុខនេះ​នឹង​រៀបចំ «​ពិព័រណ៍​ជំនាញ និង​សាកលវិទ្យាល័យ​» ​តាម​អន​ឡាញ​ដើម្បីឱ្យ​វាគ្មិន​ជំនាញ​ចែករំលែក​ចំណេះដឹង បទពិសោធ ដល់​និស្សិត​លើ​ការជ្រើសរើស​មុខជំនាញ​សិក្សា និង​សាកលវិទ្យាល័យ​សិក្សា​នៅក្នុង​ប្រទេស​កម្ពុជា​។

  • ភ្នំពេញៈ ជប៉ុន​បាន​ផ្ដល់​រថយន្ត​ពន្លត់​អគ្គិភ័យ​ចំនួន​ ៤ ​គ្រឿង​ដល់​អង្គភាព​ការិយាល័យ​នគរបាល​បង្ការ ពន្លត់​អគ្គិភ័យ និង​សង្គ្រោះ​នៃ​ស្នងការដ្ឋាន​នគរបាល​រាជធានី​ភ្នំពេញ ដើម្បី​ចូលរួមចំណែក​ធ្វើឱ្យ​ប្រសើ​ឡើង​នូវ​ប្រសិទ្ធភាព​ការងារ​ឆ្លើយតប និង​ការ​កាត់បន្ថយ​នូវ​ហានិភ័យ​នានា ដែល​បង្កឡើង​ដោយ​គ្រោះ​អគ្គិភ័យ​នៅ​កម្ពុជា ពិសេស​ក្នុង​រាជធានី​ភ្នំពេញ​។

  • ភ្នំពេញៈ ​សាជីវកម្ម​ធានាឥណទាន​កម្ពុជា (CGCC) និង​មជ្ឈមណ្ឌល​បច្ចេកវិទ្យា និង​ព័ត៌មាន​ជីវឧស្ម័ន (BTIC) នៅ​ថ្ងៃទី​ ២៤ ខែមករា បាន​ចុះ​អនុស្សរណៈ​ជាមួយ​គ្នា ដើម្បី​លើកកម្ពស់​បរិយាកាស​អំណោយផល​ដល់​ការវិនិយោគ​លើ​បច្ចេកវិទ្យា​ជីវឧស្ម័ន​ខ្នាត​ធំ​នៅ​កម្ពុជា​ដើម្បី​រួមចំណែក​កាត់​បន្ថយ​ការប្រែប្រួល​អាកាសធាតុ​។ នេះ​បើតាម​សេចក្ដី​ប្រកាស​ព័ត៌មាន​។